بوكسشىلار قورجىنى بوس قايتپايدى

جەتى وليمپيادادا – 15 جۇلدە!

تاۋەلسىزدىك العالى بەرى تورتجىلدىقتىڭ باستى دوداسىندا قازاق بوكسشىلارى ورەلى ونەرلەرىمەن ءوز كورەرمەندەرىن قۋانتىپ كەلگەن ەدى. اتاپ ايتساق, 1996 جىلى اتلانتادا (1 التىن, 1 كۇمىس, 2 قولا. جالپى ەسەپتە – 3-ورىن), 2000 جىلى سيدنەيدە (2 التىن, 2 كۇ­مىس. 3-ورىن), 2004 جىلى افينادا (1 التىن, 1 كۇمىس, 1 قولا. 3-ورىن), 2008 جىلى (1 التىن, 1 قولا. 7-ورىن), 2012 جىلى لوندوندا (1 التىن, 1 كۇمىس, 1 قولا. 3-ورىن), 2016 جىلى ريو-دە-جانەيرودا (1 التىن, 2 كۇمىس, 1 قو­لا, 3-ورىن) جاقسى جۇدىرىقتاسىپ, ۇزدىك كوماندالاردىڭ ساناتىنا ەركىن قوسىلدىق. تەك 2021 جىلى توكيو وليمپياداسىندا ەل سەنىمىنە سەلكەۋ تۇسىردىك. جاپونيانىڭ استاناسىندا ەكى بوكسشىمىز عانا قولا مەدالدى يەلەنىپ, جالپى كوماندالىق ەسەپتە قالىڭ توپتىڭ اراسىندا قالىپ قويدىق. كۇنشىعىس ەلىندە جەرلەستەرىمىز كۋبا (4+0+1), ۇلىبريتانيا (1+2+1), رەسەي (1+1+3), برازيليا (1+0+1), وزبەكستان (1+0+0), اقش (0+3+0), فيليپپين (0+1+1) جانە ۋكراينانى (0+1+0) العا جىبەردى. ناتيجەسىندە, 9-ورىن. پاريجدە سول ولقىلىقتىڭ ورنىن تولتىرۋعا ءتيىسپىز. جالپى, 1996-2021 جىلدار ارالىعىندا الاۋى تۇتانعان جازعى وليمپيادالاردا بوكستان قازاقستاننىڭ ەرلەر قۇراماسى 22 جۇلدەگە (7 التىن, 7 كۇمىس, 8 قولا) قول جەتكىزدى.

شىنى كەرەك, وسى جولى پاريج وليم­پياداسىنا ليتسەنزيا الۋدىڭ ءوزى قيىن بولدى. ەگەر توكيو وليمپياداسىندا ەرلەر مەن ايەلدەردى قوسا ەسەپتەگەندە, 289 بىلعارى قولعاپ شەبەرى سايىسقا تۇسسە, بيىلعى جارىس­تا ولاردىڭ سانى 248-گە دەيىن كەمىدى. ەندى ء«دۇبىرلى دودادا ونەر كورسەتەتىن جەرلەس­تەرىمىزدىڭ الەۋەتى قانداي؟», «ولار­دىڭ باستى قارسىلاستارى كىمدەر؟» دەگەن ساۋالدارعا جاۋاپ ىزدەپ كورەيىك.

 

ساكەنگە سەنىم ارتتىق

اسا جەڭىل سالماقتا ساكەن بيبوسىنوۆ ەل نامىسىن قورعايدى. 26 جاستاعى قانداسىمىز توكيو وليمپياداسى (2021 جىلى) مەن ەكاتەرينبۋرگتەگى الەم بىرىنشىلىگىندە (2019) قولا مەدالدى موينىندا جارقىراتسا, بەلگرادتا الەم چەمپيونى (2021) اتاندى. ەندى ساكەنگە جەتپەي تۇرعانى تەك وليمپيادانىڭ التىنى. سول ماقساتقا قول جەتكىزۋ ءۇشىن مىرزاعالي ايتجانوۆتىڭ شاكىرتى بارىن سالادى دەگەن ويدامىز.

