ساياجاي تۇرعىندارىنىڭ سايالى شاڭىراعى

بۇل ۇيلەر «Eurasian Resources Group»-تىڭ (ERG) نەگىزىن قالاۋشى-اكتسيونەرلەرى بولگەن قاراجات (40 ملرد تەڭگە) ەسەبىنەن سالىنعان. جاڭا ۇيلەردى بەرۋ راسىمىنە وبلىس اكىمى ناريمان تورەعاليەۆ پەن «ەۋرازيالىق توپ» جشس باس ديرەكتورىنىڭ ورىنباسارى دانيار راحماتۋللاەۆ قاتىستى.

– مەملەكەت باسشىسى قاسىم-جومارت كەمەل ۇلىنىڭ تاپسىرماسىنا سايكەس تاس­قىننان زارداپ شەككەن تۇر­عىندارعا زاڭ اياسىنداعى ءتيىستى كومەك كورسەتىلدى. بۇگىن ءبىز ورال قا­لا­سىنىڭ ساياجايلار القا­بىندا تۇرىپ, تاسقىندا باس­پاناسىنان ايىرىلعاندارعا جاڭا ۇيلەردىڭ كىلتىن تابىس ەتىپ جاتىرمىز. بۇل – جالپى ءوڭىر ءۇشىن ۇلكەن قۋانىش. قۇرىلىس جۇمىستارىنا قول­داۋ كورسەتكەن «ERG» كوم­پانياسىنىڭ وكىل­دەرىنە شىن جۇرەكتەن العىس ايتامىن», دەدى ن.تورەعاليەۆ.

«ورالداعى وسى ۇيلەر دە «Eurasian Resources Group» (ERG) كومپانياسى بولگەن قاراجاتقا ساتىپ الىنعان. كوم­پانيانىڭ نەگىزىن قالاۋشى-اكتسيونەرلەرى تاسقىننان زارداپ شەككەندەر ءۇشىن كومەككە 40 ملرد تەڭگەدەن اسا قاراجات بولگەن ەدى. بارشا قونىس يەلەرىن بۇگىنگى قۋانىشىمەن قۇتتىقتايمىن», دەدى د.راحماتۋللاەۆ.

ورالداعى «نۇرلى جول» ساياجايىنىڭ تۇرعىنى مارال ورالوۆانىڭ ءۇيى تاسقىن كەزىندە سۋ استىندا قالعان ەدى. ول مەم­لەكەتتىڭ كومەگى ارقىلى بۇگىن ساپالى باسپاناعا يە بولعانى ءۇشىن العىس ايتتى.

«كەزىندە «نۇرلى جول» سايا­جايىنان ءۇي سالعان ەدىك. كوكتەمدە ءۇيىمىز سۋعا كەتتى. پرەزيدەنتكە راحمەت, ءبىزدى دالادا قالدىرمادى. بۇگىن دەركول كەنتىنەن 3 بولمەلى ءۇي بۇيىردى. ءۇيدىڭ ءىشىن قاراپ شىقتىق, كەرەمەت دەپ ايتساق بولادى. ساپاسى دا جاقسى», دەيدى م.ورالوۆا.

باتىس قازاقستان وبلىسى اكىمدىگىنىڭ ءباسپاسوز قىزمەتى حابارلاعانىنداي, بيىل سۋ تاس­قىنىنان زارداپ شەككەندەر ءۇشىن باتىس قازاقستان وبلىسىندا 775 ءۇي سالىنعان. ونىڭ 375-ءسى – ورال قالاسىندا, 400-ءى – اۋدانداردا.

باتىس قازاقستان وبلىسى