ەلدوستىڭ ەرلىگى جانە ساڭلاقتاردىڭ سان سوققان كۇنى

شىن سۇيسە, ءتورت جىل كۇتەدى

سەنا جاعالاۋىندا ءوتىپ جاتقان وليم­پيا ويىندارى عۇسمان قىرعىزباەۆ ءۇشىن دە ءساتتى اياقتالدى. ول ءوزىنىڭ قاجىرلى ەڭبەگى مەن تاباندىلىعى ارقىلى جەڭىس تۇعىرىنا كوتەرىلدى. ايتپەسە, بۇل بالۋان­نىڭ ۇزاق جىلدار بويى ەلدوس سمەتوۆتىڭ كولەڭكەسىندە جۇرگەنىن جۇرت جاقسى بىلەدى. قوس قۇرداستىڭ ءوزارا تارتىسى ۇنەمى جام­بىل وبلىسى وكىلىنىڭ پايداسىنا شەشى­لەتىن. ەكەۋىنىڭ جولى 2019 جىلى توكيودا ۇيىمداستىرىلعان الەم چەمپيوناتىندا دا قيىستى. قولا مەدال ءۇشىن باسەكەدە قىرعىزباەۆ سمەتوۆكە تاعى دا ەسە جىبەردى. سول جىلى عۇسمان ءال-فۋدجايروداعى ازيا بىرىنشىلىگىندە ءۇشىنشى ورىنعا تابان تىرەدى.

الماتى قالاسىندا ەرمەك ناسەنوۆتىڭ قول استىندا جاتتىعاتىن دزيۋدوشى ءۇشىن 2021 جىل ءساتتى بولدى. بۋداپەشتتەگى دۇنيەجۇزىلىك دودادا ول كۇمىسپەن كۇپتەلدى. كەلەسى جىلى استاناداعى ازيا چەمپيوناتىندا ۇزدىك ۇشتىكتى تۇيىندەدى. سودان كەيىن عۇسمان 66 كگ سالماق دارەجەسىنە اۋىسۋدى قۇپ كوردى. بۇل شەشىمنىڭ دۇرىستىعىن پاريج وليمپياداسى دالەلدەدى. كەرەمەت كەزدەسۋلەر وتكىزگەن قازاق جىگىتى بۇل جارىس­تى قولا مەدالمەن قورىتىندىلادى.

جەڭىس تۇعىرىنا سىنىق سۇيەم قال­عان­دا سۇرىنگەن 48 كگ سالماقتاعى ءابيبا ابۋ­جاقىنوۆاعا دا ەش وكپە ايتا المايمىز. كەيىنگى كەزدەرى قانداي دۇرمەككە سالساڭ دا, تايسالماي كۇرەسىپ, ولجاعا كەنەل­گەن قازاقتىڭ قايسار قىزىنا بۇل جولى جاراقاتى كەدەرگى كەلتىردى. سول ساتسىزدىگى ءۇشىن ءابيبا جىلاپ تۇرىپ قازاقستان حالقىنان كەشى­رىم سۇرادى. نامىسشىل قىز ەندى لوس-اندجە­لەستە الاۋى تۇتاناتىن وليمپيا ويىندارىنا تىڭعىلىقتى دايارلانىپ, الىستاعى امە­­ريكادا بارشا الاش جۇرتىن قۋانتۋ ءۇشىن ەش ايانىپ قالمايتىنىن ايتتى. سول ماق­­سا­تىنا قول جەتكىزۋ جولىندا جەكە ءومى­رىن كەيىنگە ىسىرۋعا دايار ەكەنىن دە ءبىلدىردى.

