قر پرەمەر-ءمينيسترى ولجاس بەكتەنوۆ اكىمدىكتەرگە جول جۇمىستارىن جۇرگىزۋ كەزىندەگى كەمشىلىكتەردى جەدەل جويۋدى تاپسىردى, دەپ حابارلايدى Egemen.kz ۇكىمەتتىڭ ءباسپاسوز قىزمەتىنە سىلتەمە جاساپ.
ۇكىمەت وتىرىسى بارىسىندا اۆتوجول سالاسىن دامىتۋ ماسەلەسى قارالىپ, پرەمەر-مينيستر ولجاس بەكتەنوۆ بيىل ەلىمىزدە بىرقاتار ءىرى جوبالار اياقتالاتىنىن اتاپ ءوتتى. ولاردىڭ قاتارىندا «قاراعاندى – الماتى», «اقتوبە – قاندىاعاش», «اتىراۋ – استراحان» جانە «تالدىقورعان – وسكەمەن» بار. سونداي-اق شامامەن 2,5 مىڭ شاقىرىم جولدا جوندەۋ جۇمىستارى قولعا الىنعان.
«ىسكە اسىرىلىپ جاتقان جوبالاردان باسقا, جاڭالارىن ۋاقتىلى جوبالاۋ مەن دايىنداۋدى قامتاماسىز ەتۋ قاجەت. ءبىرىنشى كەزەكتە, جەر ۋچاسكەلەرىن الدىن الا رەزەرۆكە قويۋ كەرەك. جوبالاردىڭ ىسكە اسىرىلۋى الدىمەن وسىعان بايلانىستى. كەلەسى وزەكتى ماسەلەنىڭ ءبىرى – قارجىلاندىرۋ. كەيبىر وڭىرلەردە جالپى سيپاتتاعى ترانسفەرتتەردى يگەرۋ قارقىنى تومەن. مىسالى, مۇنداي پروبلەمالار اقتوبە, تۇركىستان جانە ۇلىتاۋ وبلىستارىندا بار», دەدى ولجاس بەكتەنوۆ.
ۇكىمەت باسشىسى قۇرىلىس ماۋسىمى قىسقا دەپ سيپاتتالاتىن سولتۇستىك جانە شىعىس وڭىرلەردە ەرەكشە ماڭىزدى جوبالاردى ىسكە اسىرۋ مەرزىمدەرىنىڭ مۇلتىكسىز ساقتالۋى ماسەلەسىن كوتەرگەن. وسىعان بايلانىستى قويىلعان مىندەتتەرگە قىسقا مەرزىمدە قول جەتكىزۋ ءۇشىن بارلىق شارالاردى قابىلداۋ تاپسىرىلدى. سونىمەن قاتار پرەمەر-مينيستر ەل ازاماتتارىنىڭ نەگىزىنەن جەرگىلىكتى ماڭىزى بار جولداردىڭ جاي-كۇيىنە قاتىستى شاعىمدارىنا دا توقتالا كەتتى.
«اقتوبە وبلىسى مۇعالجار اۋدانىنىڭ تۇرعىندارى جۇرىن مەن قاراكول اۋىلدارىنىڭ اراسىندا بيىل توسەلگەن اسفالتتىڭ ساپاسىن كورسەتتى – جاڭادان توسەلگەن اسفالت قولمەن ۇگىتىلىپ جاتىر. ال جەتىسۋ وبلىسى كەربۇلاق اۋدانى قويانكوز اۋىلىنىڭ تۇرعىندارى اسفالت توسەۋ تەحنولوگياسىن ساقتاماعان مەردىگەر كومپانيانى ءوز جۇمىسىن توقتاتۋعا ءماجبۇر ەتتى. اكىمدىكتەر قايدا, نەلىكتەن كۇندەلىكتى ساپالى باقىلاۋ جۇرگىزىلمەي جاتىر؟ ءبىرىنشى كەزەكتە تۇرعىنداردىڭ شاعىمدارىنا دەرەۋ جاۋاپ بەرۋ كەرەك», دەدى پرەمەر-مينيستر.