جانكۇيەرلەردىڭ دەنى «ساكەننىڭ وسى جارىستاعى باستى قارسىلاسى – حاسانبوي دۋسماتوۆ» دەگەن پىكىردە. كۇنى كەشە عانا, ياعني 24 ماۋسىمدا 31 جاسقا تولعان وزبەكستاننىڭ وكىلى وتە قارۋلى ەكەنىنە ەش كۇمانىمىز جوق. ول – ريو وليمپياداسى (2016) مەن ازيا ويىندارىنىڭ (2022) جەڭىمپازى ءارى باركەر كۋبوگىنىڭ يەگەرى, الەم چەمپيونى (2023). ازيا چەمپيوناتىندا حاسانبوي ءۇش رەت الدىنا جان سالمادى. دەسەك تە اسا جەڭىل سالماقتا دۋسماتوۆتان دا باسقا مىقتى بىلعارى قولعاپ شەبەرلەرى بارىن ەستەن شىعارمايىق. سولاردىڭ اراسىنان فرانتسيالىق بيلال بەنناما (الەم چەمپيوناتىنىڭ ەكى دۇركىن قولا جۇلدەگەرى, ەۋروپا ويىندارىنىڭ جەڭىمپازى, ەۋروپا چەمپيونى), ۇندىستاندىق اميت پانگال (الەم چەمپيوناتىنىڭ ءفيناليسى, ازيا ويىندارىنىڭ جەڭىمپازى, ازيا چەمپيونى), تۇركيالىق سامەت گيۋميۋش (ەۋروپا چەمپيونى, ەۋروپا ويىندارىنىڭ ءفيناليسى), دومينيكاندىق دجۋنيور الكانتارا (پانامەريكا ويىندارىنىڭ جەڭىمپازى) جانە تايلاندتىق تيتيسان پانموتتى (ازيا ويىندارىنىڭ ءفيناليسى) بولە-جارا اتاپ وتۋگە بولادى.

51 سالماقتا كۇش سىناساتىن وزگە بوكس­شىلار: پاتريك چينەمبا (زامبيا), مايكل تريندادە (برازيليا), يۋسۋف چوتيا (اۋستراليا), الەحاندرو كلارو (كۋبا), نيدجات گۋسەينوۆ (ازەربايجان), حۋانما لوپەس (پۋەرتو-ريكو), رافاەل لوزانو سەررانو (يسپانيا), روسكو حيلل (اقش), دانيەل ۆارەلا دە پينا (كابو-ۆەردە) جانە وميد احماديسافا (بوسقىندار كومانداسى).

 

مەرەيىڭ ۇستەم بولسىن, ماحمۇد!

57 كگ سالماقتا ماحمۇد سابىرحانعا سەنىم ارتىلىپ وتىر. شىمكەنتتىڭ شىمىر جىگىتى نەبارى 22 جاستا بولسا دا, ءىرى دۇرمەكتەردىڭ تالايىندا دارالانىپ ۇلگەردى. الەم چەمپيوناتتارىندا ول ەكى رەت جەڭىس تۇعىرىنا كوتەرىلدى. 2021 جىلى بەلگرادتا كۇمىس السا, ارادا ەكى جىل وتكەندە تاشكەنتتە التىن تۇعىردان قول بۇلعادى. 2022 جىلى ازيا چەمپيوناتىنىڭ اقتىق سىنىندا ونەر كورسەتتى. ماحمۇد بۇل تابىستىڭ بارلىعىنا 54 كگ سالماق دارەجەسىندە سايىسقا تۇسكەن كە­زىن­دە قول جەتكىزدى. وليمپيا ويىندارى قارساڭىندا ول جاڭا سالماققا اۋىستى.

