پاريج وليمپياداسى: جەتىستىگىمىز – جەتى جۇلدە

تاەكۆوندوشىلار تۇك بىتىرمەدى

وليمپيادانىڭ 14-كۇنى قازاقستان سپورتشىلارى اراسىنداعى ەڭ جاسى باتىرحان تولەۋعالي دايانعا شىقتى. 80 كگ سالماقتا سايىسقا تۇسكەن ول تۇساۋكەسەر كەزدەسۋىن الەم چەمپيوناتىندا ەكى رەت قولا مەدالدى قورجىنعا سالىپ, افريكا ويىندارىنىڭ جەڭىمپازى اتانعان يسماەل كۋليباليگە قارسى وتكىزدى. جەكپە-جەك بارىسىندا وتە ساۋاتتى تاكتيكا ۇستانعان باتىرحان وزىنەن اتاق-داڭقى الدەقايدا زور جانە باقانداي ءبىر مۇشەل جاس ۇلكەن تانىمال سپورتشىدان ايلاسىن اسىردى. كۇنى كەشە عانا 18 جاسقا تولعان جاس تاەكۆوندوشىنىڭ وليمپيا ويىندارىنداعى العاشقى اياقالىسى ءبىزدى قۋانتتى. كەلەسى كەزەڭدە تولەۋعالي يتاليالىق سيمونە اللەسيومەن كۇش سىناستى. قارسىلاسى تىم ازۋلى ەدى. الەم مەن ەۋروپانىڭ ەكى دۇركىن چەمپيونىنا ونىڭ ءالى جەتپەدى.

ءسويتىپ, بۇل جولى دا كەڭ-بايتاق قازاق ەلىنەن ارمان شىلمانوۆتىڭ وسىدان 16 جىل بۇرىنعى كورسەتكىشىن قايتالايتىن ءبىر دايان شەبەرى شىقپادى. ەستەرىڭىزدە بولار, اتىراۋدىڭ ارلانى 2008 جىلى بەيجىڭدە قولا مەدال يەلەندى. سول كەزدەن بەرى تاعى ءتورت بىردەي وليمپيادا الاۋى تۇتاندى. الايدا قازاق جانكۇيەرلەرى نە لوندون مەن ريو-دە-جانەيرودا, نە توكيو مەن پاريجدە مەدال سىڭعىرىن ەستىمەدى.

نە جۇگىرە المادى, نە سەكىرە المادى

قازىرگى بەسسايىستان وتكەن جارىس­تا ونەر كورسەتكەن ەلەنا پوتاپەنكو جارتىلاي فينالدا 1 301 ۇپاي جيىپ, 16-ورىنعا تۇراقتادى. بۇل ناتيجە اقتىق سىنعا جولداما الۋ ءۇشىن جەتكىلىكسىز بولدى. ەرلەر اراسىندا سىنعا تۇسكەن گەورگي بورودا-دۋدوچكين 1 452 ۇپاي يەمدەنىپ, فينالدان تىس قالدى. ەسكەك ەسۋشىلەر سايىسىندا ماريا بروۆكينا مەن رۋفينا ىسقاقو­ۆا (500 مەتر, كانوە-ەكىلىك) 11-ورىنعا تۇ­راقتادى. برەيكينگتەن ءامىر زاكىروۆ باق سىنادى. باستاپقى باسەكەلەردە ول ماروككو مەن تايپەي وكىلدەرىنەن باسىم ءتۇستى. ودان كەيىن نيدەرلاند سپورتشىسىنان ۇتىلعانىمەن, شيرەك فينالعا جولداما الدى. بىراق بۇل مەجەدە جەرلەسىمىز وسى جارىستىڭ باستى ءفاۆوريتى, بىلتىرعى الەم چەمپيونى, امەريكالىق ۆيكتور مونتالۆوعا ەسە جىبەردى.

