جوبا قۇنى 28 ملرد تەڭگەگە جۋىقتايتىن ۇلكەن كاسىپورىننىڭ ەلدەگى قۇرىلىس سالاسىنداعى ورنى ەرەكشە. ايتىپ وتىرعانىمىز, «Modex Astana» جەكە سەرىكتەستىگى – استانا قالاسى ماڭىنداعى №1 يندۋستريالىق پاركتە ورنالاسقان تەمىربەتوندى قۇراستىرمالى بلوك-مودۋل شىعاراتىن ءوندىرىس ورنى. دۇرىسى مۇندا كوپقاباتتى ءۇيدىڭ ءار بولمەسى مەن بولىكتەرى (ەدەنى, توبە, قابىرعالارى, سونداي-اق بالكون بولىكتەرى, ت.ب.), جەكە-جەكە قۇيىلىپ ءارى وسىندا قۇراستىرىلادى.
اۋەلگى كەرەگى – ءتارتىپ
قاۋىپسىزدىك جونىندەگى جەتەكشى ينجەنەر ينديرا توقمولدينا بىزگە قاۋىپسىزدىك ەرەجەلەرىن ءتۇسىندىردى. اۋەلى باسقا قورعانىس كاسكاسىن, ودان سوڭ ۇستىمىزگە جارىققا شاعىلىسقىش جيلەت كيۋ كەرەك. ايتپەسە, الىپ عيماراتتىڭ ىشىندە ءتۇرلى وقىس جاعدايعا ۇرىنۋىمىز بەك مۇمكىن.
«تسەح ءىشىن ارالاعاندا اياق استىنا مۇقيات بولىڭىزدار. ويتكەنى رەلس سىزىقتارى مەن باسقا دا جۇمىس بارىسىنا قاجەتتى ويىقشالار كەزىگەدى. سولاردى اتتاپ وتۋگە تۋرا كەلەدى. سوندىقتان ينجەنەرمەن بىرگە ارنايى جول جولاعىمەن ءجۇرۋدى قاتاڭ ەسكەرتەمىن. ارنايى بلوكتەر مەن ماتەريالداردىڭ, سونداي-اق تسەحتىڭ جوعارى بولىگىنە شىقپاۋعا كەڭەس بەرەمىن. وندا ءوزىنىڭ ارنايى ماماندارى عانا جۇمىس ىستەيدى. ەڭ باستىسى, جۇكتەردى كرانمەن تاسىمالداۋ كەزىندە ونىڭ استىندا تۇرمايمىز», دەپ ەسكەرتۋلەرگە تولى ەرەجەلەردى ايتىپ شىقتى جەتەكشى ينجەنەر.
جالپى, مۇنداعى ەڭ باستى قاعيدا – ءتارتىپ ەكەنى كوزگە بىردەن ۇرىپ تۇر.
تەمىربەتوندى تسەحتىڭ تىرشىلىگى
جالپى, زاۋىت بەس بولىككە بولىنەدى ەكەن. باس وفيس, باستى وندىرىستىك كورپۋس, بەتون قوسپاسى تسەحى, ارلەۋ ماتەريالدارى جانە ينەرتتى ماتەريالدار قويماسى. ال ءبىز باستى وندىرىستىك كورپۋس ىشىنە كىرىپ, الدىمەن ارماتۋرا بۇيىمدارىن وڭدەۋ تسەحىنا باس سۇقتىق. بۇدان بولەك, مۇندا بولمە بلوكتارىن قالىپتاۋ, قوسىمشا ەلەمەنتتەر تسەحى, تولىق جيناقتاۋ جانە ارلەۋ تسەحى, زەرتحانا, ت.ب. بولىكتەر ورنالاسقان.
