قازاقتىڭ ايگىلى كاسىپقوي بوكسشىسى, ورتا سالماقتاعى WBO مەن IBF نۇسقالارى بويىنشا الەم چەمپيونى جانىبەك الىمحان ۇلىمەن جۇدىرىقتاسۋعا اتاق-داڭقى الىسقا تاراعان جىگىتتەردىڭ وزدەرى جۇرەكسىنەتىنى جاسىرىن ەمەس. سول سەبەپتى دە قازىرگى كەزدە وعان قارسىلاس تابۋدىڭ ءوزى وڭاي بولماي تۇر.
«Qazaq style» دەگەن جاناما ەسىمدى تاڭداعان 31 جاستاعى جانىبەكتىڭ جۋىق ارادا « ۇلىبريتانيانىڭ وكىلى حامزا شيرازبەن قولعاپ ءتۇيىستىرۋى مۇمكىن» دەگەن اڭگىمە بۇل كۇندەرى جەلدەي ەسىپ تۇر. ال سول بوكسشى جايىندا نە بىلەمىز؟ حامزا 24 جاستا. لوندوننىڭ يلفورد ايماعىندا دۇنيەگە كەلگەن ول 2017 جىلدان بەرى كاسىپقوي رينگتە كۇش سىناسىپ ءجۇر. سول ارالىقتا 19 كەزدەسۋ وتكىزىپ, بارلىعىندا جەڭىسكە جەتتى. 15 باسەكەدە ايقىن باسىمدىق تانىتتى. بۇل بىلعارى قولعاپ شەبەرىنىڭ WBO نۇسقاسى بويىنشا ەۋروپا چەمپيونى دەگەن اتاعى بار.
ءوز جەكپە-جەكتەرىن ۇلىبريتانيادا عانا وتكىزەتىن حامزا شيراز شەتەلدە ءبىر رەت قانا ونەر كورسەتكەن ەكەن. بىلتىر تامىز ايىندا ول پولشانىڭ ۆروتسلاۆ قالاسىندا ۋكراينانىڭ مىقتى بوكسشىسى دميتري ميتروفانوۆتى ەكىنشى راۋندتا ەسىنەن تاندىردى. سول جارقىن جەڭىستەردەن كەيىن تۇماندى البيون ەلى وكىلىنىڭ داڭقى ورلەدى. سوڭعى جەكپە-جەگىندە حامزا كەزىندە الەم چەمپيونى اتاعىنان ۇمىتكەردىڭ ءبىرى بولعان ءوزىنىڭ وتانداسى ليام ءۋيليامستىڭ تاس-تالقانىن شىعاردى. 10 اقپاندا لوندوندا ۇيىمداستىرىلعان بۇل باسەكەنىڭ تاعدىرى ءبىرىنشى راۋندتا-اق شەشىلدى. شيرازدىڭ شابۋىلىنا قارسىلاسى تويتارىس بەرە المادى. ساناۋلى سەكۋندتار ارالىعىندا ليام ەكى رەت نوكداۋنعا ءتۇستى. شاكىرتىنىڭ شاراسىز كۇيىن كورگەن باپكەرىنىڭ رينگكە اق ورامال تاستاۋدان باسقا امالى قالمادى. ال وسىدان ەكى-ءۇش جىل بۇرىن عانا ءدال وسى ۋيليامس اتاعى الىسقا جايىلعان دەمەتريۋس اندرادە مەن كريس يۋبەنك سىندى دۇلدۇلدەرگە دەس بەرمەي, 12 راۋند بويى ايىزى قانعانشا ايقاسقان ەدى.
ورتا سالماقتاعى بوكسشىلاردان حامزانىڭ ءىرى ءارى ەڭسەلى ەكەنى بىردەن بايقالادى. ماسەلەن, ونىڭ بويى جانىبەكتەن تۋرا 10 سانتيمەتر ۇزىن. اعىلشىن بوكسشىسىنىڭ ودان دا باسقا ارتىقشىلىقتارى جەتەرلىك. اتاپ ايتساق, شيرازدىڭ دجەبى وتە كۇشتى. ءبىراز قارسىلاسىن ول سول سوققىمەن-اق سۇلاتىپ سالدى. حامزا وڭ قولمەن دە, سول قولمەن دە جاقسى ۇرادى. جانە دە سوققىلارى وتە جويقىن. ۇلىبريتانيادا ونى «دجەبتىڭ كورولى» دەپ اتايدى. ءبىر انىعى, بۇل جەكپە-جەكتە جانىبەككە وڭاي بولمايدى.
ال قازاقتىڭ قايسار ۇلىنىڭ ءجۇرىپ وتكەن جولى بارشا قازاق جانكۇيەرلەرىنىڭ كوز الدىندا. بوزبالا شاعىندا-اق دارا تالانتىمەن وقشاۋلانعان جانىبەك اۋەسقوي رينگتە تولاعاي تابىسقا قول جەتكىزدى. مۇرات سيقىمباەۆتاي بىلىكتى باپكەردەن ءتالىم العان جەتىسۋ ءوڭىرىنىڭ تۋماسى 2013–2014 جىلدار ارالىعىندا الەم جانە قۇرلىق چەمپيونى, ازيا ويىندارىنىڭ جەڭىمپازى اتاندى. 2016 جىلى ريو وليمپياداسىندا شيرەك فينالعا دەيىن جەتتى. كاسىپقوي رينگتەگى 15 جەكپە-جەكتىڭ بارلىعىن ءوز پايداسىنا شەشىپ, 10 قارسىلاسىن نوكاۋتقا جىبەردى.