افريكادان اتتاي قالاپ الدىرعان جە­ڭىل اتلەت دەيزي دجەمپەكەي 10 000 مەتر­لىك قاشىقتىققا جۇگىردى. الايدا ول قا­زاق جانكۇيەرلەرىن قۋانتا المادى. كەنيا­لىق لەگيونەر مارە سىزىعىن 17-ءشى بولىپ قيىپ ءوتتى. بۇل سايىس اتالعان مەم­لەكەت­تىڭ تاعى ءبىر تۋماسى, الەم چەم­پيوناتىنىڭ ­ەكى دۇركىن جۇلدەگەرى, قۇر­لىق بىرىنشىلىگى­نىڭ جەڭىمپازى بەات­ريس چەبەتتىڭ جەڭىسى­مەن اياقتالدى. جەڭىم­پازدىڭ ۋاقىتى – 30:43:25. بۇل – 24 جاستاعى كەنيالىق جەلاياقتىڭ پاريج وليمپياداسىنداعى ەكىنشى التىنى. بىرەر كۇن بۇرىن عانا چەبەت 5 000 مەترلىك قاشىقتىقتا شاشاسىنا شاڭ جۇقتىرماعان ەدى. كۇمىس مەدالدى ەۋروپانىڭ ەكى دۇركىن چەمپيونى, يتاليالىق ناديا باتتوكلەتتي يەلەندى. «قارا مارجاننان» ول نەبارى 10 ميلليسەكۋند قالىپ قويدى. توكيوداعى ويىنداردا باق جۇلدىزى جارقىراي جانعان نيدەرلاندىق سيفان حاسسان بۇل جولى قولا مەدالدى قاناعات تۇتتى.

مارافونشىلار جارىسىندا جاننا ماماجانوۆا ونەر كورسەتتى. وسىدان ءۇش جىل بۇرىن توكيودا ول 46-ورىنعا تابان تىرەگەن ەدى (ۋاقىتى – 2:37:42). پاريجدە 30 جاستاعى قازاق سپورتشىسى ءوز كورسەتكىشىن جاقسارتتى. مارەگە 2 ساعات 30 مينۋت 51 سەكۋندتا جەتكەن ماماجانوۆا 33-ورىندى يەمدەندى. ال نيدەرلاندتىڭ نامىسىن قورعاپ جۇرگەن ەفيوپيالىق قىز سيفان حاسسان 5 جانە 10 شاقىرىمدىق الاماندا ءۇشىنشى ورىننان اسا الماعانىمەن, ەسەسىنە مارافونشىلار باسەكەسىندە وعان تەڭ كەلەر ەشكىم تابىلمادى. چەمپيوننىڭ ناتيجەسى – 2:22:55. ەكىنشى جانە ءۇشىنشى ساتىعا ەفيوپيالىق تيگتس اسسەفا (02:22:58) مەن كەنيالىق حەلەن وبيري (02:23:10) جايعاستى.

باتىرمۇرزاەۆ بابىندا ەمەس

ەركىن كۇرەس شەبەرلەرىنىڭ سايىسىندا مەيرامبەك قارتباي (57 كگ) پەن ازامات داۋلەتبەكوۆ (86 كگ) العاشقى اينالىمنان اسا الماي, كورەرمەندەردى قاتتى قىنجىلتتى. كەلەسى كۇنى يۋسۋپ باتىرمۇرزاەۆ بوزكىلەمگە شىقتى. 125 كگ سالماق دارەجەسىندە بەلدەسكەن نوعاي جىگىتى باستاپقى باسەكەدە پولشالىق روبەرت بارانعا ەسە جىبەردى. شىن مانىندە ەكەۋى مۇلدەم كۇرەسكەن دە جوق. باسەكەنىڭ باسىنان اياعىنا دەيىن يتەرىسىپ, تىرەسىپ, ءسۇزىسىپ ءجۇرىپ الدى. وسىنداي سۇرەڭسىز ونەر مەن كەلەڭسىز كورىنىستىڭ كۋاسى بولعان «گران-پالە-ەفەمەر» كەشەنىنە جينالعان كورەرمەندەر ابدەن مەزى بولدى. تورەشى الما-كەزەك اكتيۆيتي تايم بەلگىلەدى. سول كەزدە روبەرت ەكى ۇپاي السا, باتىرمۇر­زاەۆ جالعىز عانا ۇپايمەن شەكتەلدى. جەڭىلىپ جاتسا دا, قازاقستاننىڭ بالۋا­نى جانۇشىرا العا ۇمتىلمادى. يۋسۋپ­تىڭ بويىنان جەڭىسكە دەگەن قۇلشىنىس پەن تالپىنىستى بايقامادىق. ەلدىڭ ەلدىگى سىنعا تۇسكەن ساتتە مەملەكەتتىڭ مۇددەسىن ىسىرىپ قويىپ, ەشتەڭەگە باس قاتىرماي بەيقام جۇرگەن بالۋانعا قاتتى اشۋلاندىق. سول كەزدە باتىرمۇرزاەۆ­تىڭ بوزكىلەمدەگى ءجۇرىس-تۇرىسى مەن قي­مىل-قوزعالىسى كۇللى حا­لىق سەنىم ارتقان ساڭلاقتى ەمەس, جاي عانا سەنا وزەنى­نىڭ جاعالاۋىندا سەرۋەندەپ جۇر­گەن ەش الاڭسىز ادامدى ەلەستەتتى.