قازىرگى كەزدە ساراپشىلار مەن ماماندار «سابىرحانعا 57 كگ سالماقتا اتوي سالۋ قيىن بولادى. سەبەبى قارسىلاستارىنا قاراعاندا ونىڭ بويى مەن قولى قىسقا» دەگەن سىڭايدا پىكىرلەر ايتادى. بىراق بابالارىمىز «كۇش اتاسىن تانىمايدى» دەپ بەكەر ايتپاعان عوي. الدىندا قانداي مىقتى تۇرسا دا, ماحمۇدتىڭ «ولىسپەي بەرىسپەيتىنى» انىق. ويتكەنى ول – قورقۋدى, قايمىعۋدى, شەگىنۋدى بىلمەيتىن رۋحى بيىك, نامىسقوي جىگىت. سوندىقتان دا ءبىز سابىرحانعا سەنەمىز.

ءىلياس ورالبەكوۆ باپتاعان جىگىتتىڭ پاريدجەگى باستى قارسىلاستارى – وزبەك ابدۋلمالىك حالوكوۆ (الەم چەمپيونى, الەم چەمپيوناتىنىڭ ءفيناليسى, ازيا ويىندارىنىڭ جەڭىمپازى, ازيا چەمپيو­نى), امەريكالىق دجامال حارۆي (الەم چەمپيونى, پانامەريكا ويىندارىنىڭ جەڭىمپازى), كۋبالىق سايدەل حورتا رودريگەس (الەم چەمپيوناتىنىڭ كۇمىس جۇلدەگەرى), فيليپپيندىك كارلو پاالام (وليمپيادانىڭ كۇمىس جانە ازيا ويىندارىنىڭ قولا جۇلدەگەرى), بول­گاريالىق حاۆەر يبانەس دياس (ەۋروپا ويىندارىنىڭ جەڭىمپازى, ەۋروپا بىرىنشىلىگىنىڭ كۇمىس جانە قولا جۇلدەگەرى) جانە بەلگيالىق ۆاسيلە ۋستۋروي (ەۋروپا چەمپيونى, ەۋروپا ويىندارىنىڭ قولا جۇلدەگەرى).

57 كگ سالماقتا كۇش سىناساتىن وزگە بوكسشىلار: نەبيل يبراگيم (شۆەتسيا), حوسە كۆي­لەس (يسپانيا), مۇناربەك سە­يىتبەك ۇلى (قىرعىزستان), دو­لاپو ومولە (نيگەريا), شۋداي حا­رادا (جاپونيا), چارلي سەنور (اۋستراليا), يلمار گون­سالەس (كولۋمبيا), دجۋد گاللاحەر (ير­لانديا), لۋيس وليۆەيرا (برازيليا), ايدەر ابدۋرايموۆ (ۋكراينا).

 

مۇحاممەدسابىرعا ساتتىلىك تىلەيمىز

قازاقستان ءۇشىن وسى وليمپيادالىق تسيكل­دە 63,5 كگ ەڭ پروبلەمالىق سالماق دارەجەسى بولعانى بەلگىلى. وسى سالماقتا سايىسقا تۇسكەن سايىپقىراندار ەكى ليتسەنزيالىق تۋرنيردە ءسۇرىندى. سودان استانادا ىرىكتەۋ جەكپە-جەكتەرى ۇيىمداس­تىرىلدى. بۇل باسەكەدە سەرىك تەمىرجانوۆ, دۋلات بەكباۋوۆ, ەرتۋعان زەينۋللينوۆ, جاندوس قىدىراليەۆ جانە مۇحاممەدسابىر بازارباي ۇلى سىندى بەس بوكسشى شەبەرلىك بايقاستى. سولاردىڭ اراسىنان 21 جاس­تاعى مۇحاممەدسابىر سۋىرىلىپ شىقتى. نۇركەن انداسوۆتىڭ شا­كىرتى بانگكوكتاعى باسەكەدە دە تابىستى ونەر كورسەتىپ, وليمپياداعا با­راتىنداردىڭ تىزىمنە قو­سىلدى.