«وسى وليمپيادادان كەيىن ءوزىمنىڭ ەكىن­شى جارتىمدى كەزدەستىرىپ, كۇيەۋگە شى­عا­مىن دەپ ويلاعان ەدىم. پاريجدەگى ساتسىز­دىك­تەن كەيىن ول رايىمنان قايتتىم. ەندى مەنى جاقسى كورەتىن جىگىت بولسا, ءتورت جىل كۇتۋىنە تۋرا كەلەدى. تالابىم – سونداي. مەن تەك لوس-اندجەلەستەگى جارىستان كەيىن عانا تۇرمىس قۇرامىن», دەپ اقتارىلا سويلەدى.

وكىنىشكە قاراي, وزگە جەرلەستەرىمىز تورتجىلدىقتىڭ باستى دوداسىنا دايار بولماي شىقتى. سەنىم ارتقان دانيار شامشاەۆ (73 كگ), ابىلايحان جۇبانازار (81 كگ), نۇرلىحان شارحان (100 كگ), ەسميگۇل كۋيۋلوۆا (63 كگ), كاميلا بەرلىقاش (+78 كگ) العاشقى اينالىمداردان اسا المادى.

تاريحتا قالعان تۇلعالار

پاريجدەگى دودادا ەلدوس سمەتوۆتەن باسقا دا بالۋاندار تاريحتا قالدى. بۇل اڭگىمە ەڭ ءبىرىنشى كەزەكتە وزبەكستانعا قاتىستى. نەگىزى وليمپيادا مەن الەم چەمپيوناتتارىندا دا ولار جۇلدەگە بىزدەن بۇرىن قول جەتكىزگەن. ناقتىلاپ ايتساق, وزبەكتىڭ ارمەن باگداساروۆى 1996 جىلى اتلانتاداعى ويىنداردا كۇمىس السا, قازاقتىڭ اسحات جيتكەەۆى ارادا 12 جىل وتكەننەن كەيىن بارىپ قانا 2008 جىلى بەيجىڭدە ءدال سول مەجەدەن كورىندى. دۇنيە­ج­ۇزىلىك دودانىڭ جۇلدەسىن فارحاد تۇراەۆ 1999 جىلى بيرمەنگەمدە يەلەنسە, 2001 جىلى ميۋنحەندە قوس اسحات – جيتكەەۆ پەن شاحاروۆ ۇزدىك ۇشتىكتى تۇيىن­دەدى. كەيىننەن بۇل مەملەكەتتەن ريشود سوبيروۆ (وليمپيادانىڭ ءۇش دۇركىن قولا جۇلدەگەرى), ابدۋللو تەڭگريەۆ (كۇمىس), ديوربەك ۋروزبوەۆ (قولا) جانە داۆلات بوبونوۆ (قولا) سىندى بەلدى بالۋان­دار شىعىپ, اتالعان جارىستىڭ بيىگىنەن كورىندى.

دەسەك تە وليمپيادا چەمپيو­نى بولۋ باقىتى جوعارىدا ەسىمدەرى اتال­عان جىگىتتەرگە ەمەس, ت ۇلىمداي عانا سامارقاننىڭ سۇلۋىنا بۇيىردى. 52 كگ سالماق دارەجەسىندە ونەر كورسەتكەن ديورا كەلديوروۆا فرانتسيانىڭ باس شاھارىندا قارسى كەلگەندەردى قوعاداي جاپىرىپ, التىننان القا تاقتى. 26 جاستاعى سپورتشى بەس جىلدان اسا ۋاقىت بويى ادام بالاسىنا بەت قاراتپاعان جاپونيالىق ۋتا ابە (توكيو وليمپياداسىنىڭ جەڭىم­پازى, الەمنىڭ ءتورت دۇركىن چەمپيونى), گەرمانيالىق ماشا بالحاۋس (الەم مەن ەۋروپا چەمپيوناتىنىڭ قولا جۇلدەگەرى), فرانتسيالىق اماندين بيۋشار (توكيو وليمپياداسىنىڭ ءفيناليسى, الەم چەمپيو­ناتىنىڭ بەس دۇركىن قولا جۇلدەگەرى, ەۋروپا­نىڭ ءۇش دۇركىن چەمپيونى جانە ەكى دۇركىن كۇمىس جۇلدەگەرى) جانە كوسوۆولىق ديستريا كراسنيچي (توكيو وليمپياداسىنىڭ جەڭىم­پازى, الەم چەمپيوناتىنىڭ ەكى دۇركىن قولا جۇل­دەگەرى, ەۋروپانىڭ ەكى دۇركىن چەمپيو­نى جانە ءتورت دۇركىن جۇلدەگەرى) سىندى جۇلدىز­دارىڭ تاس-تالقانىن شىعاردى. سول سەكىلدى 28 جاستاعى كريستا دەگۋچي (57 كگ) كانا­داعا, 29 جاستاعى باربارا ماتيچ (70 كگ) حورۆاتياعا وليمپيا ويىندارىنىڭ العاش­قى التىنىن سىيعا تارتتى. وعان دەيىن ەكەۋى دە دۇنيەجۇزىلىك دودادا ەكى رەتتەن دارا شىقتى.

