كوكتەمگى سۋ تاسقىنى وڭىرلەردىڭ الەۋمەتتىك-ەكونوميكالىق دامۋىنا قالاي اسەر ەتتى؟ وبلىستا پرەزيدەنت تاپسىرمالارى قالاي ورىندالىپ جاتىر؟ وسى ورايدا باتىس قازاقستان وبلىسىنىڭ اكىمى ناريمان تورەعاليەۆ بىرنەشە ساۋالىمىزعا جاۋاپ بەردى.
– ناريمان تورەعالي ۇلى, بيىلعى سۋ تاسقىنى ەلىمىزدىڭ بىرنەشە ءوڭىرىن ابىگەرگە سالدى. ءتىلسىز جاۋدان زارداپ شەككەندەردىڭ قاتارىندا باتىس قازاقستان وبلىسى دا بار. جالپى, وبلىستا بولعان تابيعي اپاتتىڭ اۋقىمى قانداي بولدى؟ قانشا ءۇي سۋ استىندا قالدى؟
– «اپات ايتىپ كەلمەيدى» دەگەن راس قوي. باتىس قازاقستان وبلىسىندا سۋ تاسقىنى 27-28 ناۋرىز كۇندەرى باستالدى. وبلىسىمىزدىڭ 12 اۋدانىنىڭ ىشىندە 5 اۋدان – تەرەكتى, بايتەرەك, قاراتوبە, سىرىم, ءبورلى اۋداندارى جانە ورال قالاسىنىڭ ساياجاي اۋماعى سۋ تاسقىنىنان زارداپ شەكتى. العاش سۋ باسقان سىرىم, قاراتوبە اۋداندارىندا ەرىگەن قار سۋى توڭى جىبىمەگەن جەرگە سىڭبەي, جولىنداعى اۋىلداردى جايپاپ ءوتتى. ونىڭ ۇستىنە سول كۇندەرى وڭىردە جاۋىن-شاشىن دا قالىپتان ارتىق بولدى. وسىنىڭ ءبارى تاسقىنعا الىپ كەلدى.
قار سۋىنان بولەك, رەسەيدىڭ ساراتوۆ, ورىنبور وبلىستارىنداعى سۋقويمالارىنان سۋ كوپ جىبەرىلدى. سونىڭ سالدارىنان جايىق وزەنىندەگى سۋ دەڭگەيى ارتىپ, وزەن بويىندا ورنالاسقان 84 ەلدى مەكەندى سۋ باسۋ قاۋپى تۋدى. قاراڭىز, سول كۇندەرى ورىنبوردىڭ يرەكلى سۋقويماسىنان جايىق وزەنىنە سەكۋندىنا 3 مىڭ تەكشە مەتردەن اسا سۋ جىبەرىلگەن. بۇل كەيىنگى 30 جىل ىشىندە بولماعان جاعداي ەدى. وسىنىڭ سالدارىنان جايىقتاعى سۋ دەڭگەيى 8 مەتر 64 سم-گە جەتىپ, قاۋىپتى دەڭگەيدەن اسىپ كەتتى.
ەلىمىزدە بولعان كوكتەمگى سۋ تاسقىنى – كولەمى جاعىنان كەيىنگى 80 جىلداعى ەڭ ءىرى تابيعي اپات. مۇنى ماماندار دا ايتىپ وتىر. وسى اپات كەزىندە باتىس قازاقستان وبلىسىندا 1 491 تۇرعىن ءۇي, 10 500 ساياجاي تەلىمى سۋ استىندا قالدى. 2 مىڭنان اسا مال شىعىنى بولدى.