ءىش پىستىرار باسەكەنىڭ اياقتالۋىنا شامامەن 10–15 سەكۋندتاي عانا ۋاقىت قال­عاندا يۋسۋپ قولىن قارسىلاسىنىڭ اياعىنا سوزعانداي بولدى. سونىڭ وزى­نەن شى­نايىلىق بايقالمادى. باتىرمۇرزاەۆتىڭ بۇل ارەكەتى «ەرتەڭگى كۇنى جانكۇيەرلەر «مۇلدەم كۇرەسپەدى» دەپ جازعىرماسىن» دەگەن ويمەن جاي عانا جاسالعانداي كو­رىندى. شابۋىلدىڭ سىلبىر بولعانى سون­شالىق, باران ونىڭ ارتىنا وپ-وڭاي شىعىپ, تاعى ەكى ۇپاي ەنشىلەدى – 1:4. بۇل ەسەپ باسەكەنىڭ سوڭىنا دەيىن ساقتالدى. كوپ كەشىكپەي پولشا سپورتشىسى گرۋزيا­نىڭ الىبى گەنو پەترياشۆيليدەن ويسىراي ۇتىلدى. سونىڭ سالدارىنان يۋسۋپ باتىرمۇرزاەۆ جۇبانىش بەلدەسۋىنە قا­تىسۋ مۇمكىندىگىنەن ايىرىلدى.

ەركىن كۇرەستەگى سوڭعى ءۇمىتىمىز الىشەر ەرعالي دا سەنىم ۇدەسىنەن شىعا المادى. 97 كگ سالماق دارەجەسىندە كۇرەسكەن قانداسىمىز ءبىراز جارىستىڭ كورىگىن قىزدىرىپ, قۇرلىقتىق دەڭگەيدەگى دودالاردا سان مارتە جۇلدە الدى. توكيوداعى ويىنداردا باق سىنادى. ەلىشىلىك جارىستا قازاقتان شىققان تۇڭعىش الەم چەمپيو­نى ريزابەك ايتمۇحاننىڭ وزىنەن ايلاسىن اسىردى. پاريج وليمپياداسىنىڭ تۇساۋكەسەر كەزدەسۋىندە ەرعالي مىسىرلىق مۇستافا ەلدەرستى 6:2 ەسەبىمەن ەڭسەردى. كوپ كەشىكپەي احمەد تاجۋدينوۆپەن كۇش سىناستى. بۇل تارتىس باحرەيننىڭ نامىسىن قورعاعان داعىستاندىق بالۋاننىڭ ايقىن جەڭىسىمەن اياقتالدى.