مولدوۆا, شۆەتسيا جانە مەكسيكانىڭ دزيۋدوشىلارى ءوز تاريحىندا تۇڭعىش رەت وليمپيادانىڭ جۇلدەسىن ولجالادى. ­28 جاستاعى دەنيس ۆيەرۋ (66 كگ) مەن 24 جاستاعى اديل وسمانوۆ (73 كگ) نەبارى 2,5 ميلليوننان اسا حالقى بار مولدوۆانىڭ مەرەيىن ۇستەم ەتىپ, قولاعا قول سوزدى. تايسالماي كۇرەسەتىن 18 جاستاعى تارا بابۋلفات (48 كگ) ءۇشىنشى ورىنعا تابان تىرەپ, شۆەتسيا جانكۇيەرلەرىن شاتتىققا بولەدى. اتستەكتەر ەلىنىڭ ابىرويىن پريسكا اۆيتي الكاراس (63 كگ) اسپانداتتى. انگليادا تۋىپ-ءوسىپ, كەيىننەن مەكسيكاعا قونىس اۋدارعان ول كۇمىسپەن كۇپتەلدى.

تەڭدەسسىز تەددي

فرانتسيادا دزيۋدو كۇرەسىنىڭ باي ءداستۇرى بار. ءدۇبىرلى دودالاردا جەڭىپ العان جۇلدەلەرى سانى جاعىنان ولار جاپونيادان عانا قالىپ كەلەدى. باسقا ەلدەردىڭ بارلىعىنان كوشى ىلگەرى. سولاي بولا تۇرا ولار پاريجدە التى كۇن بويى التىنعا قول جەتكىزە المادى. ءوز ەلىندە, ءوز جەرىندە, ءوز كورەرمەندەرىنىڭ كوز الدىندا ءوتىپ جاتقان جارىستا فرانتسۋزدار تەك كۇمىس پەن قولانى قاناعات تۇتىپ كەلدى. تىپتەن اتاقتارى الىسقا جايىلعان لۋكا محەيدزە (60 كگ), ۆاليد حيار (66 كگ), شيرين بۋكلي (48 كگ), اماندين بيۋشار (52 كگ), سارا-لەوني سيزيك (57 كگ), كلاريسس اگبەنەنۋ (63 كگ), ماري-ەۆ گايە (70 كگ), ودري چيومەوت (78 كگ) جانە رومانا ديككونىڭ (+78 كگ) وزدەرى جەڭىس تۇعىرىنىڭ ەڭ بيىك ساتىسىنا كوتەرىلە المادى. ناتيجەسىندە, مەدالدار سانى بويىنشا بارلىق باسەكەلەسىنەن وزعانىمەن, باس جۇلدەنىڭ ازدىعىنان جالپى ەسەپتە توپ-10 كوماندانىڭ ساناتىنا دا قوسىلا المادى. جەرلەستەرىنىڭ جارقىن جەڭىسىنە ابدەن بويى ۇيرەنىپ قالعان جەرگىلىكتى جانكۇيەرلەردى بۇل جاعداي قاناعاتتاندىرمادى.

