باسى اۋىرىپ, بالتىرى سىزداعان ادامنىڭ ءبارى اق حالاتتى ابزال جاننىڭ كاسىبيلىگىنە سەنىم ارتىپ, الدىنان تابىلاتىنى انىق. اسىرەسە جۇرەگىنە جۇك ارتقان ازاماتتار كارديوحيرۋرگيا بولىمىندەگى مامانداردىڭ جانارىنان جىلىلىق كورىپ, مەيىرىم كۇتەدى.
وبلىستىق كارديوحيرۋرگيا بولىمىنە جىلىنا جۇزدەگەن ادام ات باسىن بۇرادى. دەرتىنە شيپا ىزدەپ كەلگەن ناۋقاستارعا مەيىرىم-شۋاعىن توگىپ تۇراتىن ماماندار مۇندا دا بارشىلىق. ءبولىم مەڭگەرۋشىسى, ءبىرىنشى ساناتتى كارديوحيرۋرگ مۇحامەديار جايپانوۆتىڭ ايتۋىنشا, ارىپتەستەرى انەستەزيولوگ اقجان مىرزاقۇلوۆ, كارديوحيرۋرگتەر مۇحيت بيجانوۆ, مارات اقنيازوۆ, جالەل نۇربول سەكىلدى ماماندارمەن بىرلەسىپ, جىلىنا جۇزدەن استام ادامعا وپەراتسيا جاسايدى ەكەن.
«بىزگە ءتۇرلى دارەجەدە جۇرەگىنە سالماق تۇسكەن ناۋقاستار كۇن قۇرعاتپاي كەلىپ جاتادى. ولاردىڭ ءبىرىنىڭ جۇزىنەن ومىرگە دەگەن قۇشتارلىقتى بايقاساق, ەندى ءبىرى تاعدىردان باز كەشىپ كەتكەندەي كورىنەدى. دارىگەردىڭ مىندەتى – جانى شىرقىراپ اۋىرىپ تۇرعان ازاماتتارعا جىلى-جىلى ءسوز ايتىپ, ولاردىڭ بويىندا وزىنە دەگەن سەنىمدىلىكتى قالىپتاستىرۋ. وپەراتسيادان قاتتى قايمىعاتىندار از ەمەس. ءبىز مامان رەتىندە ولاردى قولداۋىمىز كەرەك», دەيدى مۇحامەديار تولەگەن ۇلى.
مۇحامەديار وبلىستىق اۋرۋحانانىڭ ءبولىم مەڭگەرۋشىسى قىزمەتىنە بىردەن توپ ەتە قالعان جوق. 19 جىل بۇرىن مەكتەپتى ۇزدىك تامامداعان تارازدىق تۇلەك اتا-اناسىنىڭ اقىلىن تىڭداپ, دارىگەر ماماندىعىنا اڭسارى اۋدى. سودان دا بولسا كەرەك, س.اسفەندياروۆ اتىنداعى جوعارى وقۋ ورنىنا ءتۇسىپ, ونى ۇزدىك اياقتادى.
قاي كەزدە دە ءبىلىمىن جەتىلدىرۋدى ماقسات تۇتقان م.جايپانوۆ 2013 جىلى تۇركيانىڭ ىستانبۇل قالاسىندا كارديوحيرۋرگيا ماماندىعى بويىنشا بىلىكتىلىكتى ارتتىرۋ كۋرستارىن ءساتتى اياقتاپ, جامبىل وبلىستىق اۋرۋحاناسىندا كارديوحيرۋرگ بولىپ جۇمىس ىستەي باستادى.
