3–5 مامىر ارالىعىندا تاجىكستاننىڭ باس شاھارى دۋشانبەدە دزيۋدودان Grand Slam ءتۋرنيرىنىڭ جالاۋى جەلبىرەيدى. وليمپيا ويىندارىنا قاتىسۋ ءۇشىن رەيتينگتىك ۇپايلار بەرىلەتىن باسەكەدە قازاقستاننىڭ تۋى استىندا ماعجان شامشادين, نۇرقانات سەرىكباەۆ (60 كگ), ەلامان سۇلتانباي, الماس عالىموۆ (66 كگ), داستان شاياحمەتوۆ, دارحان قويباعار (73 كگ), ابىلايحان جۇبانازار (81 كگ), ايان بايعازى, ديدار حامزا (90 كگ), يسلام بوزباەۆ, نۇرلىحان شارحان (100 كگ), ەلامان ەرعاليەۆ جانە ەراسىل قاجىباەۆ (+100 كگ) سىندى ساڭلاقتار ونەر كورسەتەدى.
فۋتبولدان قازاقستان پرەمەر-ليگاسىنىڭ التىنشى تۋر ويىندارى اياقتالدى. بۇل ماتچتاردا مىناداي ەسەپتەر تىركەلدى: «تۇران» – «استانا» – 0:2, «اتىراۋ» – «قىزىلجار» – 2:0, «توبىل» – «جەڭىس» – 1:1, «قايسار» – «قايرات» – 1:0, «ەلىماي» – «ورداباسى» – 1:1, «جەتىسۋ» – «ورداباسى» – 2:1.
ستەند اتۋدان ەدۋارد ەششەنكو پاريج وليمپياداسىنىڭ جولداماسىنا يەلىك ەتتى. ول «سكيت» باعدارلاماسى بويىنشا ىرىكتەۋدەن ءوتىپ, فينالعا جولداما الدى. ناتيجەسىندە, ءۇشىنشى ورىندى ەنشىلەپ, عالامدىق دوداعا قاتىساتىن سپورتشىلاردىڭ تىزىمىنە قوسىلدى. بۇل – مەرگەندەردىڭ ەكىنشى جولداماسى. بۇعان دەيىن «تراپ» جاتتىعۋى بويىنشا ماريا دميتريەنكونىڭ باعى جانعان ەدى.
جەڭىل اتلەتيكادان شانحايدا وتكەن «گاۋھار ليگاسى» تۋرنيرىندە دەيزي دجەپكەمەي ءساتسىز ونەر كورسەتتى. قازاقستاننىڭ نامىسىن قورعايتىن كەنيالىق لەگيونەر 3 000 مەترگە جۇگىرۋدە مارە سىزىعىن جەتىنشى بولىپ قيىپ ءوتتى. ونىڭ كورسەتكىشى – 9:25.10. بۇل جارىستىڭ باس جۇلدەسىن كەنيانىڭ جەلاياعى بەاتريس چەپكوەچ (9:07.36) ولجالادى. ۋگاندالىق پەرۋت چەمۋتاي (9:15.46) كۇمىس السا, گەرمانيالىق گەزا-فەليسيتاس كراۋزە (9:16.24) قولاعا قول سوزدى.
انگليانىڭ حايتون قالاسىندا وتكەن جارىستا ورتا سالماقتا جۇدىرىقتاسىپ جۇرگەن تانىمال كاسىپقوي بوكسشى تۇرسىنباي قۇلاحمەت (7-1, 5 كو) پولشالىق روبەرت تالارەكپەن (28-25-3, 19 كو) كۇش سىناستى. بۇل جەكپە-جەك ءتورتىنشى راۋندتا جەرلەسىمىزدىڭ ايقىن جەڭىسىمەن اياقتالدى.
قىتايدا تۋىپ-وسكەن قازاق فايتەرى ماقسات قايسار (9-3) UFC-دەگى ءتورتىنشى كەزدەسۋىن وتكىزدى. اقش-تىڭ لاس-ۆەگاس قالاسىندا ۇيىمداستىرىلعان جارىستا قانداسىمىز 35 جاستاعى مەكسيكانىڭ مارقاسقاسى گابريەل بەنيتەستەن (23-11) باسىم ءتۇستى.
دزيۋدودان ەلىمىزدىڭ جاستار قۇراماسى كەزەكتى وقۋ-جاتتىعۋ جيىنىن تۇركىستان وبلىسىنداعى «الما تاۋ» بازاسىندا وتكىزىپ جاتىر. جەرلەستەرىمىزدەن بولەك بۇل جەردە وزبەكستان مەن تۇرىكمەنستاننىڭ دا بالۋاندارى جاتتىعىپ ءجۇر.
فۋتبولدان قازاقستاننىڭ ليگا كۋبوگىنىڭ جەرەبەسى تارتىلدى. جۇلدە قورى 1 ملن دوللاردى قۇرايتىن ءدۇبىرلى دوپ دوداسىنىڭ توپتىق تۋرنيرىندە مىنا كوماندالار ءوزارا شەبەرلىك بايقاسادى: ا توبىندا – «قايرات», «قىزىلجار», «اقجايىق», «تاراز»; B توبىندا – «توبىل», «اقتوبە», «قايسار», «جەڭىس»; س توبىندا – «ورداباسى», «اتىراۋ», «تۇران», «ەلىماي»; D توبىندا – «استانا», «شاحتەر», «جەتىسۋ», «كاسپي». بۇل جارىس 25 مامىردا باستالىپ, 24 قاراشادا مارەگە جەتەدى.
ءبىرىنشى ورتا سالماقتا جۇدىرىقتاسىپ جۇرگەن 33 جاستاعى قازاقتىڭ كاسىپقوي بوكسشىسى باتىر جۇكەمباەۆ 22 مامىردا اقش-تىڭ پلانت-سيتي قالاسىندا ۋكراينالىق يۆان رەدكاچپەن كۇش سىناسادى. 33 جاستاعى جامبىل بوكس مەكتەبىنىڭ تۇلەگى وسى كۇنگە دەيىن 21 رەت رينگكە كوتەرىلىپ, سول باسەكەلەردىڭ بىرەۋىندە عانا ۇتىلدى. باتىر 14 قارسىلاسىن نوكاۋتقا جىبەردى. 38 جاستاعى ۋكراينا بوكسشىسى 31 كەزدەسۋدىڭ 24-ءىن ءوز پايداسىنا شەشتى. رەدكاچ 19 باسەكەنى مەرزىمىنەن بۇرىن اياقتادى.