جارىستىڭ سوڭعى كۇنى تەددي رينەر تاتاميگە شىقتى. 35 جاستاعى گۆادەلۋپا وڭىرىندە ورنالاسقان پۋەنت-ا-پيتر قالاسىنىڭ تۋماسى ءۇشىن بۇل بەسىنشى وليمپيا ويىندارى ەدى. اسا اۋىر سالماقتا ايقاسقان ول 2012 جىلى لوندون, 2016 جىلى ريو-دە-جانەيروداعى دودالاردا قارسىلاس شاق كەلتىرمەدى. 2008 جىلى بەيجىڭ مەن 2020 جىلى توكيودا قولا مەدالدى قاناعات تۇتتى. 2007-2023 جىلدار ارالىعىندا 11 رەت الەم, 5 رەت ەۋروپا چەمپيونى اتاندى. وعان كوماندالىق سايىستاعى تولىپ جاتقان جۇلدەلەرىن قوسىڭىز. ءبىر عاجابى, 2010-2020 جىلدار ارالىعىندا ول قاتارىنان 154 جەكپە-جەكتە جەڭىسكە جەتىپ, جەر-جاھاندى تامساندىردى. فرانتسۋز حالقىنىڭ ونى جاقسى كورەتىنى سونشالىق, بويى 204 سم, سالماعى 140 كگ-دان اساتىن الىپتى ءالى كۇنگە دەيىن «قونجىق» دەپ ەركەلەتەدى.

سول «قونجىق» پاريجدە باس جۇلدەنى قانجىعاسىنا بايلادى. وسىلايشا, ول وليمپيادانىڭ ءۇش دۇركىن چەمپيونى اتاندى. كەرەمەت كورسەتكىش! تەددي رينەرگە دەيىن ءوليمپتىڭ التىن تۇعىرىنا جەر-جاھانداعى تەك ءبىر عانا دزيۋدوشى ءۇش رەت كوتەرىلدى. ول – داڭقتى تاداحيرو نومۋرا. اسا جەڭىل سالماقتا كۇش سىناسقان جاپونيانىڭ جۇلدىزى 1996 جىلى اتلانتادا, 2000 جىلى سيدنەيدە, 2004 جىلى افينىدا الدىنا جان سالمادى. مىنە, سول نوكامۋرانىڭ ەرلىگىن رينەر قايتالادى. سونىمەن قاتار تەدديدىڭ تاداحيرودان ەكى قولا مەدالى ارتىق ەكەنىن دە ايتا كەتكەن ابزال. داڭقتى دزيۋدوشى ارالاس كوماندالىق سايىستا وليمپيادانىڭ تاعى ەكى التىنىن ولجالادى. بارلىعى – 7 جۇلدە. ءسويتىپ, «قونجىقتىڭ» ارقاسىندا فرانتسيانىڭ ۇلتتىق قۇراماسى كوماندالىق سايىستا بىردەن ەكىنشى ورىنعا كوتەرىلدى.

