وتان الدىنداعى بورىشىن بۇرىنعى وداقتا وتەگەن اسقار تاۋ اكەلەرىمىز بەن ارداقتى اعالارىمىز اسكەري ءومىر تۋرالى مايىن تامىزىپ اڭگىمەلەگەندە اۋزىمىزدىڭ سۋى اعاتىن. ءتىپتى ولاردىڭ ارميادا تۇسكەن سۋرەتتەرىنەن جاسالعان فوتوالبومدى كورىپ تاڭعالۋشى ەدىك.
ءالى سولاي. ۇلكەندەر جاعى قازىرگى جاستاردى ء«بىر جىلدىق بالاباقشاعا بارىپ كەلدى» دەپ كەيدە مۇقاتىپ جاتادى. راسىمەن ازات ەلدىڭ ارمياسىندا جاستارعا كەرەمەت جاعداي جاسالعان با؟ كىم ءبىلسىن... ايتەۋىر كەيىنگى جىلدارى جامبىل وبلىسى اۋماعىنداعى اسكەري بولىمشەلەردە جاعداي ۋشىعا بەرەتىن بولدى.
2022 جىلى اسكەرگە بارۋدان جالتارىپ, ەسەپكە الۋ قۇجاتتارىن بۇلدىرگەندەردىڭ سانى ەل بويىنشا 30 مىڭنان اسقان دەگەن دەرەك بار. «جەل تۇرماسا, ءشوپتىڭ باسى قيمىلدامايدى». اسكەردەگى الىمجەتتىك تۋرالى اڭگىمە از ايتىلىپ جۇرگەن جوق. تاۋەلسىز ەلدىڭ اسكەرىندە ءبارى كەرەمەت بولسا, جاستار نەگە وتان الدىنداعى بورىشىن وتەۋدەن قاشادى دەگەن زاڭدى ساۋال تۋىندايتىنى انىق.
جانارىندا وت ويناعان جاستار اسكەرگە وتان الدىنداعى بورىشىن وتەۋگە باراتىنى, رۋحىن كوتەرگىسى كەلەتىنى انىق. ەڭسەسىن تىك كوتەرۋگە كەتكەن وعلان ارميادان كوك جاسىق, مىنەزسىز بولىپ ورالعىسى كەلمەيدى. الايدا ءبارى ءبىز ويلاعانداي ەمەس سەكىلدى.
اسكەردەگى ساربازداردىڭ ءولىمى تۋرالى دەرەكتەردى وقىعاندا جان تۇرشىگەدى. مۇنداي وقيعالاردىڭ جامبىل وبلىسى اۋماعىندا ءجيى تىركەلە باستاعانى كىمدى دە بولسىن, ويلاندىرماي قويمايتىنى داۋسىز. ءشولدالا شەكارا زاستاۆاسىنداعى وقيعا كادىمگىدەي شۋ تۋعىزعانى جادىمىزدان وشكەن جوق. سارباز بەكبول ميراشتىڭ ءولىمى قوعامدى قاتتى دۇرلىكتىردى. 2022 جىلى بولعان وقيعا دا جۇرتتىڭ ەسىندە. كامەلەت جاسىنداعى ماڭعىستاۋلىق سارباز الىبەك قالباي گۆاردەيسكىدەگى اسكەري اۋرۋحانادا مەرت بولعان ەدى. اسكەردە بىرنەشە كۇن عانا بولعان ساربازدىڭ ءولىمىن قوعام اۋىر قابىلداعانى راس.
اسكەرگە ساۋ بولىپ بارعان سارباز سال بولىپ قالعىسى نەمەسە ءجانتاسىلىم ەتكىسى كەلمەيتىنى انىق. ايتار بولساق مىسال از ەمەس. قازبالاۋدىڭ كەرەگى قانشا؟
تاعى دا قورداي. 19 جاستاعى قوستانايلىق وعلان اسكەري بورىشىن وتەۋگە كەلىپ, ەس-ءتۇسىن جوعالتقان. بالاسىنىڭ جانساقتاۋ بولىمىنە تۇسكەنىن ەستىگەن اناسىنىڭ جۇرەگى اتقاقتاپ, الەۋمەتتىك جەلىدە جانۇشىرا بەينەجازبا قالدىرعان. جاننا ءجانالىنىڭ شىرقىراعان ءۇنى بيلىككە جەتتى. 9 ماۋسىم كۇنى بولعان وقيعاعا مەملەكەت باسشىسى قاسىم-جومارت توقاەۆ نازار اۋداردى. پرەزيدەنتتىڭ كەڭەسشىسى – ءباسپاسوز حاتشىسى بەرىك ءۋالي ماسەلەنىڭ پرەزيدەنت باقىلاۋىنا الىنعانىن الەۋمەتتىك جەلى ارقىلى جەتكىزدى.
«پرەزيدەنت قاسىم-جومارت توقاەۆ جامبىل وبلىسى وتار اۋلىنداعى اسكەري بولىمدە مەرزىمدى قىزمەتىن وتەپ جاتقان ساربازدىڭ كوماعا تۇسۋىنە قاتىستى اناسىنىڭ الەۋمەتتىك جەلىلەردە جاريالاعان ۇندەۋىمەن تانىستى. مەملەكەت باسشىسى بولعان وقيعانىڭ ءمان-جايىن مۇقيات زەرتتەپ, كىنالى ادامداردى جازالاۋدى تالاپ ەتتى. پرەزيدەنت قورعانىس مينيسترىنە ارميادا مۇنداي جاعدايعا جول بەرمەۋ قاجەت ەكەنىن ەسكەرتىپ, تەرگەۋ امالدارىن باقىلاۋعا الۋدى تاپسىردى», دەپ جازدى ول الەۋمەتتىك جەلىدەگى جەكە پاراقشاسىندا.
