«سوڭعى كەزدە باتىس قازاقستان وبلىسىندا كامەلەتكە تولماعانداردىڭ سەبەبىنەن بولعان كولىك اپاتى جيىلەپ كەتتى» دەپ دابىل قاعادى وبلىستىق ىشكى ىستەر دەپارتامەنتى. مۇنىڭ ىشىندە اقىرى ادام ولىمىمەن اياقتالعان وقيعالار دا بار.
بيىلعى ءساۋىر ايىنىڭ العاشقى كۇنى ورال قالاسىندا كامەلەتكە تولماعان بالا «Lada 219220» اۆتوكولىگىنىڭ رولىنە وتىرىپ الىپ, ابىلقايىر حان داڭعىلىنىڭ بويىندا, ءدال ايالداما جانىندا 37 جاستاعى جاياۋ جۇرگىنشىنى قاعىپ كەتتى. جول-كولىك وقيعاسى سالدارىنان جاياۋ جۇرگىنشى اۋرۋحانادا قايتىس بولدى.
11 مامىردا اقساي قالاسىندا كامەلەتكە تولماعان تاعى ءبىر ءجاسوسپىرىم «Suzuki» ماركالى اۆتوكولىگىمەن 3 جاسار بالانى قاعىپ كەتتى. بايعۇس بالا دا العان جاراقاتى سالدارىنان اۋرۋحانادا كوز جۇمدى.
27 مامىر كۇنى كەشكىسىن ورال قالاسىنداعى چايكين جانە كوكشەتاۋ كوشەلەرىنىڭ قيىلىسىندا سكۋتەر مەن «Hyundai» ماركالى اۆتوكولىك سوقتىعىسقان. سكۋتەردىڭ كامەلەتكە تولماعان جۇرگىزۋشىسى مەن جولاۋشىسى ءتۇرلى دەنە جاراقاتىمەن اۋرۋحاناعا جەتكىزىلدى.
– وسى ايتىلعان بارلىق فاكت بويىنشا قىلمىستىق ءىس قوزعالدى. قازىر تەرگەۋ جۇرگىزىلىپ جاتىر. ونىڭ قورىتىندىسىمەن اپاتقا قاتىستىلاردىڭ ارقايسىسىنىڭ كىناسى انىقتالادى, – دەيدى باتىس قازاقستان وبلىستىق پوليتسيا دەپارتامەنتى جەرگىلىكتى پوليتسيا قىزمەتى باستىعىنىڭ ورىنباسارى بولات جاڭاباەۆ.
پوليتسيا اتا-انالار مەن زاڭدى وكىلدەر تاراپىنان كامەلەتكە تولماعاندارعا ءتيىستى باقىلاۋ بولماي تۇر دەيدى. سوندىقتان جوعارىداعى جول-كولىك وقيعالارىنا كىنالى بولعان جاسوسپىرىمدەردىڭ اتا-اناسى دا قىلمىستىق جاۋاپكەرشىلىككە تارتىلۋى مۇمكىن.
بيىل جىل باسىنان بەرى وبلىستا 228 جول-كولىك وقيعاسى تىركەلسە, ونىڭ سالدارىنان 27 ادام قازا تاۋىپ, 318 ادام جاراقات العان. سونىڭ ىشىندە بالالاردىڭ قاتىسىمەن 46 جول-كولىك وقيعاسى بولىپتى. ناتيجەسىندە, ءتورت بالا قازا تاۋىپ, 54-ءى ءتۇرلى دەنە جاراقاتىن العان. وسىعان بايلانىستى جەرگىلىكتى پوليتسيا جۇرگىزۋشىلەر مەن جاس جۇرگىنشىلەرگە جولدا اسا مۇقيات بولۋ قاجەتتىگىن ەسكەرتەدى.
باتىس قازاقستان وبلىسى