جۇلدىزدار دا جىلايدى

جاپونياعا قاراستى حونسيۋ ارالى­عىنداعى كوبە پورتىنىڭ تۋمالارى حيفۋمي مەن ۋتا ابەنىڭ ەسىمدەرى جانكۇيەرلەرگە جاقسى تانىس. كۇنى كەشەگىگە دەيىن ەكەۋىنىڭ قول جەتكىزگەن تابىستارى بىردەي ەدى. 26 جاستاعى حيفۋمي مەن 24 جاستاعى ابە توكيودا الاۋى تۇتانعان وليمپيا ويىندارىنىڭ التىن تۇعىرىندا قاتار تۇردى. الەم چەمپيوناتىن ولار ءتورت رەتتەن ۇتتى. بىراق پاريجدە جەڭىسپەن ورىلگەن وتباسىلىق ءداستۇر ءۇزىلدى. بەس جىلدان اسا ۋاقىت بويى جاۋىرىنى جەرگە تيمەك تۇرماق, ەشكىمگە ۇپاي سانىمەن دە ۇتىلماعان ۋتا جەڭىلىستىڭ كەرمەك ءدامىن تاتتى. ونى توقتاتقان – ديورا كەلديوروۆا. ەكى رەت ازيا چەمپيونى اتانىپ, ەكى رەت الەم چەمپيوناتىنىڭ فينالىندا كۇرەسكەن وزبەكستاننىڭ ماقتان تۇتار بالۋانى داڭقتى قارسىلاسىن «يپپونعا» ءتۇسىردى. الدىندا ءوزى «ۆازاريمەن» ۇتىلىپ جاتقان. سول كەزدە جاپون قىزىنىڭ ەڭكىلدەپ جىلاعان داۋسى «گران-پالە-ارەنانى» جاڭعىرتتى. جاپونيا قۇراماسىنىڭ باس باپكەرى كاتسۋيۋكي ماسۋچيگە داڭقتى دزيۋدوشىنى جۇباتا الماي الەك بولدى. بۇل كورىنىستى «گران-پالە-ەفەمەردەگى» سان مىڭ كورەرمەننەن بولەك, كوگىلدىر ەكرانعا كوز تىككەن ميلليونداعان ادام كوردى.

ءدال سول كۇنى كورشى تاتاميدە حيفۋمي ابە دە ايقاسىپ جاتتى. قارىنداسى­نىڭ ساتسىزدىگى اعاسىنا اسا اۋىر تيگەنى سونشالىق, ول ءار كەزدەسۋگە قارسىلاستارىن ج ۇلىپ جەيتىندەي كوزى قانتالاپ شىقتى. ماجارستاندىق بەنتسە پونگراتس (ەۋروپا چەم­­پيوناتىنىڭ قولا جۇلدەگەرى) پەن تاجىك ەمومالي ءنۇرالى (جاستار اراسىنداعى الەم چەمپيونى) ونىڭ جاعاسىنان ۇستاپ تا ۇلگەرمەدى. ەكەۋى دە ساناۋلى مينۋتتا جەر قۇشىپ جاتتى. جارتىلاي فينالدا دۇنيەجۇزىلىك رەيتينگ كوشباسشىسى دەنيس ۆيەرۋدى دە (الەم چەمپيوناتىنىڭ ەكى دۇركىن قولا جۇلدەگەرى, ەۋروپا چەمپيونى) ءارى-بەرى سىلكىپ, ابدەن سىلىكپەسىن شىعاردى. اقىرى مولدوۆانىڭ ماقتانىشى دا جەڭىلگەنىن مو­يىندادى. فينالدا برازيليالىق ۆيلليان ليمادا (پانامەريكا ويىندارىنىڭ ەكى دۇركىن جۇلدەگەرى, ءۇش دۇركىن چەمپيونى) كۇنشىعىس ەلى وكىلىنىڭ وڭاي ولجاسىنا اينالدى. ەكى دۇركىن وليمپيادا چەمپيونى اتانسا دا, حيفۋمي ابە ەموتسياسىن سىرتقا شىعارمادى. تىپتەن جىميعان دا جوق. ول ءوزىنىڭ جەڭىسىنە قۋانباي, قارىنداسىنىڭ جەڭىلىسىنە كۇيىندى.

جارىستىڭ سوڭعى كۇنى ارالاس كومان­دالىق سايىس ءوتتى. جارىستىڭ فينالىندا جاپونيا قۇراماسى فرانتسيادان 3:4 ەسەبىمەن جەڭىلدى. تارتىستى وتكەن باسەكەلەردىڭ بىرىندە حيفۋمە ابە جوان-بەنجامين گابەگە ەسە جىبەردى. سول كەزدە جۇيكەسى تەمىردەي جىگىت تە كوز جاسىنا ەرىك بەردى. ءسويتىپ, پاريج وليمپياداسى اتاقتى ابەلەردىڭ ەكەۋىن دە جىلاتتى.