– سول كۇندەرى ءوزىڭىز دە, ءتيىستى سالا ماماندارى دا شىن مانىندە ەتىگىمەن سۋ كەشىپ جۇرگەنىن كوزىمىزبەن كوردىك. جەدەل شتاب توتەنشە جاعدايدا جۇمىس ىستەدى. ايتىڭىزشى, تاسقىنعا توسقىن قالاي بولدى؟ قانداي ءىس-شارالار قابىلداندى؟ قانشا تەحنيكا, قانشا ادام جۇمىلدى؟
– مەملەكەت باسشىسى قولداۋىنىڭ ارقاسىندا ءبىز سۋ تاسقىنىن ۋاقتىلى ەڭسەرە الدىق. اقجايىق ءوڭىرىن تابيعات اپاتىنان قۇتقارۋعا بۇكىل ەل جۇمىلدى. ەلىمىزدىڭ 14 وبلىسىنان اسكەريلەر, قۇتقارۋشىلار, ەرىكتىلەر, قاراپايىم تۇرعىندار كەلدى. ءسويتىپ, اۋقىمدى شىعىنعا جول بەرمەدى.
ۇكىمەت باسشىسى, ونىڭ ورىنباسارلارى تاسقىن كەزەڭىندە وڭىرىمىزگە بىرنەشە مارتە كەلىپ, دايىندىق بارىسىمەن تانىستى. قاجەتتى رەسۋرستى جىلدام تارتۋعا قولۇشىن سوزدى. وبلىسىمىزداعى سۋ تاسقىنىمەن كۇرەسكە 11 مىڭنان اسا ادام, 2 مىڭعا جۋىق تەحنيكا تارتىلدى. جايىق وزەنىنىڭ بويىندا
150 كم توپىراق بوگەت سالىندى. وسىنىڭ ناتيجەسىندە اۋىلدارعا سۋ كىرمەۋىن بارىنشا قامتاماسىز ەتتىك. 13 مىڭنان اسا ادام قاۋىپسىز جەرگە كوشىرىلدى. وسىلايشا, مەملەكەت باسشىسىنىڭ, ۇكىمەتتىڭ قولداۋى جانە حالىقتىڭ بىرلىگى ارقاسىندا جايىق وزەنى بويىندا ورنالاسقان ورال قالاسى مەن وبلىستاعى 84 ەلدى مەكەندى سۋ باسۋدان امان ساقتاپ قالدىق.
ءساۋىر ايىنىڭ باسىندا مەملەكەت باسشىسى سۋ تاسقىنى بولعان قاراتوبە اۋدانىنىڭ ورتالىعىنا كەلىپ, تاسقىننان زارداپ شەككەن قورجىن اۋلىنىڭ تۇرعىندارىمەن كەزدەستى. پرەزيدەنت سول ساپارىندا ءار تۇرعىن مەملەكەت تاراپىنان بەرىلەتىن كومەكتەن قالىس قالمايتىنىن اتاپ ءوتتى. قاسىم-جومارت كەمەل ۇلىنىڭ بۇل ءسوزى بارشا تۇرعىنعا جىگەر بەردى.
سۋ تاسقىنى بولعان قاراتوبە اۋدانىنىڭ قورجىن اۋلىنا بارعان كەزىم ءالى كوز الدىمدا. اۋىلدى تولىق سۋ باسىپ كەتكەن. 300-دەن اسا تۇرعىن اۋىل مەكتەبىنە ۋاقىتشا تۇراقتاعان. ىشىندە ەڭكەيگەن قاريادان ەڭبەكتەگەن بالاعا دەيىن بولدى. ولاردى قايىققا مىنگىزىپ, ءارى قاراي تىكۇشاقپەن ەۆاكۋاتسيالىق ورتالىقتارعا جەتكىزدىك.
سول كۇندەرى قاراپايىم تۇرعىندار ء«بىزدىڭ ەرتەڭگى كۇنىمىز نە بولادى؟ باسپانامىزدى قالاي قالپىنا كەلتىرەمىز؟ مەملەكەت تاراپىنان كومەك بولا ما؟» دەگەن ءۇمىت پەن كۇدىككە تولى ساۋالدى ءجيى قوياتىن. سول ۋاقىتتا پرەزيدەنتتىڭ قولداۋى قاراتوبە حالقىنا عانا ەمەس, تاسقىننان زارداپ شەككەن بارشا حالىققا دەمەۋ بولدى.