جۇبانىش بەلدەسۋىندە الىشەردىڭ جولى ءامىر ءالي ازارپيرامەن قيىستى. باستاپقى باسەكەدە ول دا تاجۋدينوۆپەن جولىققان ەدى. جاستار اراسىندا ەكى دۇركىن الەم چەمپيونى اتانىپ, الەم كۋبوگىندە دارا شىققان يراننىڭ ءاپايتوسى احمەتكە لايىقتى قارسىلىق كورسەتىپ, ءبىر عانا ۇپاي ايىرماشىلىعىمەن ۇتىلدى. سول سايىستان كەيىن كوڭىلگە سەكەم الدىق. بەكەر قاۋىپتەنبەگەن ەكەنبىز. ازارپير ەرعاليدى وڭاي ەڭسەردى – 6:1. وسىلايشا, پاريجدەگى جارىستان ەركىن كۇرەس شەبەرلەرىمىز ولجاسىز ورالدى.

ءدال وسى سالماقتا حابيلا ءابۋسايمان دا سايىسقا ءتۇستى. ول بىردەن كايل سنايدەر­گە تاپ بولدى. قىتايدىڭ شىڭجاڭ-ۇيعىر اۆتونوميالىق ولكەسىندە دۇنيەگە كەلگەن قازاقتىڭ نار تۇلعالى جىگىتى ريو وليمپياداسىنىڭ جەڭىمپازى, توكيو وليمپياداسىنىڭ كۇمىس جۇلدەگەرى, الەمنىڭ ءۇش دۇركىن چەمپيونىمەن ءبىراز تىرەستى. العاشقى ءۇش ۇپايدى حابيلا الدى. وسىلاي بولادى دەپ ەش ويلاماعان كىلەمدەگى قازى ساسقانىنان ونى كايلدىڭ ەنشىسىنە جازدى. بىراق قاپتالداعى تورەشىلەر ونىڭ قاتەسىن دەر كەزىندە تۇزەدى. ءابۋسايمان العا شىقتى – 3:0. بىراق اقش-تىڭ اتاقتى بالۋانى باسەكە قىزا كەلە ۇپايىن تۇگەندەي باستادى. اقىرى سنايدەر ءوز دەگەنىنە جەتىپ, 9:5 ەسەبىمەن باسىم ءتۇستى.

ءپاريجدى مويىنداتقان قازاقتار

جەكسەنبىدە جەر-جاھان جانكۇيەر­لەرىنىڭ نازارىن وزىنە اۋدارعان ءححىىى جازعى وليمپيا ويىندارىنىڭ الاۋى ءسوندى. بىردەن ايتا كەتەيىك, ەلىمىز ءوز دەڭگەيىندە ونەر كورسەتە المادى. بار-جوعى جەتى جۇلدە العان جەرلەستەرىمىز جالپىكوماندالىق ەسەپتە 43-ساتىعا ­جاي­عاستى. بۇل جولى 1 التىن, 3 كۇمىس جانە 3 قولا بۇيىردى. ءيا, 2021 جىلى توكيو وليمپياداسىنا قاراعاندا مەدال­دار­دىڭ ساپاسى جاقسىراق بولدى. جاپو­نيا ­استاناسىندا 8 قولانى ەنشىلەپ, جالپى ەسەپتە 83-ورىندى قاناعات تۇتقان ەدىك. دەسەك تە جۇلدەلەردىڭ سانى جاعىنان ۇتىلدىق. ويتكەنى وسىدان ءۇش جىل بۇ­رىن­عى كورسەتكىشكە قاراعاندا بيىلعى با­سە­كەدە ءبىر مەدال كەم الدىق.

