باتىس قازاقستان وبلىسى كوكتەمدە ءبىر ايدان استام ۋاقىت سۋ تاسقىنىنىڭ قورقىنىشىمەن ءومىر ءسۇردى. ەل باسىنا كۇن تۋعان وسىناۋ سىن ساعاتتا وتان قورعاۋشى ەر ازاماتتار, شىن مانىندە, ەتىگىمەن سۋ كەشىپ ءجۇردى. «وت پەن سۋ – ءتىلسىز جاۋ» دەگەن عوي حالقىمىز. تابيعات اپاتى كەزىندە حالىق ءبىر جاعادان باس, ءبىر جەڭنەن قول شىعارىپ قىزمەت ەتتى.
مەملەكەتتىك قۇرىلىمدار دا, قاراپايىم تۇرعىندار دا قامشىنىڭ ورىمىندەي بىرىگىپ, قويان-قولتىق جۇمىس ىستەدى. اسىرەسە قازاقستاننىڭ 11 وبلىسىنان, 3 قالادان كەلگەن اسكەري قىزمەتشىلەر ەڭ قيىن جەردە, سۋ تاسقىنىمەن بەتپە-بەت كەلگەن قاۋىپتى نىسانداردا ءجۇردى.
– ورال قالاسىندا ورنالاسقان ۇلتتىق ۇلاننىڭ «باتىس» وڭىرلىك قولباسشىلىعىنا قاراستى 5517 اسكەري ءبولىمىنىڭ جاۋىنگەرلەرى العاشقى كۇننەن-اق سۋ تاسقىنىنىڭ الدىن الۋعا كىرىستىك. جەكە قۇرام اۋەلى سۋ باسۋ قاۋپى جوعارى جەرلەردە ارنايى بوگەتتەر قۇرىپ, كوشەلەر مەن اۋلالاردا جينالىپ قالعان قاردى شىعارىپ, سۋدىڭ ءوز ارناسىمەن ءجۇرۋى ءۇشىن ارىقتاردى تازالادى. كەيىن تىكەلەي قۇتقارۋ جۇمىستارىمەن دە اينالىستىق, – دەيدى 5517 اسكەري ءبولىمىنىڭ باتالون كومانديرى, مايور جاسۇلان كورپەشوۆ.
وسىناۋ تاريحي كۇندەرى ەرەكشە ەرلىگىمەن كوزگە ءتۇسىپ, ادام ومىرىنە اراشا تۇسكەن ساربازدار دا بار.
ءساۋىردىڭ 21-ءى كۇنى ورال قالاسىنىڭ ىرگەسىندە, جايىق وزەنى جايىلماسىندا ورنالاسقان ساياجاي اۋماعىندا تاسقىن سۋ جاساندى بوگەتتى بۇزىپ ءوتتى. بىرنەشە كۇننەن بەرى سۋدى بوگەپ, قۇم سالىنعان قاپشىقتان قورعان تۇرعىزىپ جۇرگەن ساياجاي تۇرعىندارى كۇن ساناپ ەكپىنى كۇشەيگەن اعىن سۋعا قارسى تۇرا المادى. وقيعا ورنىندا جۇرگەن ۇلتتىق ۇلان جاۋىنگەرلەرى مەن پوليتسيا قىزمەتكەرلەرى حالىقتى قاۋىپسىز جەرگە كوشىرۋگە كىرىستى. وسى كەزدە قاتتى اعىس ءبىر ازاماتتى اعىزىپ الىپ كەتتى. دەرەۋ كومەككە ۇمتىلعان ۇلاندىقتار تىزبەكتەلە شىنجىر جاساپ, سۋعا كەتىپ بارا جاتقان 60 جاستاعى ساياجاي تۇرعىنىن امان الىپ شىقتى. قىسىلتاياڭ ساتتە ابىرجىماي, بىردەن العا ۇمتىلعان 5517 اسكەري ءبولىم قىزمەتكەرى, ەفرەيتور نۇربول اسقاپ پەن پوليتسيا قىزمەتكەرى, كىشى سەرجانت ءامىرجان بىرلەسوۆ بولاتىن.