مۇحاممەدسابىر بازارباي ۇلىنىڭ سالماعىندا كىلەڭ «ىعاي مەن سىعايلار» جينالدى. جالعىز رۋسلان ابدۋللاەۆتىڭ ءوزى نەگە تۇرادى! وزبەكستاننىڭ تۋى استىندا ونەر كورسەتىپ جۇرگەن 22 جاستاعى قازاقتىڭ جالىندى جىگىتى 2022 جىلى ازيانىڭ الدى بولسا, بىلتىر الەمدىك دودادا دارا شىقتى. رۋسلان سول جارىستاردا كۇمانسىز جەڭىسكە جەتتى. پاريج وليمپياداسىنىڭ باستى فاۆوريتتەرىنىڭ ءبىرى رەتىندە سوفيان ۋميانى دا اتاۋعا بولادى. ول 60 كگ سال­ماقتا الەمنىڭ ءۇش دۇركىن چەمپيونى, ريو وليمپياداسىنىڭ كۇمىس جۇلدەگەرى اتاندى. بيىل 30 جاسقا تولعالى وتىرعان فرانتسيانىڭ اتاقتى بوكسشىسى جاڭا سالماققا دا جاقسى بەيىمدەلدى. بيىل ۋميا كراكوۆتا ۇيىمداستىرىلعان ەۋروپا ويىندارىندا قارسىلاس شىداتپادى. ونىڭ ۇستىنە سوفياننىڭ رينگ قوجايىنى ەكەنىن دە ەستەن شىعارمايىق. 33 جاستاعى موڭعوليانىڭ ماقتانىشى بااتارسۋحين چينزوريگتىڭ ەسىمى دە سپورتسۇيەر قاۋىمعا ەتەنە تانىس. ۇلانباتىردىڭ تۋماسى بىلتىر تاشكەنتتە الەم چەمپيونى اتانىپ, حانچجوۋداعى ازيادادا التىن تۇعىرعا كوتەرىلدى. توكيو وليمپياداسىندا قولا مەدالدى موينىنا ىلگەن اۋستراليالىق گارريسون گارسايد, سوڭعى الەم چەمپيوناتىندا ۇزدىك ۇشتىكتى تۇيىندەگەن تاجىك باحودۋر ۋسمونوۆ پەن گرۋزين لاشا گۋرۋلي, اتالعان جارىستىڭ فينالىندا جۇدىرىقتاسقان كۋبالىق ەريسلاندي الۆارەستىڭ دە كوزدەگەنى – وليمپيا ويىن­دارىنىڭ جۇلدەسى.

63,5 كگ سالماقتا كۇش سىناساتىن وزگە بوكسشىلار: دين كلەنسي (ير­لانديا), ريچارد كوۆاچ (ماجارستان), ۋاياتت سەنفورد (كانادا), جۋگۋرتا ايت بەككا (الجير), لاي چۋ-ەن (تايپەي), بۋندجونگ سينسيري (تايلاند), ميگەل انحەل راميرەس (مەكسيكا), حەسۋس كوۆا (ۆەنەسۋەلا), وبادا ءال-كاسبە (يوردانيا), را­دوسلاۆ روزەنوۆ (بولگاريا), ويەر يبار­رەچە (يسپانيا) جانە ماليك حاسانوۆ (ازەر­بايجان).

 

اسىعىڭ الشىسىنان ءتۇسسىن, اسلانبەك!

71 كگ سالماق دارەجەسىندە قازاقستان قۇ­راماسىنىڭ كاپيتانى اسلانبەك شىم­بەرگەنوۆ جارىس جولىنا شىعادى. وردا بۇزار 30 جاستاعى جامپوز وليمپياداعا بارار ءساتتى وتە ۇزاق كۇتتى. ەرمەك ەرتاەۆتىڭ شاكىرتى وسىدان 10 جىل بۇرىن ءوزىنىڭ تۋعان قالاسى – تارازدا جالاۋى جەلبىرگەن ەل چەمپيوناتىندا توپ جاردى. بىراق ول كەزدەرى جارتىلاي ورتا سالماقتا باسقا جۇلدىزدار بولدى. 2016 جىلى ريو وليمپياداسىندا دانيار ەلەۋسىنوۆ چەمپيون اتاندى. 2021 جىلى توكيو وليمپياداسىندا ابىلايحان ءجۇسىپوۆ جۇدىرىقتاستى. ەسىمدەرى جوعارىدا اتالعان قوس ساڭلاقتىڭ كولەڭكەسىندە جۇرگەن اسلانبەك سول ارالىقتا ازيا ويىندارى مەن قۇرلىق بىرىنشىلىگىندە جۇلدەگەرلەر قاتارىنا قوسىلدى. ابىلايحان كاسىپقوي بوكسقا اۋىسقاننان كەيىن تارازدىڭ تارلانىنا داڭعىل جول اشىلدى. بىلتىر ول تاشكەنتتە الەم چەمپيونى اتانسا, حانچجوۋدا ازيادانىڭ قولا جۇلدەسىن قاناعات تۇتتى. نەگىزى ونىڭ التىن الاتىنداي ءجونى بار ەدى. الايدا ادىلدىكتى بەلدەن باسقان قازىلار جارتىلاي فينالدا شىمبەرگەنوۆتى جاپونيالىق سەۆون وكادزاۆاعا «جىعىپ» بەردى.

