ەڭبەكتىڭ ەبىن تاپقان

دەگەنمەن ايتايىن دە­گەنىمىز ول ەمەس. وسىن­داي قيىندىققا قارا­ماستان ءىستىڭ رەتىن تاۋىپ, ارە­كەت ەتىپ جاتقان ەرلەر دە بار. كوك­تەن تۇسەر جاۋىنعا, جەردەن ونەر شوپكە عانا تاۋەلدى بولۋدىڭ كۇنى وتكەن ەكەن. زاماناۋي تەحنولوگيانى قولدانىپ, شارۋاسىن رەتتەپ جاتقان اۋىل كاسىپ­كەرلەرىنىڭ مىسالى سونى كورسەتتى.

قازتالوۆ اۋدانىنىڭ اقپا­تەر اۋىلدىق وكرۋگىندە «ەرقو­جا» اتتى شارۋا قوجالىعى بار. ونىڭ جەتەكشىسى – وڭىرگە بەل­گىلى كاسىپكەر, اۋىل جاناشىرى, باتىس قازاقستان وبلىستىق ءماس­ليحاتىنىڭ دەپۋتاتى سامات حا­سانوۆ. ەڭبەك جولىن تۋعان اۋ­لىن­دا قاراپايىم جۇمىسشى بولىپ باستاعان ازامات كەيىن ەلەكتر ەنەرگەتيكاسى سالاسىن­دا جوعارى ءبىلىم العان ەدى. ىزدە­­نىمپاز كاسىپكەر اۋىلداعى اعايىن­نىڭ اۋزىن اققا, قولىن باق­قا جەتكىزەتىن جوعارى تەحنولوگيا تۋ­رالى كوپتەن ويلاپ ءجۇرىپتى.

ء«بىزدىڭ وڭىردە 2019–2020 جىلدارى دا ەرەكشە قۋاڭشىلىق بولدى. ءتورت ت ۇلىك مالىمىزعا ءشوپ تاپپاي تەنتىرەپ كەتتىك. اۋىلدىڭ اينالاسى اق تاقىرعا اينالدى. امالسىز سوناۋ شالعايداعى شىڭعىرلاۋ, كورشىلەس تاسقالا اۋداندارىنان ءشوپ شاۋىپ, تاسىدىق. ويلانا كەلە, ەكپە ءشوپ ەگۋگە بەل بۋدىق», دەيدى سامات حامزا ۇلى.

فەرمەر كوپ ىزدەندى. ارىپتەس­تەرىمەن اقىلداستى. اقىرى تۇرىك ەلىنىڭ تاجىريبەسىنە توقتادى. ءسويتىپ, 2021 جىلى جاڭبىرلاتىپ سۋاراتىن ارنايى تەحنيكانى الۋعا تۇركيا كومپانياسىمەن كەلىسىمشارت جاساستى. 2022 جىلى قازتالوۆ نەسيە سەرىكتەستىگى ارقىلى ساتىپ الىنعان «PIVOT» ماركالى جاڭبىرلاتىپ سۋارعىش اگرەگاتى تولىق قۇرالىپ, بىلتىر كوكتەمدە ىسكە قوسىلدى. ارينە, مۇنىڭ ءبارى ايتۋعا عانا وڭاي عوي. ماسەلەن, وسى قۇرىلعىنىڭ جالپى قاراجاتى 146 ملن تەڭگە بولىپتى. ونىڭ ىشىندە 1 شاقىرىم ەلەكتر جەلىسى, سۋ جۇرەتىن قۇبىرلارى بار. جاڭبىرلاتىپ سۋاراتىن ءبىر اگرەگاتتىڭ ءوزى 40 ملن تەڭگە تۇرادى. ول اينالدىرا 500 مەتر­گە دەيىن القاپقا جاڭبىرلاتا سۋ شاشا الادى. «ەرقوجا» وسىنداي اگرەگاتتىڭ ەكەۋىن ءبىر-اق العان.

«بىلتىر تىم ءتاۋىر ءونىم الامىز با دەپ ويلادىق. بىراق كيىك ەسەپسىز كوبەيىپ كەتتى عوي. ەگىستىك ەككەن اۋماقتى «ەلەكتر باقتاشى» دەپ اتالاتىن سىممەن قورشاعانبىز. اقبوكەن ونى بۇيىم كورمەيدى ەكەن. قورشاۋدى كەز كەلگەن جەرىنەن بىتىرلاتىپ ءۇزىپ, ەگىستى تاپتاپ كەتتى. بيىل سونى ەسكەرىپ, ەگىستىككە ارنالعان 250 گەكتار جەردى 7 شاقىرىم ارنايى تورمەن قورشاپ, ءار 5 مەتر سايىن باعانا قويدىق. توردى الماتى قالاسىنان تاپسىرىسپەن الدىردىق», دەيدى سامات حاسانوۆ.