– تاسقىن ءوتتى, كەتتى. قازىر اپات زاردابىن جويۋ ءۇشىن قانداي جۇمىس اتقارىلىپ جاتىر؟ تۇرعىنداردىڭ مال-م ۇلىك شىعىنى وتەلدى مە؟
– جالپى, وبلىس بويىنشا 2 مىڭنان اسا مال شىعىنى بولعانىن ايتتىم عوي. وسىنىڭ ءبارى جەرگىلىكتى بيۋدجەت جانە دەمەۋشىلەر ەسەبىنەن تولىق وتەلدى. ماسەلەن, 1 171 مال شىعىنى جەرگىلىكتى قازىنادان بولىنگەن 151 ملن تەڭگەنىڭ ەسەبىنەن قالپىنا كەلسە, 1 286 مالدىڭ ورنىن دەمەۋشىلەر تولتىردى.
ال 100 ايلىق ەسەپتىك كورسەتكىش مولشەرىندە بىرجولعى الەۋمەتتىك كومەكتى 9 994 وتباسى الدى. بۇعان 3,7 ملرد تەڭگە جۇمسالدى. تاسقىن كەزىندە ب ۇلىنگەن ماتەريالدىق م ۇلىكتى وتەۋ بويىنشا بۇگىنگە دەيىن 10 218 وتباسىنىڭ وتىنىشىنە وڭ شەشىم شىعارىلىپ, 3,6 ملرد تەڭگە قارجى تولەندى.
– دەگەنمەن تاسقىن سۋدىڭ ەڭ ۇلكەن شىعىنى تۇرعىن ۇيلەر عوي. مەملەكەت باسشىسى تاسقىن سالدارىنان باسپاناسى جارامسىز بولعان تۇرعىندارعا جاڭا ءۇي بەرۋدى تاپسىردى. قازىر وسى تاپسىرما قالاي ورىندالىپ جاتىر؟ كۇزگە, سالقىن تۇسكەنگە دەيىن تۇرعىندار جاڭا ۇيىنە كىرە الا ما؟
– ءدال قازىر سۋ تاسقىنى بولعان 5 اۋداندا جانە ورال قالاسىنداعى ساياجاي تۇرعىندارى ءۇشىن 775 ءۇي سالىنىپ جاتىر. 60 مەردىگەر كومپانيا انىقتالىپ, قۇرىلىس قارقىنى قىزا ءتۇستى. جوسپار بويىنشا 1 قىركۇيەكتە تاپسىرىلۋعا ءتيىس. قۇرىلىستىڭ ساپاسىن, اياقتالۋ مەرزىمىن قاتاڭ باقىلاپ وتىرمىز.
بۇعان قوسا اۋدانداردا شىعىندى وتەۋ جونىندەگى كوميسسيا قورىتىندىسىنا سايكەس باسپاناسى جارامسىز بولىپ قالعان وتباسىلارعا تۇرعىن ءۇي ساتىپ الۋ جۇمىسى دا ءجۇرىپ جاتىر. ماسەلەن, قازىرگە دەيىن ءبورلى اۋدانىندا – 66 ءۇي, تەرەكتى اۋدانىندا – 5 ءۇي, بايتەرەك اۋدانىندا 2 ءۇي ساتىپ الىندى. ال ورال قالاسىندا جالعىز باسپاناسى اپاتتى دەپ تانىلعان ساياجاي تۇرعىندارىنا جاڭا ءۇي ساتىپ الۋ جانە سالۋ بويىنشا جۇمىس قىزۋ جۇرگىزىلىپ جاتىر. قازىردىڭ وزىندە ورالدىق ساياجاي تۇرعىندارى ءۇشىن دەمەۋشىلەر قارجىسىنان 864 تۇرعىنعا ءۇي ساتىپ الۋ جونىندە شەشىم شىقتى. بۇگىندە ولار جاڭا پاتەرىنە كىرىپ, قونىستويىن تويلايدى. بۇل ۇيلەر جاڭا نارىقتان دا, ەكىنشى نارىقتان الىنا باستادى.