ازيا ويىندارىندا اسلانبەك شىم­بەرگەنوۆتەن ايلاسىن اسىرعان الەم چەمپيونى سەۆون وكادزاۆادان بولەك سارى قۇرلىقتىڭ باسقا دا بوكسشىلارى وتە قارۋلى. ماسەلەن, بىلتىرعى دۇنيەجۇزىلىك دودادا جەڭىس تۇعىرىنا كوتەرىلگەن ءتورت بوكسشىنىڭ ۇشەۋى ازيالىق ەدى. تارقاتىپ ايتساق, وزبەك سايدجامشيد دجافاروۆ كۇمىسپەن كۇپتەلسە, ۇندىستاندىق نيشانت دەۆ قولاعا قول سوزدى. بىراق بۇل جارىس­تا وزبەكستاننىڭ نامىسىن دجافاروۆ ەمەس, 2023 جىلى تاشكەنتتەگى الەم چەمپيوناتىنىڭ اقتىق باسەكەسىندە ءبىزدىڭ دۋلات بەكباۋوۆتان باسىم تۇسكەن اسادحۋجا مۋي­دين­حۋجاەۆ قورعايدى. تو­كيوداعى ويىنداردىڭ قولا جۇل­دەگەرى, يرلانديالىق ەيدان ۋولش, قۇر­لىقتىق ويىن­داردىڭ جەڭى­م­پاز­دارى – دانيالىق نيكولاي تەر­تەريان مەن مەكسيكالىق ماركو ۆەردە دە «ولىسپەي بەرىسپەيمىز» دەپ قۇلشىنىپ وتىرعان كورىنەدى.

 71 كگ سالماقتا كۇش سىناساتىن وزگە بوكسشىلار: ماكاان تراورە (فرانتسيا), تۋگرۋلحان ەردەمير (تۇركيا), ۆاحيد اباسوۆ (سەربيا), ومار ەلاۆەدي (مىسىر), كان چيا-ۆەي (تايپەي), حوسە رودريگەس تەنوريو (ەكۆادور), شەننان دەيۆي (اۋستراليا), رامي موففيد كيۆان (بولگاريا), وماري دجونس (اقش), ليۋيس ريچاردسون ( ۇلى­بريتانيا), زەياد يشايش (يوردانيا), داميان دۋركاچ (پولشا).

 

نۇربەكتىڭ قارسىلاستارى – كىل مىقتى

80 كگ سالماقتا نۇربەك ورالبايدىڭ ونەرىن تاماشالايمىز. 24 جاستاعى اس­تانالىق ارلان – بىلتىرعى جىلعى الەم چەمپيونى. ونىڭ تاشكەنتتەگى جۇدىرىقتاسۋ مانەرى مەن اسقان شەبەرلىگىنە ءدۇيىم جۇرت ءتانتى بولدى. العاشقى اينالىمداردان سۇرىنبەي وتكەن نۇربەك شيرەك فينالدا ازيا چەمپيونى يوردانيالىق حۋسسەين يشايش, جارتىلاي فينالدا وليمپيادا مەن الەمدىك دودانىڭ قولا جۇلدەگەرى, رەسەيلىك يمام حاتاەۆ جانە فينالدا قىتايدىڭ نامىسىن قورعاعان قازاقتىڭ ۇلى توقتاربەك تاڭاتقاندى تىزە بۇكتىردى.

