باتىس قازاقستان وبلىسىندا سۋ تاسقىنىنان زارداپ شەككەن تۇرعىندارعا ارناپ 850 ءۇي سالىنىپ جاتىر. بۇل جونىندە ءوڭىر باسشىسى ناريمان تورەعاليەۆ حابارلادى.
ورال قالاسىندا باتىس قازاقستان وبلىسى قازاقستان حالقى اسسامبلەياسىنىڭ ءXXVى سەسسياسى كەزىندە وبلىس اكىمى, باتىس قازاقستان وبلىسى قازاقستان حالقى اسسامبلەياسىنىڭ توراعاسى ناريمان تورەعاليەۆ وڭىردە قالىپتاسقان قوعامدىق-ساياسي احۋال, ونى قالىپتاستىرۋداعى اسسامبلەيا وكىلدەرىنىڭ ۇلەسى جايىندا ايتا كەلىپ, كوكتەمگى سۋ تاسقىنىنان بولعان زارداپتى قالپىنا كەلتىرۋ تۋرالى بايان ەتتى.
«كوكتەمگى سۋ تاسقىنى كەزىندە قازاقستان حالقى ءبىر جاعادان باس, ءبىر جەڭنەن قول شىعارىپ, تابيعي اپاتقا يىق تىرەسە قارسى تۇردى. ءبىزدىڭ باتىس قازاقستان وبلىسىندا دا تۇرعىنداردىڭ ۇيىمشىلدىعى, ارناۋلى ورگاندار مەن قۇتقارۋشىلاردىڭ ساۋاتتى قيمىلى ارقاسىندا ۇلكەن شىعىندارعا جول بەرمەدىك. قازىر وبلىستىڭ 5 اۋدانىندا 401 تۇرعىنۇيدىڭ قۇرىلىسى ءجۇرىپ جاتىر. سونىمەن بىرگە تاسقىن كەزىندە 10 مىڭنان اسا ساياجاي ءۇيى سۋ استىندا قالعان ەدى. قازىردىڭ وزىندە 500-دەن استام ساياجاي تۇرعىنى پاتەر يەسى اتاندى. ولاردىڭ كەيبىرى جاڭا باسپاناسىنا كىرىپ السا, ەندى بىرەۋلەرى بولاشاق پاتەرىنىڭ قاي جەردە ەكەنىن انىقتاپ, قولىنا قۇجاتىن الىپ وتىر. بۇعان قوسا جالعىز باسپاناسى سۋ تاسقىنى سەبەبىنەن جارامسىز بولعان ساياجايلىقتارعا ارنالىپ 450 ءۇيدىڭ قۇرىلىسى ءجۇرىپ جاتىر. بۇل ستاندارتتى جەكە ءۇيدىڭ ارقايسىسىنىڭ اۋماعى 80 شارشى مەتر. مىنە, وسىلايشا بيىل سۋ تاسقىنىنان زارداپ شەككەن حالىققا ارناپ وبلىس اۋماعىندا بارلىعى 850-دەن اسا جاڭا ءۇي سالىنىپ جاتىر», دەدى ناريمان تورەعاليەۆ.
ءوڭىر باسشىسى بۇدان بولەك تۇرعىن ءۇي نارىعىنان دا سۋ جاڭا جانە بۇرىن پايدالانىلعان پاتەرلەر ساتىپ الىنىپ, مۇقتاج وتباسىلارعا بەرىلەتىنىن ايتتى. وڭىردە سۋ تاسقىنى زارداپتارىن جويۋ, جول قاتىناسىن قالپىنا كەلتىرۋ, الەۋمەتتىك نىسانداردى سالۋ جانە جوندەۋ جۇمىسى قاۋىرت ءجۇرىپ جاتىر. ايتا كەتەيىك, قازىرگە دەيىن وڭىردە 4500-گە جۋىق ساياجاي ءۇيى «جالعىز باسپانا» رەتىندە تانىلعان.
باتىس قازاقستان وبلىسى