پاريج وليمپياداسىنىڭ قاھارمانى ەلدوس سمەتوۆ ەكەنى ءسوزسىز. فرانتسيانىڭ باس شاھارىندا قازاق ەلىنىڭ ءانۇرانىن شىرقاتۋ باقىتى تەك سول دۇلدۇلگە عانا بۇيىردى. بۇعان دەيىن دە تالاي تولاعاي تابىسقا قول جەتكىزگەن 31 جاستاعى تارازدىڭ تارلانى وليمپيا ويىندارىندا باس جۇلدەنى ولجالاعان ەلىمىزدىڭ تۇڭعىش دزيۋدوشىسى رەتىندە تاريحتا قالدى. جوعارىداعىداي جاعداي 2004 جىلى افينادا ورىن العان ەدى. ەجەلگى ەللادا ەلىندە وتانداستارىمىزدىڭ اراسىنان جالعىز التىندى بوكسشى باقتيار ارتاەۆ يەلەندى. قالعان سپورتشىلار كۇمىس پەن قولانى قاناعات تۇتتى. ءبىر ايتا كەتەرلىگى, جوعارىدا ەسىمى اتالعان ساڭلاقتاردىڭ ەكەۋى دە – قاسيەتتى اۋليە-اتا توپىراعىنىڭ تۋماسى.

گيمناست ناريمان قۇربانوۆ كۇمىسپەن كۇپتەلدى. وسىعان دەيىن قۇرلىقتىق دەڭگەيدەگى دودالاردا عانا دارالانعان 26 جاستاعى الماتىلىق سايىپقىران پاريجدە جاسىنداي جارقىلدادى. ناريمان تەك الەم مەن ەۋروپانىڭ ەكى دۇركىن چەمپيونى, يرلانديالىق ريس ماككلەناگاندى عانا العا جىبەردى. قالعان جۇلدىزداردىڭ بارلىعىن ارتقا تاستادى. تاۋەلسىز قازاقستاننىڭ تاريحىندا قۇربانوۆقا دەيىن سپورتتىق گيمناستيكانى سەرىك ەتكەن جەرلەستەرىمىزدىڭ بىردە-بىرەۋى جەڭىس تۇعىرىنا كوتەرىلگەن ەمەس.

1980 جىلى ماسكەۋدە الاۋى تۇتانعان وليمپيا ويىندارىندا قازاقتىڭ قوس قىرانى – جاقسىلىق ۇشكەمپىروۆ پەن ءشامىل سەرىكوۆ گرەك-ريم كۇرەسىنەن وتكەن جارىستا بارلىق قارسىلاسىن قاپى قالدىرىپ, التىن تۇعىردان قول بۇلعادى. سودان بەرى شيرەك عاسىرعا جۋىق ۋاقىت وتسە دە, وسى سپورت ءتۇرىن سەرىك ەتكەن بىردە-ءبىر قانداسىمىز سول مەجەگە جەتكەن جوق. ول از دەسەڭىزدەر, ەلىمىزدىڭ بالۋاندارى وليمپيادانىڭ سوڭعى التىنىن سوناۋ 1996 جىلى ولجالادى. اتلانتاداعى جارىستا يۋري مەلنيچەنكو اتوي سالدى. ودان بەرى 28 جىل زىمىراپ وتە شىقتى. اتى اڭىزعا اينالعان اقيىق ازاماتتار­دىڭ ەرلىگىن قايتالاۋعا دەمەۋ جادىراەۆ­تىڭ پاريجدە جاقسى مۇمكىندىگى بولدى. الايدا ول شەشۋشى تۇستا ءسۇرىندى. دەس­ەك تە, بۇل كۇندەرى جاسى 35-كە تاياعان جار­كەنت ءوڭىرى تۋماسىنىڭ بۇل كۇمىسىن بارشا جۇرت «التىنمەن پاراپار» دەسىپ جاتىر.

جىلدان-جىلعا قۇلدىراپ بارا جات­قان قازاق بوكسىنىڭ ابىرويىن بۇل جولى نۇربەك ورالباي ساقتاپ قالدى. باسقا ماقتاۋلى مارعاسقالار بىرىنەن كەيىن ءبىرى ءسۇرىنىپ جاتقاندا 80 كگ سالماقتاعى استانالىق ارلان اقتىق سىنعا دەيىن ال­قىنباي جەتىپ, كۇمىس مەدالدى موينىندا جارقىراتتى. ايەلدەر اراسىندا نازىم قىزايبايدىڭ ونەرى كوڭىلدەن شىقتى. جاسى 30-دان اسقاندا عانا وليمپيادادا كۇش سىناسۋ مۇمكىندىگىنە يە بولعان ول قولا جۇلدەگە قول جەتكىزدى. نىسانا كوزدەۋشىلەر سايىسىندا الەكساندرا لە مەن يسلام ساتپاەۆ تا ءدال سول مەجە­دەن كورىندى. وسى ورايدا كۇنى بۇگىنگە دەيىن قازاقتىڭ بىردە-ءبىر مەرگەنى تورت­جىلدىقتىڭ باستى دوداسىندا جەڭىس تۇعى­رىنا كوتەرىلە الماعانىن ايتا كەتۋگە ءتيىسپىز. سول كوشتى يسلام باستادى.