– تاسقىن زاردابىن وتەۋ ءىسىنىڭ قوماقتى بولىگى دەمەۋشىلەر كۇشىمەن ءجۇرىپ جاتىر ەكەن. وڭىردە تۇرعىن ءۇي سالۋعا, ساتىپ الۋعا قانداي ءىرى كومپانيالار, كاسىپكەرلەر كومەكتەسىپ جاتىر؟
– مەملەكەت باسشىسىنىڭ تاپسىرماسى اياسىندا وتكەن مامىر ايىنىڭ 20-سى كۇنى وڭىرگە پرەمەر-ءمينيستردىڭ ورىنباسارى قانات بوزىمباەۆپەن بىرگە بىرقاتار كاسىپكەر كەلدى. ولاردىڭ اراسىندا «Astana Group» كومپانياسىنىڭ توراعاسى نۇرلان سماعۇلوۆ, «بانك تسەنتركرەديت» ديرەكتورلار كەڭەسىنىڭ توراعاسى باقىتبەك بايسەيىتوۆ, «Jusan Bank» ديرەكتورلار كەڭەسىنىڭ توراعاسى عالىمجان ەسەنوۆ, «قازازوت» ديرەكتورلار كەڭەسىنىڭ مۇشەسى رۇستەم ايازباەۆ, «QazaqStroy» قۇرىلتايشىسى نۇرلان ارتىقباەۆ, «Alageum Electric» ديرەكتورلار كەڭەسىنىڭ توراعاسى ەركەبۇلان ءىلياسوۆ سىندى ازاماتتار بولدى. ولاردىڭ ءبارى قولۇشىن سوزىپ جاتىر. سونىمەن بىرگە «ERG» كومپانياسى, «قازاقستان حالقىنا» قورى, باتىس قازاقستانداعى «جايىقمۇناي», «كوندەنسات», «اقسايگازسەرۆيس», «قاراشىعاناق پەترولەۋم وپەرەيتينگ» كومپانيالارى دا قولداۋ ءبىلدىرىپ كەلەدى.
– ناريمان تورەعالي ۇلى, ءوڭىردىڭ ەڭ وزەكتى ماسەلەسى – اۆتوموبيل جولدارىنىڭ جاعدايى. جول ساپاسىنىڭ تومەندىگى جوعارىدا ايتقان قۇرىلىس, تاعى باسقا سالالاردى دا تەجەپ وتىرعانى بەلگىلى. وسى باعىتتا قانداي جۇمىس اتقارىلدى؟
– مەملەكەت باسشىسى قاسىم-جومارت كەمەل ۇلى باتىس قازاقستان وبلىسىندا جول سالۋ جانە جوندەۋ بويىنشا بەرگەن بىرقاتار تاپسىرماسى بار. وتكەن جىلى وڭىردە 562 كم اۆتوموبيل جولى جوندەلدى. بيىل 576 كم جولدى جوندەۋدى جوسپارلاپ وتىرمىز. ونىڭ ىشىندە جەرگىلىكتى ماڭىزى بار 304,7 كم جول قامتىلادى. سونداي-اق پرەزيدەنتتىڭ 2019 جىلى بەرگەن تاپسىرماسى اياسىندا وڭىرىمىزدەگى قازتالوۆ, بوكەي ورداسى, جانىبەك اۋداندارىن وبلىس ورتالىعىمەن بايلانىستىراتىن 245 كم جولدىڭ اياقتالماي قالعان 104 شاقىرىمىن 2023 جىلدىڭ ىشىندە سالىپ بىتتىك. ەندى 16 كم جول قالدى, ونى جىل سوڭىنا دەيىن اياقتايمىز.
– وتكەن جىلدارى ەلىمىزدىڭ ءار وڭىرىندە بىرنەشە قالا حالقى قىس قيىندىعىن كوردى. مۇنداي جاعداي باتىس قازاقستان وبلىسىندا بولماي ما؟ ءوڭىردىڭ الداعى قىسقى جىلىتۋ ماۋسىمىنا دايىندىعى قالاي؟ كارىز جەلىلەرى مەن جىلۋ ەلەكتر ستانسالارى دايىن با؟
– دۇرىس ايتاسىز, قالا كۇردەلى اعزا سياقتى. قىسقى جىلىتۋ ماۋسىمىنا دايىندىق جىل بويى, جۇيەلى ءجۇرۋى كەرەك. ءبىز الداعى قىستىڭ قامىن وسى قىستان شىعىسىمەن-اق ويلاپ, دايىندىقتى مامىر ايىندا باستاپ كەتتىك. جۇمىس قارقىندى ءجۇرىپ جاتىر.
