باتىس قازاقستان وبلىسىنىڭ بوكەي ورداسى اۋدانىنداعى ءتورت شاعىن اۋىلدا كۇردەلى جوندەۋدەن وتكەن مەديتسينالىق پۋنكت پايدالانۋعا بەرىلدى. سايقىن اۋىلدىق وكرۋگىنە قاراستى شوڭاي ەلدى مەكەنىندە, مۇراتساي اۋىلدىق وكرۋگىنە قاراستى اجەن ەلدى مەكەنىندە, بيسەن اۋىلدىق وكرۋگىنە قاراستى جەتىباي مەن كوكتەرەك اۋىلدارىندا مەديتسينالىق پۋنكت كۇردەلى جوندەۋدەن ءوتىپ, ءبىر كۇندە حالىق يگىلىگىنە تاپسىرىلدى.
شالعاي اۋىل حالقىنىڭ وسى قۋانىشىنا اۋدان اكىمى نۇرلىبەك داۋموۆ پەن اۋداندىق اۋرۋحانا باسشىسى اناربەك بەليسانوۆ ورتاقتاستى.
– اۋىلدىڭ الەۋمەتتىك جاعدايىن جاقسارتۋ – مەملەكەت باسشىسى ءوزى نازاردا ۇستاپ وتىرعان ماڭىزدى باعىت. قاسىم-جومارت كەمەل ۇلى ءار جولداۋىندا دەنساۋلىق سالاسىنا ارنايى توقتالىپ, «ەلىمىزدىڭ باستى كاپيتالى – ادام. دەنى ساۋ ۇلت – مىقتى مەملەكەتتىڭ بەرىك تۇعىرى, نەگىزى» دەپ ناقتىلاپ وتىرادى. مەديتسينالىق قىزمەت ساپاسىن ارتتىرۋدا قاداۋ-قاداۋ يگى ىستەردى ىسكە اسىرۋعا قوماقتى قارجى ەش كەدەرگىسىز ءبولىنىپ كەلەدى. سونىڭ جارقىن ۇلگىسى – بۇگىنگى وقيعا. ەسەپتىك كەزدەسۋلەردە ازاماتتار اۋىلداعى امبۋلاتوريا مەن مەديتسينالىق پۋنكتتەردىڭ توزىعى جەتكەنىن, جەدەل جاردەم كولىكتەرى ىستەن شىعىپ, فەلدشەرلەردىڭ كولىكسىز قالعانىن ماسەلە ەتىپ كوتەرگەن ەدى. كۇنى كەشە بىرنەشە وكرۋگكە جەدەل جاردەم كولىگىن تابىستادىق. مىنە, بۇگىن مەديتسينالىق نىسانداردىڭ دا ماسەلەسى وڭ شەشىلگەنىنە كۋا بولىپ تۇرمىز. بيىلدىڭ وزىندە شوڭاي, اجەن, كوكتەرەك, جەتىباي, تايعارا, كەڭوي ەلدى مەكەندەرىندەگى مەدپۋنكتتەردى كۇردەلى جوندەۋ قولعا الىندى. ءدال بۇگىن ءتورت نىسان پايدالانۋعا بەرىلدى. قالعان ەكى نىساننىڭ جوندەۋ جۇمىسىن جىل اياعىنا دەيىن اياقتايمىز. وسىنداي جارقىن ىستەرىمىز جالعاستى بولسىن, – دەدى اۋدان اكىمى نۇرلىبەك جاسقايرات ۇلى.
اۋىلداعى دارىگەرلىك پۋنكتتەردىڭ عيماراتى عانا جوندەلىپ قويماي, ونداعى قۇرال-جابدىق تا تۇگەلدەي جاڭارتىلدى.
باتىس قازاقستان وبلىسى