كورشىلەردىڭ قادامى قۋانتارلىق

پاريج وليمپياداسىندا كورشى­لەرىمىز دە جاقسى ونەر كورسەتتى. اسىرەسە وزبەكستان سپورتشىلارىنىڭ تولاعاي تابىسىنا ءتانتى بولدىق. عالامدىق دودادا ولار 8 التىن, 2 كۇمىس جانە 3 قولانى ولجالاپ, كوماندالىق سايىستا 13-ورىندى يەلەندى. راسىندا دا, بۇل – وتە كەرەمەت كورسەتكىش. بوكستان باس جۇلدەنىڭ بەسە­ۋىن ولجالاعان الا تاقيالى اعا­يىن­دارى­­مىز جالپى ەسەپتە جەكە-دارا كوش باستا­دى. حاسانبوي دۋسماتوۆ پەن باحودير جالولوۆ ەكى دۇركىن وليمپيادا چەمپيونى اتا­­نىپ, تاريحتىڭ جاڭا بەتىن اشتى. ال ەلىمىز­دە ونداي دارەجەگە كوتەرىلگەن بىردە-ءبىر بىلعارى قولعاپ شەبەرى جوق.

تاەكۆوندوشىلار سايىسىندا ۇلىقبەك راشيتوۆ قارسىلاس شىداتپادى. ءسويتىپ, 22 جاستاعى ورىمدەي جاس وليمپيا ويىندارىنىڭ ەكى دۇركىن جەڭىمپازى دەگەن اسا مارتەبەلى اتاققا يە بولدى. بۇل جاعىنان دا ءبىز ۇياتتىمىز. قازاقتار ءالى دە ارمان شىلمانوۆتىڭ 2008 جىلى بەيجىڭدە جەڭىپ العان جالعىز قولاسىن كوڭىلگە مەدەت قىلۋدا. دزيۋدوشىلاردىڭ دوداسىندا ديورا كەلديەروۆا دارا شىقتى. سپورتتىڭ بۇل ءتۇرىن سەرىك ەتكەن قازاق قىزدارىنا التىن تۇرماق, جاي عانا جۇلدە الۋدىڭ ءوزى اسقاق ارمانعا اينالدى. تاعى ءبىر التىندى ەركىن كۇرەس شەبەرى, داعىستاندىق لەگيونەر رازامبەك جامالوۆ جەڭىپ الدى.

قىرعىزستان دا قاراپ قالعان جوق. ولار التى جۇلدە ولجالادى. ەكەۋى – كۇمىس, قالعانى – قولا. فرانتسيا استاناسىندا ايىر قالپاقتى اعايىندار 2008 جىلى بەيجىڭدەگى (1 كۇمىس, 2 قولا) جانە 2021 جىلى توكيوداعى (2 كۇمىس, 1 قولا) تابىسىنان ەكى ەسە اسىپ ءتۇستى. بۇل – اتالعان مەملەكەتتىڭ تاريحىندا بۇرىن-سوڭدى بولماعان كورسەتكىش. ناتيجەسىندە, ولار كوماندالىق ەسەپتە 68-ورىندى يەلەندى. سول جۇلدەلەردىڭ دەنىن بالۋاندار ولجالادى. ولاردىڭ جىگىتتەرى قارۋلى, قىزدارى وجەت ەكەنىن مويىنداماسقا لاج جوق. سپورتتىڭ بۇل تۇرىندە قازاقستانعا جالعىز عانا جۇلدە بۇيىرسا, كورشىلەرىمىز بەس مارتە جەڭىس تۇعىرىنا كوتەرىلدى. تارقاتىپ ايتساق, مەيىرىم جۇمانازاروۆا اقتىق سىنعا دەيىن القىنباي جەتتى, ال ايسۇلۋ تىنىبەكوۆا (ايەلدەر كۇرەسى), جولامان شارشەنبەكوۆ, اقجول ماحمۋدوۆ جانە ۋزۋر جۋزۋپبەكوۆ (گرەك-ريم كۇرەسى) ۇزدىك ۇشتىكتى تۇيىندەدى.