بيىل وڭىردە كوممۋنالدىق سالادا بىرنەشە ءىرى جوبا ىسكە قوسىلادى. 1961 جىلى سالىنعان, ورال قالاسىنىڭ 150 مىڭعا جۋىق تۇرعىنىنا قىزمەت كورسەتىپ وتىرعان 2, 3 جانە 21-كارىزدىك سورعى ستانسالارى تۇگەلدەي جاڭارتىلادى. بۇل جوبالاردىڭ جالپى قۇنى – 4,8 ملرد تەڭگە. بۇعان قوسىمشا قالانىڭ قۇرىلىسشى, قادىر مىرزا ءالى, جاڭا وردا شاعىن اۋداندارىن, «ەسكى اەروپورت» اۋداندارىنىڭ 150 مىڭ تۇرعىندى قامتيتىن 18-كسس (كارىزدىك سورعى ستانساسى) قۇرىلىسى باستالادى. سونىمەن قاتار ورال قالاسىنىڭ اقجايىق شاعىن اۋدانىنداعى, سولتۇستىك-شىعىس باعىتىنداعى قوسالقى ەلەكتر ستانسالارى, ەلەكتر تاراتۋشى كومپانيانىڭ جۇمىسىن جەدەلدەتۋ ءۇشىن زاشاعان كەنتىندە جوندەۋ-وندىرىستىك بازاسى جانە جىلۋ جەلىلەرى بويىنشا 70 مىڭ ادامدى قامتيتىن 5-جىلۋ ماگيسترالى جوندەلىپ جاتىر.
قالا تۇرعىندارىنا ءمالىم, بىلتىر جاپونيالىق «حيتاچي» كومپانياسىمەن كەلىسسوز جۇرگىزىپ, ورال قالاسىنداعى جىلۋ ەلەكتر ورتالىعىنىڭ گاز تۋربينالى قوندىرعىسىن جوندەۋگە كەلىسىم جاساعان ەدىك. وسىعان وراي بيىل ماۋسىم ايىندا جاپونيادان ارنايى ماماندار كەلىپ, ءتيىستى جۇمىستى ىسكە اسىردى.
2024 جىلى كوممۋنالدىق كاسىپورىنداردىڭ ينۆەستيتسيالىق جوبالارى جانە بيۋدجەتتىك ينۆەستيتسيالار ەسەبىنەن ەنەرگەتيكا جانە تۇرعىن ءۇي-كوممۋنالدىق شارۋاشىلىعى سالاسىنا بارلىعى 17 ملرد تەڭگە قاراجات باعىتتالادى. ونىڭ 5,9 ملرد تەڭگەسى – رەسپۋبليكا بيۋدجەتىنەن, 8,2 ملرد تەڭگە – جەرگىلىكتى قازىنادان, ال 2,9 ملرد قاراجات ينۆەستيتسيالىق باعدارلاما ەسەبىنەن بولىنبەك. سونىڭ ىشىندە سۋ بۇرۋ جەلىلەرىن رەكونسترۋكتسيالاۋ 3, ەلەكترمەن جابدىقتاۋ جەلىلەرىن رەكونسترۋكتسيالاۋ 7, جىلۋمەن جابدىقتاۋ جەلىلەرىن رەكونسترۋكتسيالاۋ بويىنشا 1 جوبا جۇزەگە اسادى.
ۇكىمەت باسشىسىنىڭ تاپسىرماسىنا سايكەس ينجەنەرلىك جەلىلەر بويىنشا قۇرىلىس-مونتاج جۇمىستارىنا جەرگىلىكتى تاۋار وندىرۋشىلەردىڭ ونىمدەرى قولدانىلىپ جاتىر.
