«مەكتەپكە جول» مەيىرىمنەن باستالادى

بۇل جونىندە وبلىستىق ءبىلىم باسقارماسى باسشىسىنىڭ ورىنباسارى لۋارا باتىرعاليەۆا حا­بارلادى. وڭىردە ەكى ايلىق «مەك­تەپكە جول» رەسپۋبليكالىق اكتسياسى باستالدى. ونىڭ ايتۋىنشا, بيىل ءبىرىنشى جارتى­جىلدىقتا وڭىردە جەرگىلىكتى بيۋدجەت ەسەبىنەن 10 370 بالاعا كومەك كورسەتىلگەن.

– بۇل كومەك جالپىعا بىردەي ءبىلىم بەرۋ قورىنان ءبولىندى. جار­دەمدى ەڭ الدىمەن مەملەكەتتىك اتاۋلى الەۋمەتتىك كومەك الۋعا قۇ­قىعى بار وتباسىلاردان شىققان بالالارعا, بۇل كومەكتى الماسا دا جان باسىنا شاققانداعى تابىسى ەڭ تومەن كۇنكورىس دەڭگەيىنەن تومەن بولعان وتباسى بالالارىنا, جەتىم جانە اتا-اناسىنىڭ قام­قورلىعىنسىز قالعان بالا­لارعا, توتەنشە جاعداي سالدارىنان شۇ­عىل جاردەمدى تالاپ ەتەتىن وتباسى بالالارىنا, سونداي-اق ءبىلىم بەرۋ ۇيىمىنىڭ القالى باسقارۋ ورگانى ماقۇلداعان وزگە دە ساناتتارعا بەرىلەدى. بيىل وبلىس بويىنشا وسىنداي وقۋ­شىلارعا 450,0 ملن تەڭگە قاراجات ءبولىنىپ وتىر. ول كەڭسە تاۋار­لارىن, مەكتەپ فورماسىن, سپورت­تىق كيىم, اياق­كيىم تاعى باسقا قا­جەتتى نارسەلەردى ساتىپ الۋعا جۇم­سالادى, – دەدى لۋارا قايرەكەنقىزى.

بۇگىنگى كۇنگە 1001 وقۋشىعا جاردەم بەرۋ ءۇشىن ولاردىڭ اتا-انالارىنىڭ كارت-شوت­­تا­رى­نا جالپى سوماسى 43,4 ملن تەڭگە اۋدا­رىلعان.

جوعارىدا ايتقانداي, قازىر بۇل اكتسيا ەلىمىزدىڭ بارلىق اۋىل-اۋدانىندا ءوتىپ جاتىر. ءبىز وڭىردەگى ەڭ ۇلكەن اقجايىق اۋدانىنداعى احۋال­دى ءبىلۋ ءۇشىن اۋداندىق ءبىلىم ءبولىمىنىڭ باسشىسى ەربولات بەكمولدينگە حابارلاسقان ەدىك.

 – وتكەن وقۋ جىلىندا اۋدانىمىزدا الەۋ­مەتتىك قورعالماعان وتباسىنان شىققان 914 بالاعا 14 534 137 تەڭگە كولەمىندە كومەك كورسەتىلدى. وقۋشىلارعا كەڭسە تاۋارلارىن تومەن باعامەن ساتۋ ءۇشىن كاسىپكەرلەردى جاپپاي تارتا وتىرىپ مەكتەپ جارمەڭكەلەرىن ۇيىمداستىردىق. ونىڭ ىشىندە ءساتيمولا كەن ورنىن يگەرۋشى «SRPM Resources Ltd» كومپانياسى بىرنەشە مەكتەپكە: عابدوللا ماحامبەتوۆ اتىنداعى ورتا مەكتەبىنە – 1 054 600 تەڭگە, حيۋاز دوسپانوۆا اتىنداعى ورتا مەكتەپكە – 700 000 تەڭگە, تايپاق مەكتەپ-گيمنازياسىنا – 350 000 تەڭگە, قۇرمان بايسىقوۆ اتىنداعى ورتا مەكتەپكە – 1 400 000 تەڭگە, سارىتوعاي ورتا مەكتەبىنە – 2 250 000 تەڭگە, ىبىراي التىنسارين اتىنداعى ورتا مەكتەپكە – 1 050 000 تەڭگە, كراسنويار نەگىزگى مەكتەبىنە – 700 000 تەڭگە, ياعني بارلىعى 7 504 600 تەڭگە كولەمىندە كومەك كورسەتتى, – دەيدى ەربولات مۇراتقالي ۇلى.

بۇدان دا بولەك, اقجايىق اۋدانىندا الەۋمەتتىك وسال 769 وتباسىنىڭ 1467 بالاسىنا وتكەن وقۋ جىلىندا جالپىعا بىردەي مىندەتتى ءبىلىم بەرۋ قورىنان 59 511 789 تەڭگە كولەمىندە ماتەريالدىق كومەك كورسەتىلىپتى. بۇل – وبلىس بويىنشا ەڭ جوعارى كورسەتكىشتىڭ ءبىرى.

جالپى, ءار مەكتەپتىڭ جانىنان قۇرىلعان ارنايى القا مۇشەلەرى كومەك سۇراپ كەلگەن اتا-انالاردىڭ ءاربىر ءوتىنىشىن مۇقيات قاراپ, مۇقتاج جاندارعا مۇمكىندىگىنشە كومەك قولىن سوزىپ وتىرادى. ورال قالاسىندا نۇرلان ساتتىقوۆ باسقاراتىن قادىر مىرزا ءالى اتىنداعى №47 مەكتەپتىڭ قامقورشىلار القاسىندا تۇرعاندىقتان, وسى جولداردىڭ اۆتورى دا بۇل ماسەلەمەن جاقسى تانىس. اتالعان مەكتەپتە 2024–2025 وقۋ جىلىنا دايىندىق بارىسىندا از قامتىلعان 55 وقۋشىعا 43 407 تەڭگەدەن بەرىلدى.

 – تاراتىپ ايتار بولساق, اتاۋلى الەۋمەتتىك كومەك الاتىن 20 وقۋشىعا, وتباسى تابىسى كۇنكورىس دەڭگەيىنەن تومەن 31 وقۋشىعا جانە قامقورشىلىقتاعى 2 وقۋشىعا جاردەم بەردىك. ول بالالار جاڭا وقۋ جىلىنا دايىن. بۇدان بولەك, توتەنشە جاعدايعا ۇشىراعان 2 وقۋشىعا دا قارجىلاي كومەك بەرىلدى. ايتا كەتەيىن, وتىنىش­تەر مەن قۇجاتتار ءالى قابىلدانىپ جاتىر. ءبىزدىڭ دەمەۋشىلەرىمىز كوپبالالى 5 وقۋ­شىعا مەكتەپ سومكەسى مەن سپورتتىق اياقكيىم الىپ بەردى. مەكتەپ قامقورىنداعى وقۋشىعا دەمەۋشىلەر 55 000 تەڭگە كومەك بەردى. وسى «مەكتەپكە جول» اكتسيا­سى اياسىندا ءتۇرلى مەكەمەلەر مەن دەمەۋشىلەرگە قاتىناس حات جولداپ, باستامانىڭ ءمان-ماڭىزىن ءتۇسىندىرىپ جاتىرمىز. اكتسيا جالعاسىپ جاتىر, – دەيدى نۇرلان ناريمان ۇلى.

باتىس قازاقستان وبلىسى