قازىرگى ۋاقىتتا يشايش پەن تاڭات­قان وليمپيا ويىندارىنا قىزۋ دايىن­دالىپ جاتىر. جوعارىدا ايتىل­عان جەڭىستەردەن بولەك نۇربەكتىڭ بۇل جىگىتتەردەن جەڭىلگەن كەزى دە جوق ەمەس. يوردانيالىقتان ول 2022 جىلعى ازيا چەمپيوناتىندا, قىتايداعى قان­داسىمىزدان 2023 جىلى ازيا ويىن­دارىندا ۇتىلدى. جارتىلاي اۋىر سالماقتا جۇدىرىقتاساتىن جىگىتتەر اراسىنداعى باستى جۇلدىزدار – كۋبالىق ارلەن لوپەس (وليمپيا مەن پانامەريكا ويىندارىنىڭ ەكى دۇركىن جەڭىمپازى, الەم چەمپيونى), فيليپپيندىك ەۋمير مارسيال (توكيو وليمپياداسىنىڭ قولا جانە الەم چەمپيوناتىنىڭ كۇمىس جۇلدەگەرى, ازيا ويىندارى مەن چەمپيوناتىنىڭ ەكى دۇركىن جۇلدەگەرى), ۋكراينالىق الەكساندر حيجنياك (توكيو وليمپياداسىنىڭ كۇمىس جۇلدەگەرى, الەم مەن ەۋروپا چەمپيونى, ەكى دۇركىن ەۋروپا ويىندارىنىڭ جەڭىمپازى) جانە يتاليالىق سالۆاتورە كاۆاللارو (الەم, قۇرلىق بىرىنشىلىكتەرى مەن ەۋروپا ويىندارىنىڭ بىرنەشە دۇركىن جۇلدەگەرى).

 80 كگ سالماقتا كۇش سىناساتىن وزگە بوكسشىلار: گابريەل ۆەوچيچ (حورۆاتيا), مۇراد اللاحۆەرديەۆ (ازەربايجان), ابدەلراحمان ورابي (مىسىر), ۆاندەرلەي پەرەيرا (برازيليا), كاللۋم پيتەرس (اۋستراليا), كاان ايكۋتسۋن (تۇركيا), تۇرابەك حابيبۋللاەۆ (وزبەكستان), پيليپ اكيلوۆ (ماجارستان), كريستيان پينالەس (دومينيكان رەس­پۋبليكاسى) جانە ۆي­راپون دجونگدجوحو (تايلاند).

 

ايىڭ وڭىنان تۋسىن, ايبەك!

90 كگ سالماقتا نۇربەكتىڭ سىڭارى – ايبەك ورالباي سايىسقا تۇسەدى. وتاندىق بوكس تاريحىندا بۇرىن-سوڭدى ءبىر وتباسىنان شىققان ەگىز بوكسشىلاردىڭ وليمپيادا ويىندارىنا قاتىسقان كەزى بولماعان. سول كەرەمەت ءۇردىستى اعايىندى ورالبايلار باستادى. ايبەك – 2022 جىلعى ازيا چەمپيو­نى. وعان دەيىن جوسوسپىرىمدەردىڭ دۇنيە­جۇزىلىك وليمپياداسىندا توپ جا­رىپ, جاستار اراسىنداعى الەم بىرىن­شىلىگىندە كۇمىس الدى.

اۋىر سالماقتاعىلار اراسىنداعى شوق­تىعى بيىك بوكسشى حۋليو سەزار لا كرۋس ەكەنى انىق. بوستاندىق ارالىنىڭ بەتكەۇستارى وسىعان دەيىن ءۇش وليمپياداعا قاتىستى. 2012 جىلى لوندوندا جولى بولماسا, 2016 جىلى ريو-دە-جانەيرو مەن 2021 جىلى توكيودا ول تەڭدەسسىز دەپ تانىلدى. الەم چەمپيوناتىن بەس جانە پانامەريكا ويىندارىن ءتورت رەت ۇتتى. تامىز ايىندا 35 جاسقا تولعالى وتىرعان لا كرۋس پاريج وليمپياداسىندا دا التىن الىپ, ءوزىنىڭ داڭقتى وتانداستارى – تەوفيلو ستيۆەنسون مەن فەليكس ساۆوننىڭ كورسەتكىشىن قايتالاۋعا بەلدى بەكەم بۋعان سەكىلدى.