«مۇندا ءار بولمەنىڭ ءتورت قابىرعاسى, ەدەنى مەن توبەسىنە قاجەتتى ارماتۋرا توقىلىپ, ارنايى مونتاجبەن قالىپ ىشىنە ورنالاستىرىلادى. وعان قاجەتتى ارماتۋرانىڭ وزىندىك ولشەمى بار. ءارى قاراي قاجەتتى ماركاداعى بەتوندى قۇيىپ, بەلگىلى ولشەممەن ءونىم دايىندايمىز. مىسالى, تسەحتا ءبىر بولمەنى تۇتاستاي قۇياتىن, ءتىپتى سول بولمە اۋماعىندا بالكون بولاتىن بولسا, ونى دا بىرگە قۇيىپ, بىردەن دايىندايتىن ارنايى قالىپتار بار. ليفت قابىرعالارى مەن باسپالداقتار دا سولاي دارا قۇيىلادى. ءبىز ايتىپ وتىرعان الگى بولىكتەر جان-جاقتان ءبىر جەرگە جيىلىپ, ارتىنشا مونتاجداۋ تسەحىندا, ياعني ارنايى بلوكتاردى قۇراستىرۋ الاڭىندا ءوز ماماندارىنىڭ قاتىسۋىمەن قۇرالادى. سودان سوڭ ارلەۋ جۇمىستارى جۇرەدى. دەمەك, ءسىز زاۋىتتا ءبىر پاتەردىڭ قوناق, جاتىن نەمەسە اسحانا بولمەسى, سونداي-اق جۋىناتىن جانە كىرەر اۋىزعى بولمەلەردىڭ جەكە-جەكە قۇيىلىپ, ارتىنان قۇراستىرىلاتىنىن كورىپ تۇرسىز. ءتۇرلى شارشى مەتردەگى بولمەلەر ابدەن دايىن بولعاندا كوتەرگىش كرانمەن جانە جىلجىمالى رەلس ارقىلى سىرتقا شىعارىلىپ, ودان سوڭ ارنايى تاپسىرىسپەن قۇرىلىس الاڭىنا كەتەدى. ارينە, الدىمەن ساپانى قاداعالاۋشى مامانداردىڭ تەكسەرۋىمەن عانا ءار جۇمىس ۇدەرىسى قاتاڭ تەكسەرىستەن وتەدى. ءجۇز پايىز سەنىم بىلدىرىلگەن ءۇي بلوكتارىن عانا قۇرىلىس كومپانيالارى پايدالانا الادى», دەيدى زاۋىتتاعى باستى وندىرىستىك كورپۋستىڭ ينجەنەرى المات ەرجانوۆ.
راسىمەن سولاي ەكەن. ءبىز تۇسىنگەندەي, مۇندا ءار قابىرعا عانا ەمەس, ءبىر بولمەنىڭ ءوزىن بەكىتىلگەن ولشەممەن ارنايى قالىپتا قۇيىپ, ءتىپتى ونىڭ توك كوزدەرى جانە سۋ جولدارىنا (كاناليزاتسيا) دا ورىن قالدىرا وتىرىپ, دايىندايتىنى كورىنىپ-اق تۇر. ەدەندى جىلىتۋ ءۇشىن دە توك جەلىسى دە تارتىلادى. دۇرىسى, بەتوندى قالىپقا قۇيماس بۇرىن, ءبىر بولمەنى ىشىنە قاجەتتى ەلەكتر جەلىلەرىن الدىن الا تارتىپ, سۋ قۇبىرلارىنا ويىقتار قالدىرىلىپ, ودان سوڭ بارىپ قالىپ كيگىزىلىپ, ارتىنشا تسەمەنتىن قۇيادى.
«زاۋىتتاعى ءونىمدى دايىنداۋعا ارنالعان جابدىقتار يتاليالىق تەحنولوگيامەن جاساقتالعان. ازىرگە ءونىم استانا قالاسىنداعى قۇرىلىستا پايدالانىلۋدا. ايتپاقشى, ءبىر ءمان بەرەتىن نارسە, ءبىز بولمەنىڭ ءىشىن گيپسوكارتونمەن ءبولىپ, سونداي-اق بالكون قابىرعالارىن جىلۋ ۇستاۋ ءۇشىن مينەرالدى ماتامەن قاپتايمىز. سونداي-اق بولمە قابىرعالارىن بىردەن تۇسقاعاز جاپسىراتىنداي تەپ-تەگىس كۇيدە ارلەپ, دايىندايمىز. تەرەزەلەرىنە دەيىن ارنايى كومپانيا كەلىپ سالىپ بەرەدى. بۇل – ءۇي ساتىپ الۋشىلارعا دا ۇلكەن كومەك», دەيدى زاۋىتتىڭ كادرلىق رەسۋرستار جونىندەگى باس مەنەدجەرى تالعات شايكەنوۆ.