الماتىداعى اسكەري كلينيكالىق گوسپيتالعا تۇسكەن ساربازدىڭ جاعدايى ءماز ەمەس ەكەنىن ماماندار دا ايتىپ وتىر. ولار ءتيىستى مەديتسينالىق كومەك كورسەتىلىپ جاتقانىنىن تىلگە تيەك ەتكەن. الايدا ناۋقاستىڭ جاعدايى اۋىر ەكەنىن جاسىرماعان.
قوردايداعى جاعدايعا قاتىستى قورعانىس مينيسترلىگىنىڭ رەسمي وكىلى رەسمي مالىمدەمە جاسادى. «2024 جىلعى 9 ماۋسىمدا جامبىل وبلىسىنىڭ قورداي اۋداندىق ورتالىق اۋرۋحاناسىنا گۆاردەيسك گارنيزونىنىڭ مەرزىمدى قىزمەتتەگى اسكەري قىزمەتشىسى شۇعىل جاتقىزىلدى. باستاپقىدا ءوزىن ءالسىز سەزىنىپ, قىزۋى كوتەرىلگەن سارباز گۆاردەيسك گارنيزونىنداعى اسكەري گوسپيتالدىڭ جۇقپالى اۋرۋلار بولىمىنە جەتكىزىلگەن بولاتىن.
مەديتسينالىق تەكسەرۋلەر مەن زەرتتەۋلەر اسكەري قىزمەتشىدەن ەكىجاقتى پوليسەگمەنتتى پنەۆمونيا انىقتادى. ناۋقاستىڭ جاعدايى اۋىر دەپ باعالانىپ وتىر. قازىر وعان بارلىق قاجەتتى مەديتسينالىق كومەك كورسەتىلىپ جاتىر. سونىمەن بىرگە ول جەردە قورعانىس مينيسترلىگى اسكەري كلينيكالىق گوسپيتالىنىڭ قۇرامىنا انەستەزيولوگ, رەانيماتولوگ جانە تەراپەۆت دارىگەرلەر كىرەتىن كوشپەلى بريگاداسى جۇمىس ىستەپ جاتىر.
اسكەري قىزمەتشى ەمدەۋ مەكەمەسىنە تۇسكەن كەزدە ونىڭ دەنەسىنەن كوگەرگەن نەمەسە زاقىمدانۋ ىزدەرى بولماعانىن اتاپ ءوتۋ كەرەك. مەرزىمدى قىزمەتتەگى ساربازعا قاتىستى كەلىسىمشارت بويىنشا اسكەري قىزمەتشى تاراپىنان بيلىكتى اسىرا پايدالانۋ فاكتىسى بويىنشا ءىىم اسكەري تەرگەۋ باسقارماسى قىلمىستىق ءىس قوزعادى. تەكسەرۋ جۇرگىزىلۋدە. تەرگەۋ مۇددەسى ءۇشىن باسقا اقپاراتتار جاريا ەتىلمەيدى. ءىس قورعانىس ءمينيسترىنىڭ ەرەكشە باقىلاۋىندا», دەلىنگەن پودپولكوۆنيك رۋسلان جانگۋليننىڭ بەينەجازباسىندا.
رەسمي وكىلدىڭ مالىمدەمەسىنە قاراپ, قوردايداعى وقيعاعا قاتىستى ناقتى ايىپتالۋشى ازامات بار ەكەنىن اڭعارۋ قيىن ەمەس. ارينە, تەرگەۋ امالدارى جۇرگىزىلىپ جاتقاندىقتان قالعان اقپاراتتىڭ قۇپيا ساقتالۋى – زاڭدىلىق.
رەسمي مالىمەتتە ساربازدىڭ دەنەسىندە زاقىمدانۋ ءىزى بولماعانى ايتىلادى. بىراق ماسەلەنىڭ قالاي وربىگەنى, كىمنىڭ ايىپتى ەكەنى, وقيعانىڭ قالاي ۋشىققانى الداعى ۋاقىتتا بەلگىلى بولاتىنى انىق. قالاي بولعان كۇندە دە اسكەردە قايعىلى جاعدايدىڭ ءجيى تىركەلەتىنى الاڭداتپاي قويمايدى.
نە دەسەك تە كەيىنگى بىرنەشە جىلدىڭ بەدەرىندە قوعام اسكەردەگى الىمجەتتىككە قاتتى الاڭداپ وتىرعانى ايقىن. ءبىر ەمەس ءار جىلدارى بىرنەشە ساربازدىڭ ومىرمەن قوش ايتىسقانى قوعامدا كادىمگىدەي رەزونانس تۋدىرىپ جاتقانى دا شىندىق. تاجىريبەلى جاۋىنگەرلەر «دەدوۆششينا» ارەكەتتەرىنە بارماسا, جاسوسپىرىمدەر اسكەردەن قاشپاس تا ەدى...
ءيا, اسكەردەن قاشىپ جۇرگەندەردىڭ ءبىرازى ارمياداعى دوق كورسەتۋدەن, ياعني اسكەردەگى الىمجەتتىكتەن يمەنەتىنى انىق. ساربازدارعا كۇش پەن قىسىم كورسەتۋدى تولىق جوياتىن كەز كەلە مە؟ كىم ءبىلسىن.
قورداي مەن شولدالاداعى جاعدايدان ساباق الاتىن كەز جەتكەن شىعار. ايتەۋىر اسكەردە جاعداي ءجيى ۋشىعا بەرمەسە ەكەن دەيمىز. ءۇمىت ەتكەن كوزىنىڭ نۇرىن قاي اتا-انا ولىمگە قيسىن...
جامبىل وبلىسى