ءيا, 2023 جىلى اقبوكەننىڭ تىم كوبەيىپ كەتۋى سالدارىنان باتىسقازاقستاندىق ءبىراز شار­ۋا قوجالىعى قاتتى زارداپ شەكتى. سونىڭ ىشىندە قازتالوۆتىق سامات حاسانوۆتىڭ «ەرقوجا» شارۋا قوجالىعىندا 160 گەكتار, باۋىرجان مۇحانعاليەۆ باس­­قاراتىن «اسحات» شارۋا قو­جا­لىعىندا 55 گەكتار ەك­پە ءشوپ القابى پايداسىز بول­دى. مەم­لەكەت تاراپىنان وتەم­اقى سۇراپ, قانشا قاعاز تول­تىرعانىمەن, ناتيجە شىقپادى بيىل «ەرقو­جا» شارۋا قوجالىعى 160 گەكتار جەرگە كوپجىلدىق سۋدان ءشوبىن ەگىپتى. قۇدايعا شۇكىر, ەتكەن ەڭبەكتىڭ, توككەن تەردىڭ ناتيجەسى جامان ەمەس. شىلدەنىڭ العاشقى كۇنىنەن باستاپ شالعىنعا وراق ءتۇستى. بۇيىرسا, قارا كۇزگە دەيىن ەكى, ءتىپتى ءۇش مارتە ءونىم الساق دەپ ۇمىتتەنەدى كاسىپكەر.

بۇگىندە شابىندىق القابىن­دا 2 كومباين, ءشوپ تايلاعىش 2 تراك­تور – بارلىعى 5 ادام قىزۋ جۇمىستا ءجۇر ەكەن. بۇل ىسكە كاسىپ­كەردىڭ ۇلدارى دا جۇمىلىپ, ەگىستىكتى سۋارۋ, تەحنيكالاردى ۋاق­تىلى قاراۋمەن اينالىسادى. سامات حامزا ۇلى مال ازىعىن دايىنداۋ ءىسى جىل بويى جۇرەتىنىن اي­تادى. ويتكەنى بيىلعى وراق ماۋ­سىمى اياقتالعان سوڭ كەلەر جىل­عا دايىندىق باستالادى. القاپ قايتا جىرتىلىپ, الداعى جىل­دىڭ كوكتەمىنە دايىندالادى.

ء«بىز اكەمىزگە كومەكتەسەمىز. ەكپە ءشوپ ەگۋ وڭاي كورىنگەنىمەن, ونىڭ دا ابىگەرى جەتىپ ارتىلادى. ەگىنگە كيىك قانا ەمەس, دالادا جۇرگەن ءتورت ت ۇلىك مال دا قۇمار. كوكتەمنەن بەرى قىز­عىشتاي قورىپ جۇرگەن القاپقا شالعى سالىپ, ەڭبەكتىڭ ناتيجەسىن ەندى كورىپ جاتىرمىز», دەيدى كاسىپكەردىڭ ورتانشى ۇلى بەك­سۇلتان سامات ۇلى.

ارينە, جوعارىدا ايتقان­داي, اۋىلداعى اعايىننىڭ ءازىر شەشىل­مەي تۇرعان تۇيتكىلدەرى دە بارشىلىق. مىسالى, باتىس قازاقستان وبلىسىندا ەلەكتر جەلىلەرى توزىپ تۇر. ءسال جەل تۇرسا, جارىق وشەدى. بۇل «ەرقوجا­نىڭ» جاڭبىرلاتقىش اگرەگات­تارىنا دا كەدەرگى. «كۇننىڭ ىستىعىن, ەلەكتر جارىعى­نىڭ ءجيى ءسونۋىن ەسكەرىپ, ەگىستىكتى تۇندە سۋارىپ جۇردىك. بولاشاقتا ەلەكتر جەلىلەرى مەن باعانالار جوندەلىپ, اۋىستىرىلسا» دەگەن تىلەگىن دە ايتىپ قالدى سامات حاسانوۆ. ەل ىشىندە ادال ەڭبەگىنىڭ جەمىسىن جەپ جۇرگەن ازاماتقا تابىس تىلەيمىز.

باتىس قازاقستان وبلىسى