تاعى دا ايتايىن, جىلىتۋ ماۋسىمىنا دايىندىق مەنىڭ جەكە باقىلاۋىمدا, تۇرعىندار الاڭداماسىن. جالپى, 2023–2024 جىلدارى ەنەرگەتيكا جانە تۇرعىن-ءۇي كوممۋنالدىق شارۋاشىلىعى سالاسىنا ءارتۇرلى كوزدەن 30,3 ملرد تەڭگە باعىتتالدى. ونىڭ 14,2 ملرد تەڭگەسى نەمەسە 45%-ى – جەرگىلىكتى بيۋدجەتتەن.
– پرەزيدەنت تاپسىرعان ناقتى ءىستىڭ ءبىرى – وڭىرگە ينۆەستيتسيا تارتۋ. بۇل ماسەلە قالاي؟ بىلتىر جانە بيىل وبلىسقا قانشا ينۆەستيتسيا قۇيىلدى؟ جۋىردا جۇزەگە اساتىن ماڭىزدى ينۆەستيتسيالىق جوبالار تۋرالى ايتىپ وتسەڭىز؟
– وتكەن جىلدىڭ قورىتىندىسىنا سايكەس 7 ەكونوميكالىق ينديكاتور-كورسەتكىشتى ورىنداعان وبلىستاردىڭ قاتارىنا كىردىك. نەگىزگى ۇلەستى ءوندىرىس سالاسى الىپ وتىر. قازىر مەملەكەت باسشىسىنىڭ تاپسىرماسى بويىنشا قايتا وڭدەۋ سالاسىنا كوبىرەك ينۆەستيتسيا تارتۋعا تىرىسىپ جاتىرمىز. وڭىرگە ينۆەستورلاردى تارتۋ – اسا ماڭىزدى مىندەت. وتكەن 2023 جىلدىڭ قورىتىندىسىنا قاراساق, نەگىزگى كاپيتالعا سالىنعان ينۆەستيتسيا كولەمى بقو-دا 16,4%-عا ءوسىپ, 645,6 ملرد تەڭگەنى قۇرادى. بۇل جامان ەمەس.
ال 2024 جىلدىڭ 5 اي قورىتىندىسى بويىنشا نەگىزگى كاپيتالعا سالىنعان ينۆەستيتسيا كولەمى 178,3 ملرد تەڭگەنى قۇرادى. سونىمەن قاتار بيىل 728 جۇمىس ورنىن جاڭادان قۇرىپ, جالپى قۇنى 118,4 ملرد تەڭگەلىك 26 جوبانى ىسكە قوسۋدى جوسپارلاپ وتىرمىز. وسىنىڭ ىشىندە 3,7 ملرد تەڭگەگە 3 جوبا ىسكە قوسىلىپ ۇلگەردى. قازىر وڭىردەگى يندۋستريالىق ايماقتا كوپتەگەن كومپانيا جۇمىس ىستەيدى.
وبلىس اۋماعىندا ىسكە اسىرىلىپ جاتقان ءىرى جوبانىڭ ءبىرى ءھام بىرەگەيى –قاراشىعاناق كەن ورنىن كەڭەيتۋ جوباسى. ياعني 5 جانە 6-كومپرەسسورلاردى ىسكە قوسۋىمىز قاجەت. بۇل جوبا شيكى گازدى دايىنداۋ قۋاتىن ارتتىرۋدى كوزدەيدى.
ايتا كەتەيىن, كەن ورنىنىڭ 5-كومپرەسسورىن بيىل ىسكە قوسامىز. ال 6-كومپرەسسوردى ىسكە قوسۋ 2026 جىلعا جوسپارلانعان. بۇل شيكى گازدى ءوندىرۋ كولەمىن 4 ملرد تەكشە مەترگە ۇلعايتۋعا مۇمكىندىك بەرەدى.
سونداي-اق روجكوۆ كەن ورنىن يگەرۋ جوباسى دا جۇزەگە اسىرىلىپ جاتىر. «ورال ويل ەند گاز» جشس العاشقى ۇڭعىمانى ىسكە قوستى, گاز بەن ونىڭ كوندەنساتىن ءوندىرۋ باستالدى.