81 كگ سالماقتا بەلدەسكەن ناكامۋرا ناگاسە دە قاتارىنان ەكىنشى وليمپيادادا باس جۇلدەنى قانجىعاسىنا بايلادى. توكيودا ول سايد موللاەيدى ۇتسا, پاريجدە تاتو گريگاشۆيليدى تىزە بۇكتىردى. سول سەكىلدى 90 كگ سالماقتا سايىسقا تۇسكەن لاشا بەكاۋري دە تورتجىلدىقتىڭ باستى جارىسىندا ەكىنشى مارتە التىن تۇعىرعا كوتەرىلدى.

تاتاميدە – 12 گرۋزين

ءدۇبىرلى دودا بارىسىندا ازەربايجان­نىڭ دزيۋدوشىسى حيدايات گەيداروۆتىڭ ­(73 كگ) اسقان شەبەرلىگىنە ءتانتى بولدىق. قارا­عاندىدا دۇنيەگە كەلگەن ول بيىلدىڭ وزىندە ءۇش بىردەي بايراقتى باسەكەدە باس جۇلدە ولجا­لادى. ناۋرىزدا زاگرەبتە – ەۋروپا, مامىر­دا ءابۋ-دابيدە – الەم, شىلدەدە پا­ريج­دە وليمپيادا چەمپيونى اتاندى. تاعى ءبىر ازەربايجاندىق زەليم كوتسوەۆ 90 كگ سالماقتا بارلىق قارسىلاسىن قاپى قال­دىر­دى. تۇرمىسى تۇزەلمەي تۇر­سا دا, تاجىك­ستان بالۋاندارىنىڭ تابان­دى­لىعى ءتانتى ەتتى. پامير تاۋى ەتەگىنەن كەل­گەن سامون ماحامادبەكوۆ (81 كگ) پەن تەمۋر راحيموۆ (+100 كگ) قولا مەدالدى موي­نىنا ءىلدى.

گرۋزيا – قاپ تاۋى بوكتەرىندە ورنالاسقان شاعىن عانا مەملەكەت. بار-جوعى 3,7 ميل­ليون حالقى بار. سوعان قاراماستان دزيۋدو ونەرىن ولار كەرەمەت دارەجەگە كوتەرگەن. اتالعان ەلدىڭ ۇلتتىق قۇراماسى پاريجدە ءۇش جۇلدە ولجالادى: لاشا بەكاۋري (90 كگ) التىن السا, تاتو گريگالاشۆيلي (81 كگ) مەن يليا سۋلامانيدزە (100 كگ) فينالدا عانا ۇتىلدى. وعان فرانتسياعا كۇمىس مەدالدى سىيعا تارتقان لۋكا محەيدزەنى (60 كگ) قوسىڭىز. گەورگي ساردالاشۆيلي (60 كگ), ۆاشا مارگەلاشۆيلي (66 كگ), لاشا شاۆدا­تۋاشۆيلي (73 كگ) جانە گۋرام تۋشيشۆيلي (+100 كگ) دە عالامدىق دودادا كۇش سىناستى. جۇلدە الماسا دا, ولار­دىڭ ونەرى جاقسى اسەر قالدىردى. تەك ءتۋشيش­ۆيليدىڭ توبەلەس شىعارعانى بولماسا. سونى­مەن قاتار سول ۇلتتىڭ تاعى بىرنەشە بالۋانى وزگە مەملەكەتتەردىڭ تۋى استىندا ونەر كور­سەتتى. ولار – نۋگزاري تاتالاشۆيلي (81 كگ, ءباا), تريستاني موساحليشۆيلي (90 كگ, يسپا­نيا), نيكولاز شەرازاديشۆيلي (100 كگ, يسپا­نيا), ۋشانگي كوكاۋري (+100 كگ, ازەر­باي­جان). سوندا ءبىر عانا وليمپيادادا گرۋ­زيا­نىڭ 12 بالۋانى بوزكىلەمدە بەلدەسكەن ەكەن.