ىزدەنىس ىزىنە تۇسكەن بىلىكتى مامان ۇدايى ءبىلىمىن جەتىلدىرىپ وتىرۋدى وزىنە پارىز سانادى. ول 2012-2016 جىلدار ارالىعىندا الماتى قالاسىنداعى ۇزدىكسىز ءبىلىم بەرۋ مەديتسينالىق ۋنيۆەرسيتەتىنىڭ رەزيدەنتۋراسىندا ءبىلىم الىپ, وزىنە جۇكتەلگەن باعدارلامالىق مىندەتتەردى ءساتتى ەڭسەرگەنىن ايتا كەتكەن ءجون. ال 2016-2019 جىلدار ارالىعىندا حالىقارالىق قازاق-تۇرىك ۋنيۆەرسيتەتىندە دوكتورانتۋرادا وقۋىن جالعاستىرىپ, 2017 جىلى ماسكەۋ قالاسىنداعى بىلىكتىلىكتى ارتتىرۋ ۋنيۆەرسيتەتىندە اسپيرانتۋرا دارىگەرلەرى اراسىندا كارديوحيرۋرگيا سالاسى بويىنشا تاجىريبە الماسۋ تاعىلىمداماسىنان وتكەن.
دارىگەردىڭ ايتۋىنشا, وپەراتسيا جاساۋدى 2014 جىلى باستاعان. م.جايپانوۆتىڭ تىكەلەي ارالاسۋىمەن مىڭنان استام ناۋقاستىڭ ءۇمىت وتى قايتا مازداعان. ماماننىڭ ىسكەرلىگىمەن شاعىن ءينۆازيۆتى حيرۋرگيا ءادىسىن ىسكە اسىرۋ جۇمىسى دەر كەزىندە قولعا الىندى. قازىرگى كەزدە ول باسقاراتىن ءبولىم كەيدە جىلىنا جۇزدەن استام ناۋقاسقا اشىق كارديوحيرۋرگيالىق وپەراتسيا جاساسا, كەيبىر جىلدارى ءجۇز ەلۋدەن استام ناۋقاستىڭ ءومىرى ءۇشىن كۇرەسەدى.
«اكەم دە دارىگەر بولىپ جۇمىس ىستەگەن. ونىڭ اناسى فرانتسۋز ءتىلىن ۇيرەتكەن, سوندىقتان ۇلى بەس تىلدە ەركىن سويلەيدى جانە الەمنىڭ بارلىق زاماناۋي مەديتسينالىق تەحنولوگياسىنان ۇنەمى حاباردار بولىپ وتىرادى. مەن دە اسقار تاۋىمنىڭ ايتقان اقىلى مەن ناقىلىن تىڭداي ءجۇرىپ, كاسىبي مامان رەتىندە قالىپتاستىم. ول كىسىنىڭ ۇيرەتەرى ءالى دە كوپ», دەيدى دارىگەر.
وبلىستىق اۋرۋحانانىڭ ەسىگىنەن يمەنە ەنگەن ناۋقاستاردىڭ ءبىرى مۇقاڭ باستاعان مامانداردىڭ ارقاسىندا ومىرمەن قايتا قاۋىشقانىن ايتىپ وتىر. ول مۇحامەدياردىڭ كاسىبيلىگىن وتە جوعارى باعالايدى. كومانداسىنداعى ازاماتتارعا دا ايتار العىسى از ەمەس.
«جۇرەككە تۇسكەن جۇك جانىمدى جەگىدەي جەدى. وپەراتسيا جاساتۋدان ايتارلىقتاي قورقىپ ءجۇردىم. بىراق بۇل قادامعا بارماسام ءومىر ءجىبىنىڭ كىلت ءۇزىلۋى ىقتيمال ەكەنىن دارىگەرلەر تالاي ايتتى. تاۋەكەلگە بارماي ءىس ءبىتسىن بە؟ ءىس ناسىرعا شاپقان كەزدە وپەراتسيا جاساتۋعا تۋرا كەلدى. جۇزىنەن مەيىرىم نۇرى سەبەزگىلەگەن مۇحامەديار باستاعان ماماندار جىلى ءسوزىن ءۇيىپ-توكتى. وسىلايشا, بويىمدا سەنىمدىلىك ۇيالاتتى. ءوز ىسىنە ادال مامانداردىڭ ارالاسۋىمەن باسىمدا بولعان قيىندىقتىڭ ءبارى ارتتا قالدى. ارينە, قازىر ءتيىستى ەم-دومدى ۋاقتىلى قابىلداپ تۇرامىن. باستىسى كەۋدە تۇسىمداعى جۇدىرىقتاي ەت بۇرىنعىداي جانىمدى جەگىدەي جەگەندى قويدى», دەيدى قالا تۇرعىنى عاليا ءاجىم ءوز ويىمەن ءبولىسىپ.