نۇربول اسقاپ سۋ تاسقىنى كەزىندە ەرەكشە ەرلىگىمەن, ەڭبەگىمەن كوزگە تۇسكەن ازاماتتار قاتارىندا «جاۋىنگەرلىك ەرلىگى ءۇشىن» مەدالىمەن ماراپاتتالدى. ناگرادانى استانادا وتكەن سالتاناتتى جيىندا مەملەكەت باسشىسىنىڭ قولىنان الدى.
– پرەزيدەنت قاسىم-جومارت توقاەۆتىڭ قولىنان وسىنداي جوعارى ماراپات الىپ, قۇرمەتكە يە بولعانىما قاتتى قۋاندىم. تۇلا بويىمدى ماقتانىش پەن قۋانىش تەربەپ, وزىمە ءوزىم سەنە المادىم. ول ساتتەگى تولعانىستى سوزبەن ايتىپ جەتكىزۋ مۇمكىن ەمەس. بۇل مەدال مەن ءۇشىن ىستىق, ويتكەنى ۇلتتىق ۇلان قاتارىنداعى العاشقى ناگرادام, – دەيدى نۇربول جاۋىنگەر.
5517 اسكەري ءبولىمنىڭ تاعى ءبىر قىزمەتكەرى ماۋلەن مارلەنوۆ تە توپان سۋدىڭ ورتاسىندا قالىپ قويعان جۇك كولىگىن الىپ شىعىپ, 30-عا جۋىق ادامدى قۇتقاردى. ء«بىز №1-2 ساياجاي اۋماعىندا تۇرعىنداردى ەۆاكۋاتسيالاپ جۇرگەن ەدىك. ءبىر كەزدە سۋ ورتاسىندا قۇرىپ قالعان جۇك كولىگىن بايقادىم. ماشينا وتالماي, موتورى ءوشىپ قالىپتى. قورابىندا ادام تولى. سۋدىڭ اعىسى كۇشەيىپ, دوڭگەلەكتەن اسىپ بارا جاتتى. تەز ارادا ءوز كولىگىممەن بارىپ, تىركەپ, قاۋىپسىز جەرگە الىپ شىقتىم», دەيدى ماۋلەن.
ماۋلەن – الماتى وبلىسىنىڭ تۋماسى, ەڭبەكشىقازاق اۋدانى ورىكتى اۋلىندا دۇنيەگە كەلگەن. 2014 جىلى وتان الدىنداعى بورىشىن وتەۋ ءۇشىن اسكەرگە شاقىرىلىپ, ورال قالاسىنداعى ۇلتتىق ۇلاننىڭ 5517 اسكەري بولىمىنە تۇسكەن ەكەن. اقجايىق توپىراعى ماۋلەنگە قۇتتى قونىس بولدى. وسى اسكەري بولىمدە كەلىسىمشارت بويىنشا جۇمىسقا قالدى. 2019 جىلى جارى ماقپالمەن وتاۋ قۇردى. قازىر جاس شاڭىراقتا دامير ەسىمدى ۇل ءوسىپ كەلەدى.
«مەن ءوزىمنىڭ ءىس-ارەكەتىمدى ەشقانداي باتىلدىق نەمەسە ەرلىك دەپ ساناعان ەمەسپىن. ءبىز اسكەري قىزمەتكەرمىز عوي. كەز كەلگەن قيىن قىستاۋ ساتتە حالىقپەن بىرگە بولىپ, كومەككە ءازىر بولۋىمىز قاجەت. بۇل – مەنىڭ كۇندەلىكتى قىزمەتىم», دەيدى م.مارلەنوۆ.
– ءبىزدىڭ ءبولىمنىڭ ءاربىر قىزمەتكەرى, كەز كەلگەن جاۋىنگەر ءدال وسىلاي ايتاتىنىنا سەنەمىن. ويتكەنى ولار – شىن مانىندە, وتان قورعاۋشى ساربازدار. مەرەكە كۇنى ءبىز كومانديرلەرىمىزدىڭ قولىنان ماراپات الىپ تۇرىپ: «قازاقستان رەسپۋبليكاسىنا قىزمەت ەتەمىن!» دەپ سالتاناتتى تۇردە مالىمدەيمىز, – دەدى ۇلتتىق ۇلان «باتىس» وڭىرلىك قولباسشىلىعى ءباسپاسوز قىزمەتىنىڭ وكىلى, لەيتەنانت باقداۋلەت ماناربەك.
باتىس قازاقستان وبلىسى