تاڭبالىق بەلگىسى 250, 300-تسەمەنت, قيىرشىق تاس, ارماتۋرا جانە كەرامزيت. قۇرامىندا وسىنداي عانا زاتتار بار ءۇي بلوكتارىنىڭ ەرەكشەلىگى نەدە؟ زاۋىت ينجەنەرلەرىنىڭ ايتۋىنشا, بۇل قۇرىلىستى جەدەلدەتەدى. 17 قاباتقا دەيىن ءار بولمە بلوكتارى مەن وزگە بولىكتەرىن ءبىر-بىرىنە ارنايى تارتىپپەن قۇراۋ ارقىلى كوپقاباتتى ءۇيدىڭ ەڭسەسىن ءبىر-ەكى اي ىشىندە جەدەل كوتەرۋگە بولادى ەكەن. قاراپايىم تىلمەن ايتساق, كىرپىش قالاعانداي, كوتەرگىش كراننىڭ كومەگىمەن ءورىپ شىعادى-مىس. ارينە, بۇعان ءوزىنىڭ ماماندارى, قۇرىلىسشى-مونتاجداۋشى شەبەرلەر قاتىسادى.
ال زاۋىتتىڭ ينجەنەر-كونسترۋكتورى ايدانا ابدىعاپپاردىڭ ايتۋىنشا, جىلىنا 200 مىڭ شارشى مەتر ءۇي بلوكتارىن شىعاراتىن زاۋىت اشىلعانىنا 3 جىل ۋاقىت ءوتتى. قازىر استانا قالاسىنداعى ءۇش اۋماقتا 9, 12 جانە 17 قاباتتان تۇراتىن ءۇي قۇرىلىسى وسى زاۋىتتان شىعاتىن بلوكتارمەن سالىنۋدا. ەسىلدىڭ سول جاعالاۋىنان تۇرعىزىلىپ جاتقان «وڭاي», «وڭاي-1» جانە «MoD. Standard» دەپ اتالاتىن جاڭا تۇرعىن ءۇي كەشەنىنىڭ قۇرىلىسى وسىنداي مودۋلدىك تەحنولوگيامەن بوي كوتەرىپ كەلەدى.
جۇمىسشىلارعا جايلىلىق بار
«Modex Astana» مودۋلدىك قۇرىلىس زاۋىتىندا ەكى اۋىسىممەن 350 ادام جۇمىس ىستەيدى. ورتاشا جالاقى دەڭگەيى 460 مىڭ تەڭگەدەن اسادى. ءار اۋىسىمعا كەلەتىن جۇمىسشىلارعا ءۇش اۆتوبۋس جانە تەگىن اس ءمازىرى قاراستىرىلعان.
ء«ار جۇمىسشى ءوز اۋىسىمىندا ارنايى بولمەدەگى وزىنە عانا تيەسىلى كيىم مەن جەكە م ۇلىكتىك زاتتارىن سالاتىن شكافتى پايدالانادى. ونىڭ دا قىزمەتكەرگە بەكىتىلگەن ارنايى ءنومىرى بار. جۋىناتىن بولمە ۇنەمى تازا تۇرادى, تازالىققا قاجەتتى زاتتارمەن قامتىلادى», دەيدى مەنەدجەر ت.شايكەنوۆ.
ونىڭ سوزىنشە, مەرەكە كۇندەرى زاۋىت باسشىلىعى قىزمەتكەرلەرىنە سىياقى تاعايىنداپ, الەۋمەتتىك جەڭىلدىكتەر ۇيىمداستىرىپ تا كەلەدى. ۇيلەنۋ تويى, ءسابيلى بولۋ نەمەسە ەڭ جاقىن ادامى ومىردەن وتكەن جاعدايدا كاسىپورىن قىزمەتكەرىنىڭ جاعدايىن نازاردان تىس قالدىرعان ەمەس. ويتكەنى بۇل جۇمىس ونىمدىلىگىنە تىكەلەي اسەر ەتەتىن فاكتور ەكەنى انىق.