جاساندى قان اينالىمى جانە جۇرەك سوعۋى بار كورونارلىق ارتەريانى شۋنتتاۋ, سول جاق قارىنشانىڭ انەۆريزماسىن كەسۋ (ميوكارد ينفاركتىسىنىڭ اسقىنۋى), قالپىنا كەلتىرۋ, جۇرەك قاقپاعىن مەحانيكالىق جانە بيولوگيالىق پروتەزدەرمەن اۋىستىرۋ جانە قاقپاقشا پلاستيكالىق حيرۋرگياسى, ەرەسەكتەردەگى تۋا بىتكەن جۇرەك اقاۋلارىن تۇزەتۋ وپەراتسيالارى سەكىلدى كۇردەلى وپەراتسيالاردى ساپالى اتقارۋ ارينە وڭاي ەمەس. ساقتىقتى ءارى كاسىبيلىكتى تالاپ ەتەدى.
مۇحامەديار جايپانوۆ پراكتيكالىق جۇمىستارمەن قاتار عىلىمي باعدارلامالارعا دا بەلسەندى قاتىسادى. حالىقارالىق عىلىمي جۋرنالدار مەن جيناقتاردا 20-دان استام عىلىمي-تاجىريبەلىك جۇمىسى جاريالانعان. ءبىرىنشى ساناتتى كارديوحيرۋرگ حالىقارالىق جانە رەسپۋبليكالىق عىلىمي كونفەرەنتسيالار مەن كونگرەسستەردە بىرنەشە رەت بايانداما جاساعان. الدەنەشە مارتە وبلىستىق دەنساۋلىق ساقتاۋ باسقارماسىنىڭ قۇرمەت گراموتاسىمەن جانە العىسحاتپەن ماراپاتتالعان. جاڭا ازىرلەمەلەردى الۋ ءۇشىن ول بىرنەشە رەت شەتەلدە, سونىڭ ىشىندە يزرايلدە, تۇركيادا جانە ەۋروپالىق كلينيكالاردا بىلىكتىلىگىن ارتتىرۋ كۋرستارىنان وتكەن.
ول جان جارىمەن بىرگە ءتورت بالانى تاربيەلەپ وتىرعان ۇلگىلى وتباسىنىڭ ارقاسۇيەر ازاماتى. گيپپوكرات انتىن قابىلداعان مامان ءۇشىن ادالدىق جولىنان اينىماۋ – ماڭىزدى ۇستانىم.
ء«بىزدىڭ جۇمىس – كىسى ءومىرىن ۇزارتۋ, ناۋقاستاردىڭ دەرتىنە شيپا تابۋ. ءاربىر ازاماتقا جاسالعان ءساتتى وپەراتسيا – جەكە ادامنىڭ ەمەس, جالپى ۇجىمنىڭ جەڭىسى. ادام جالعىز ءجۇرىپ جەتىستىككە جەتە المايدى. قاسىمداعى ازاماتتاردىڭ كاسىبيلىگى مەن بىلىكتىلىگىنىڭ ارقاسىندا جۇمىسىمىز العا باسىپ وتىر. سول ءۇشىن دە باسشىلىققا, قاسىمداعى ارىپتەستەرىمە ايتار العىسىم زور» دەيدى ول.
جامبىل وبلىسى