الاپات ايقاستا كۋبا قابىلانىن كىم توقتاتۋى مۇمكىن؟ ونداي دۇلەي كۇش يەلەرى دە جوق ەمەس. ەڭ ءبىرىنشى كەزەكتە لورەن الفونسو دومينگەستىڭ ەسىمى اتالادى. توكيو وليمپياداسىنىڭ قولا جۇلدەگەرى, الەم چەمپيونى, ەۋروپا ويىندارىنىڭ جەڭىمپازى دەگەن دارداي اتاعى بار 29 جاس­تاعى جامپوزدىڭ ازەربايجاننىڭ نامىسىن قورعاپ جۇرگەنىنە ءبىراز جىلدىڭ ءجۇزى بول­عانىمەن, ونىڭ شىققان تەگى – كۋبالىق. پيرەنەي تۇبەگىنەن كەلەتىن ەنمانۋەل رەيەسكە دە جانكۇيەرلەردىڭ قوشەمەتى ەرەكشە. 31 جاستاعى ساقا سپورتشى ءار جىلدارى الەم مەن قۇرلىق بىرىنشىلىكتەرى, ەۋروپا ويىندارىندا جۇلدەگەرلەر قاتا­رىنان كورىندى. رەيەس تە بوستاندىق ارالىندا دۇنيەگە كەلگەن. ساراپشىلاردىڭ پايىم­داۋىنشا, باس جۇلدە ءۇشىن تارتىس كۋبانىڭ وسى ءۇش قابىلانىنىڭ اراسىندا ءوربيدى. سونداي-اق يتاليالىق ازيز اببەس مۋحيدين (الەم چەمپيوناتىنىڭ ەكى دۇركىن كۇمىس جۇلدەگەرى, ەۋروپا ويىندارىن مەن قۇرلىق چەمپيونى), برازيليالىق كەنو ماچادو (الەم چەمپيو­ناتى مەن پانامەريكا ويىندارىنىڭ كۇمىس جۇلدەگەرى, پانامەريكا چەم­پيونى), وزبەكستاندىق لازيز­بەك مۋللوجونوۆ (الەم چەمپيو­نا­تىنىڭ قولا جۇلدەگەرى, ازيا چەمپيونى), گرۋزيالىق گەور­گي كۋشيتاشۆيلي (الەم چەم­پيو­ناتىنىڭ قولا جۇلدەگەرى, ەۋ­روپا چەمپيونى) جۇلەدەدەن ءۇمىتتى.

92 كگ سالماقتا كۇش سىناسا­تىن وزگە بوكسشىلار: دجەك مارلي (ير­لانديا), ولايتان ولاورە (ني­گەريا), حان سيۋەجەن (قىتاي), داۆلات بولتاەۆ (تاجىكستان), اتو پلودزيتسكي-فاواگالي (ساموا), پاتريك براۋن ( ۇلى­بريتانيا), ۆيكتور شەلستراەتە (بەلگيا) جانە ماتەۋش بەرەجنيتسكي (پولشا).

 

نامىستى قامشىلا, قامشىبەك!