جالپى, گرۋزيا قۇراماسىنىڭ بۇل كورسەتكىشى اسا ءبىر تاڭدانىس تۋدىرعان جوق. ويتكەنى قاپ تاۋىنىڭ قىراندارى قاي كەزدە دە مىقتى بولعانىن كوزىقاراقتى جانكۇيەرلەر جاقسى بىلەدى. ستاتيستيكاعا جۇگىنسەك, كەزىندە دزيۋدودان كسرو قۇراماسى وليمپيا ويىندارىندا 27 (7 التىن+5 كۇمىس+15 قولا) جۇلدە العان ەكەن. سونىڭ تەڭ جارتىسىنا جۋىعى – اتالعان رەسپۋبليكا وكىلدەرىنىڭ ەنشىسىندە. انىقتاپ ايتساق, كەڭەس وداعىنا بۇيىرعان 27 جۇلدەنىڭ 11-ءى (3+2+6) – گرۋزيندەردىڭ ەنشىسىندە. سوناۋ 1964 جىلى دزيۋدو وليمپيادا باعدارلاماسىنا العاش رەت ەنگەن تۇستا توكيودا پارناوز چيكۆيلادزە مەن انزور كيكنادزە قولا جۇلدەنى قورجىنعا سالدى. 1972 جىلى ميۋن­حەندە شوتا چوچيشۆيلي التىن مەدالدى موينىندا جارقىراتتى. وسى­لايشا, كا­حە­تيا ءوڭىرىنىڭ تۋماسىنىڭ ارقا­سىندا جاپون كۇرەسىمەن شۇعىلداناتىن وداق بالۋان­دارى تورتجىلدىقتىڭ باستى جارى­سىندا تۇڭعىش رەت چەمپيوندىق اتاققا قول جەت­كىزدى. تاۋەلسىزدىك العاننان كەيىن گرۋزيا اتالعان ءدۇبىرلى دودادا 15 (5+7+3) جۇلدە ولجالادى.

سۋلامانيدزە بيىكتە, ال بەكارىس قايدا؟

گرۋزيادا يليا سۋلامانيدزە دەگەن مىقتى بالۋان بار. جاسى – 23-تە. 2018 جىلى ول بۋەنوس-ايرەستە وتكەن جاسوسپىرىمدەردىڭ دۇنيەجۇزىلىك وليمپياداسىندا كۇمىس مەدال يەلەندى. فينالدا جاۋىرىنى قاقپاقتاي سۋلامانيدزە قازاقتىڭ ۇلى بەكارىس سادۋاقاستان وڭباي ۇتىلدى. سودان كەيىنگى التى جىل ۋاقىت ارالىعىندا ول جاسوسپىرىمدەر مەن جاستار اراسىنداعى الەم جانە قۇرلىق بىرىنشىلىگىنىڭ جەڭىمپازى اتاندى. ەرەسەكتەر دۋىنا دا ەركىن قوسىلىپ, 100 كگ سالماقتا گرۋزيانىڭ باس بالۋانى اتاندى. 2021 جىلى الەم چەمپيوناتىندا كۇمىس­پەن كۇپتەلسە, 2023 پەن 2024 جىلدارى ەۋروپا چەمپيوناتىندا كۇمىس مەدالدى  ­ولجالادى. بىرەر ۋاقىت دۇنيەجۇزىلىك رەيتينگتە كوش باستاعان گرۋزيالىق سپورتشى قازىرگى كەزدە ۇزدىكتەر تىزىمىندە ەكىنشى ورىندا تۇر. مىنە, ەندى يليا پاريج وليمپياداسىنىڭ كۇمىس مەدالىن موينىندا جارقىراتتى.