تاعى دا بىرقاتار جوبا بار. ولارعا دا توقتالا كەتەيىن:
«West Group/ۆەست گرۋپپ» اتتى كىرپىش زاۋىتىنىڭ قۋاتتىلىعى جىلىنا 20 ملن كىرپىش شىعارۋعا جەتەدى. بۇل جاڭادان 40 جۇمىس ورنىن اشۋعا مۇمكىندىك بەرەدى. ال كەشە عانا ىسكە قوسىلعان «باتىس مينەرال سۋ» زاۋىتىندا جىلىنا 10 ملن ليتر مينەرالدى سۋ شىعارىلادى. بۇل مەكەمە 61 جۇمىس ورنىمەن قامتاماسىز ەتىپ وتىر. «پويما ماي كومبينات» جشس تاۋلىگىنە 100 توننا وسىمدىك مايىن شىعارادى. بۇل ەكى كاسىپورىن تۋرالى «Egemen Qazaqstan» گازەتىندە كولەمدى ماقالا بەرىلىپ, ءوڭىر تىنىسىن رەسپۋبليكا جۇرتشىلىعىنا كورسەتتى. گازەت ۇجىمىنا سول ءۇشىن راحمەت ايتامىز.
2023 جىلى 1 مىڭ ادامدى جۇمىسپەن قامتىعان 45 جوبا ىسكە قوسىلعانىن ايتايىق. بۇل جوبالاردىڭ جالپى قۇنى 30 ملرد تەڭگەدەن اسادى. ونىڭ ىشىندە «Ringo-Milk» جشس-نىڭ ءسۇت-تاۋارلىق فەرماسى, «PlayCom Uralsk» جشس-نىڭ فانەرا ءوندىرىسى, «تالاپ» اق مەن «OLYMP» جشس-نىڭ مەديتسينالىق ورتالىقتارى, «Packaging Systems» كومپانياسىنىڭ بيگبەگ ءوندىرىسى سەكىلدى ءىرى جوبالاردى بولەك ايتۋعا بولار ەدى.
– ناريمان تورەعالي ۇلى, وڭىردە قۇرىلىسى تۇرالاپ قالعان نىساندار بار ەكەنى بەلگىلى. بۇل جونىندە نە ايتاسىز؟ قاڭتارىلىپ قالعان قۇرىلىستارعا جان ءبىتىرۋ ءۇشىن قانداي شارا جاسالىپ جاتىر؟
– 2022 جىلدىڭ سوڭىندا وڭىرگە اكىم بولىپ كەلگەنىمدە 2020–2022 جىلدارى بىرقاتار نىسان مەن جوبانىڭ قۇرىلىسى باستالىپ, اياقتالماي قالعانىن انىقتادىق. ولاردىڭ ىشىندە تۇرعىن ۇيلەر دە, الەۋمەتتىك نىساندار دا, سۋ قۇبىرلارى مەن جولدار دا بار ەدى. بۇل نىسانداردىڭ توقتاپ تۇرۋىنا جاۋاپسىز مەردىگەرلەردىڭ جۇمىستى تولىق اياقتاماۋى, قارجىلاندىرۋدىڭ توقتاپ قالۋى, باقىلاۋدىڭ بولماۋى, ت.ب. ماسەلەلەر سەبەپ بولعان ەكەن.
ءبىز 2020–2022 جىلدارى اياقتالماعان نىساندار بويىنشا ناتيجەلى جۇمىس جۇرگىزدىك. ءبىر جىلدىڭ ىشىندە 40 نىساننىڭ قۇرىلىسى تولىقتاي اياقتالدى. ال بيىل تاعى دا 13 جوبانى جىل سوڭىنا دەيىن بىتىرەمىز. جاۋاپتى مەملەكەتتىك ورگاندارمەن بىرلەسە جۇمىس ىستەپ, قاجەتتى قارجى كوزدەرىن تاۋىپ, جاۋاپسىز مەردىگەرلەرگە قاتاڭ تالاپ قويۋ ارقىلى نىسانداردى حالىق يگىلىگىنە بەردىك. بۇل باعىتتاعى جۇمىسىمىز الدا دا جالعاسادى.
– اڭگىمەڭىزگە راحمەت.
اڭگىمەلەسكەن – قازبەك قۇتتىمۇرات ۇلى,«Egemen Qazaqstan»باتىس قازاقستان وبلىسى