+92 كگ سالماقتىڭ باستى ءفاۆوريتى باحودير جالولوۆ ەكەنى داۋسىز. بويى ەكى مەتردەن اساتىن وزبەكستاننىڭ الىبى 2017 جىلدان بەرى ءوز قاتىسقان جارىستاردىڭ بارلىعىنان باس جۇلدەمەن ورالدى. ول – وليمپيا ويىندارىنىڭ جەڭىمپازى, الەمنىڭ ەكى جانە ازيانىڭ ءۇش دۇركىن چەمپيونى. ءسال ەرتەرەكتە قامشىبەك قوڭقاباەۆ بۇل بوكسشىمەن تەڭ دارەجەدە ايقاسىپ جۇرگەن ەدى. بىراق كەيىنگى كەزدەرى ەكەۋارا جەكپە-جەكتە تەك جالولوۆ قانا جەڭىسكە جەتەدى. ال قوڭقاباەۆ ۇنەمى قاپى قالىپ ءجۇر. بۇل جاعداي پسيحولوگيالىق تۇرعىدان قانداسىمىزعا ءبىراز قولايسىزدىق تۋعىزادى. تىپتەن باحوديردى جەڭە الاتىنىنا قامشىبەكتىڭ ءوزى دە سەنبەيتىن سەكىلدى. وعان كەيىنگى جىلدارى وتكەن ماڭىزدى جارىستاردا انىق كوز جەتكىزەندەي بولدىق.

جالپى, اسا اۋىر سالماقتا جالولوۆ پەن قوڭقاباەۆتان باسقا دا مىقتى جىگىتتەر جەتەرلىك. ولاردىڭ قاتارىنا توكيو وليمپياداسىنىڭ قولا مەداليسى, برازيليالىق ابنەر تەيشەيرا, الەم چەمپيوناتتارىندا جۇلدە الىپ جۇرگەن ازەربايجاندىق ماگامماد ابدۋل­­لاەۆ, يسپانيالىق ايۋب گادفا, ارمەنيالىق داۆيد چالويان, قۇرلىقتىڭ باستى جارىستارىنىڭ جەڭىمپازدارى – ۇلىبريتانيالىق دەليشەس وري, امەريكالىق دجوشۋا ەدۆارد, گەرما­نيالىق نەلۆي تيافاكتى ايتۋعا بولادى.

92 كگ سالماقتا كۇش سىناساتىن وزگە بوكسشىلار: مۇراد كادي (الجير), تەرە­موانا دجۋنيور (اۋستراليا), ديەگو لەن­تسي (يتاليا), ومار شيحا (نورۆەگيا), دجا­ميلي-ديني ابۋدۋ مويندزە (فرانتسيا), گەرلون كونگو (ەكۆادور) جانە دميتري لوۆچينسكي (ۋكراينا).

پاريج وليمپياداسىنا ەڭ كوپ جولدامانى اۋستراليا قۇراماسى ولجالادى. ەرلەر مەن ايەلدەردى قوس العاندا جاسىل قۇرلىقتىڭ 12 بىلعارى قولعاپ شەبەرى جارىس جولىنا شىعادى. ولاردان وزبەكتەردىڭ ءبىر ليتسەنزياسى كەم. قازاقستان, برازيليا جانە يرلانديا 10 جولدامادان ەنشىلەدى. سونداي-اق پاريج رينگىندە كۇش سىناساتىندار قاتارىندا اقش, قىتاي, فرانتسيا, يتاليا, تايلاند, تۇركيانىڭ – 8, ۇلىبريتانيا, ءۇندىستان, يسپانيا, تايپەيدىڭ – 6, الجير, ازەربايجان, بولگاريا, كولۋمبيا, كۋبا, فيليپپين, پولشانىڭ – 5, مەكسيكانىڭ – 4, بەلگيا, دومينيكان رەسپۋبليكاسى, ەكۆادور, مىسىر, ماجارستان, يوردانيا, ماروككو, نيگەريا, سەربيا, تاجىكستان, ۋكراينانىڭ – 3, كانادا, كونگو, گرۋزيا, گەرمانيا, جاپونيا, موڭعوليا, سولتۇستىك كورەيا, نورۆەگيا, پۋەرتو-ريكو, بوسقىندار كومانداسى, وڭتۇستىك كورەيا, شۆەتسيا, ۆەنەسۋەلا, ۆەتنامنىڭ – 2, ارمەنيا, كابو-ۆەردە, حورۆاتيا, دانيا, فينليانديا, كوسوۆو, قىرعىزستان, موزامبيك, نيدەرلاند, پاناما, رۋمىنيا, ساموا, سلوۆاكيا, تۋنيس جانە زامبيانىڭ 1 وكىلى بار.