ال سول يليا سۋلمانيدزەگە سان سوق­تىر­عان ءبىزدىڭ بەكارىس سادۋاقاس قايدا؟ ءيا, ءاۋ باستا ونىڭ ۇلتتىق قۇراما ساپىنا ىلىگىپ, بىرەن-ساران حالىقارالىق جا­رىس­­تاردا جۇلدە الىپ جۇرگەنى راس. سو­دان كەيىن مۇلدەم كورىنبەي كەتتى. كەيىن بىلدىك, رەسپۋبليكامىزدىڭ باس كومانداسى قاتا­رىنا قوسىلا الماي, ۇلكەن سپورتتان قول ۇزگەن ەكەن. اۋزىمىزعا «اتتەگەن-اي!» دەگەن­­نەن باسقا ءسوز تۇسپەدى. قانداي دا­رىن­دى, الىمدى ءارى قارىمدى بالۋان ەدى. قورقۋدى, قايمىعۋدى, تارتىنۋدى, جاس­قا­نۋدى بىلمەيتىن ناعىز «سەن تۇر, مەن اتايىن­نىڭ» ناق ءوزى.

اقىرى بۇل جىگىتتى ءبىزدىڭ ماماندار وسىرگەننىڭ ورنىنا ءوشىردى. وعان كىم كىنالى؟ باپكەرلەردىڭ بىلىمسىزدىگى مە, الدە ۇلتتىق فەدەراتسيانى باسقارىپ وتىرعان باسشىلاردىڭ نەمقۇرايدىلىعى ما؟ شىن تالانتتىڭ شىڭدالا تۇسۋىنە ولار مۇمكىندىك بەرمەدى. قولايلى جاعداي جاسامادى. ءيا, بەكارىس كولدەنەڭ كوك اتتىلاردىڭ ءبىرى ەمەس ەدى. ونىڭ بويىندا بولاشاق وليمپيادا جانە الەم چەمپيوناتتارىنا ءتان قاسيەتتىڭ بارلىعى دا بولدى. بىراق ماقساتىنا جەتە الماعان قانداسىمىز قازىرگى كەزدە كۇيبەڭ تىرشىلىك كەشىپ جاتىر. ال سۋلامانيدزە بۇگىنگى تاڭدا گرۋزيانىڭ ۇلتتىق باتىرىنا اينالدى.

جاپونيا وزدى, قازاقستان – جەتىنشى ورىندا

پاريج وليمپياداسىنىڭ جالپى­كوماندالىق ەسەبىندە جاپونيا وزدى. كۇنشىعىس ەلىنىڭ وكىلدەرى 8 (3 التىن+2 كۇمىس+3 قولا) جۇلدە ولجالادى. فرانتسيا – ەكىنشى ورىندا. تاتامي قوجايىندارى 10 (2+2+6) مەدالدى يەلەندى. كورشىلەس جاتقان قوس ەل – ازەربايجان (2+0+0) مەن گرۋزيا (1+2+0) ءۇشىنشى جانە ءتورتىنشى ورىنداردى ءوزارا ءبولىستى. بەسىنشى جانە التىنشى ساتىلارعا برازيليا (1+1+2) مەن وزبەكستان (1+0+2) جايعاستى. قازاقستان (1+0+1) التىنشى ورىنعا تابان تىرەدى. بىزدەن كەيىنگى ساتىلارعا كانادا (1+0+1), حورۆاتيا (1+0+0), سلوۆەنيا (1+0+0), يتاليا (1+0+0) جايعاستى. مىنە, پاريجدە وسى مەملەكەتتەردىڭ عانا ءانۇرانى شىرقالدى. سونداي-اق تاعى ­15 ەلدىڭ تۋى كوكتە جەلبىرەدى.