كورەرمەندەر كوزايىمىنا اينالعان مۇناربەك سەيىتبەك ۇلى جايىندا اڭگىمە مۇلدە بولەك. فرانتسياعا قازاق ەلىنىڭ جەتى جۋان جۇدىرىقتى جىگىتتەن بولەك, توپىرلاعان باپكەرلەر, سانسىز باسشىلار مەن قوسشىلار اتتانعانى ءمالىم. بارلىعى ۋلاپ-شۋلاپ ءجۇرىپ, جالقى جۇلدەگە قول جەتكىزدى. ال قىرعىزستانعا ءبىر عانا جولداما بۇيىرىپ, سەنانىڭ جاعالاۋىنا ەكى ادام عانا ساپار شەكتى. ولار – مۇنار­بەك پەن ۇلتتىق قۇرامانىڭ باس باپكەرى. تىپ­تەن اتالعان بوكسشىنى بوزبالا شاعى­نان تاربيەلەگەن جەكە جاتتىقتىرۋ­شى­سى­نىڭ وزىنە اككرەديتاتسيا بەرىلمەدى. بىراق بۇل جاعداي سەيىتبەك ۇلىنا ەش اسەر ەتكەن جوق. قىرعىزدىڭ ءور مىنەزدى ۇلى كۋبالىق سايدەل ورتا, امەريكا­لىق جامال حارۆي جانە بولگاريالىق حاۆەر يبانەس (تەگى كۋبالىق) سىندى ساڭلاقتارعا سان سوقتىردى. ال اقتىق سىندا وزبەك ابدۋلمالىك حالوكوۆتان ايلاسىن اسىرا الماي, كۇمىس مەدالدى موينىنا ءىلدى. وسىلايشا, مۇناربەكتىڭ ەسىمى قىرعىزستان بوكسشىلارى اراسىنان شىققان وليمپيادانىڭ تۇڭعىش جۇل­دەگەرى رەتىندە تاريحتا قالدى.

تاجىكستاننىڭ دا قادامى جامان بولعان جوق. العاش رەت 2008 جىلى بەيجىڭ وليمپياداسىندا ەركىن كۇرەس شەبەرى يۋسۋپ ابدۋسالاموۆ پەن دزيۋدوشى راسۋل بوكيەۆ, 2012 جىلى لوندوندا بوكسشى موۆزونا شوريەۆا جۇلدەگەرلەر قاتارىنان كورىندى. 2016 جىلى ريو-دە-جانەيرودا بالعا لاقتىرۋشى ءدىلشود نازاروۆ باس جۇلدەنى قانجىعاسىنا بايلادى. بار تابىسى سول عانا ەدى. ال پاريجدە تاجىكتەر ءۇش جۇلدەنى قورجىنعا سالدى. ونىڭ ەكەۋىن دزيۋدوشى سامون ماحمادبەكوۆ پەن تەمۋر راحيموۆ يەلەنسە, بىرەۋىن بوكسشى داۆلات بولتاەۆ ەنشىلەدى. ءسويتىپ, پامير تاۋى بوكتەرىنەن كەلگەن تاجىك سپورتشىلارى مەدالدار سانىن جەتىگە جەتكىزدى.

پاريج وليمپياداسىندا بارلىعى ­63 مەم­لەكەتتىڭ ءانۇرانى شىرقالىپ, 91 ەلدىڭ تۋى بيىكتە جەلبىرەدى.