وتكەندە ساۋد ارابياسىنىڭ استاناسى ەر-ريادتا ۇلىبريتانيالىق ەنتوني دجوشۋا مەن فرانتسيالىق فرانسيس نگاننۋدىڭ كۇش سىناسقانى بەلگىلى. الىپتاردىڭ ايقاسى اعىلشىن بوكسشىسىنىڭ ايقىن جەڭىسىمەن اياقتالدى. سول كەشتە جانىبەك ءالىمحان ۇلى مەن حامزا شيراز بەتپە-بەت كەزدەستى. ەكەۋى ءبىر-بىرىمەن كوز ءتۇيىستىرىپ, ءبىراز تىلدەسىپ تە ۇلگەردى. ەندى قوس تاراپ ورتاق مامىلەگە كەلسە, وندا جانكۇيەرلەردى وتە قىزىقتى جەكپە-جەكتىڭ كۇتىپ تۇرعانى انىق. ولاي دەۋگە نەگىز – ەكەۋى ءۇشىن دە ۇلكەن سىناق. شىنىن ايتۋ كەرەك, ءدال وسىنداي دەڭگەيدەگى بوكسشىمەن قانداسىمىزدىڭ جولى ءالى قيىسقان ەمەس. ەگەر شيرازدى ۇتسا, ءالىمحان ۇلىنىڭ ابىرويى ودان ءارى اسقاقتاي تۇسەتىنى انىق. ەكىنشى جاعىنان قازاق جىگىتىنە شەگىنەرگە جول جوق. ويتكەنى حامزا WBO رەيتينگىندە ءبىرىنشى ورىندا تۇر. ياعني «Qazaq style» ۇلىبريتانيالىق وعلانمەن مىندەتتى تۇردە جۇدىرىقتاسۋعا ءتيىس. ەگەر باس تارتسا, التىن بەلبەۋىنەن ايىرىلادى. سونىمەن قاتار «دجەبتىڭ كورولى» – WBC تىزىمىندە ەكىنشى ورىندا. بۇل نۇسقانىڭ چەمپيوندىق اتاعى امەريكالىق دجەرمالل چارلوعا تيەسىلى. «ۋاقىتشا چەمپيون» اتاعىن دومينيكاندىق كارلوس ادامەس يەلەنىپ وتىر. ال وسى رەيتينگتە ءبىزدىڭ تاعى ءبىر مىقتى بوكسشىمىز مەيىرىم نۇرسۇلتانوۆ ءبىرىنشى ورىندا.
حامزانىڭ جانىبەكپەن جۇدىرىقتاسۋدان باس تارتپايتىنى انىق. ويتكەنى بۇل – ۇلىبريتانيانىڭ ارلانى ءۇشىن ءوزىنىڭ مىقتىلىعىن تۇبەگەيلى مويىنداتۋدىڭ بىردەن-ءبىر جولى. ءدال قازىر حامزا ءوزىنىڭ اتاق-داڭقىن شارتاراپقا تاراتىپ, ءوز ەلىندە عانا ەمەس, باسقا دا سان ميلليون جانكۇيەردىڭ الدىندا ابىرويىن اسقاقتاتۋعا اسا مۇدەللى. ەگەر باعى جانىپ جاتسا, «دجەب پاتشاسى» ەكى بىردەي بەلدى نۇسقا بويىنشا الەم چەمپيونى اتانادى. الدىنا بيىك ماقسات قويعان بوكسشىلاردىڭ ەشبىرى ونداي مۇمكىندىكتى قالت جىبەرمەۋگە تىرىساتىنى انىق.
جانىبەك ءالىمحان ءۇشىن دە بۇل باسەكەنىڭ بەرەرى كوپ. ولاي دەۋگە نەگىز, قازاقتىڭ ءور مىنەزدى ورەنى حامزا شيرازدى جاقسىلاپ تۇرىپ ساباسا, بۇگىنگى تاڭدا داڭقى دۇركىرەپ تۇرعان ساۋل الۆارەس نەمەسە دجەرمالل چارلو سىندى دۇلدۇلدەرمەن ايقاسۋعا مۇمكىندىك تۋىندايدى. ال جانىبەكتىڭ سول ساڭلاقتارمەن ءالى كۇنگە دەيىن جولىعا الماي جۇرگەنى بەلگىلى.
كاسىپقوي بوكسشىلاردىڭ باستى ماقساتى – اتاق پەن ابىرويعا كەنەلىپ, ءوز ءداۋىرىنىڭ دارا تۇلعاسى اتانۋ. سول ارقىلى مال تابۋعا, مول ولجاعا كەنەلۋگە جانە ۇلدە مەن بۇلدەگە ورانۋعا دا بولادى. ال وسى جاعىنان العاندا ءالىمحان ۇلى مەن شيرازدىڭ اراسىنداعى جەكپە-جەكتى «وتە ءتيىمدى جوبا» دەپ قاراستىرۋعا بولادى. ءبىرى – قازاقتىڭ عانا ەمەس, جەر-جاھان جانكۇيەلەرىنىڭ كوزايىمىنا اينالعان امبەباپ بوكسشى. ەكىنشىسى – بۇكىل ۇلىبريتانيا تابىنىپ وتىرعان دارىن يەسى. قازىردىڭ وزىندە قوس ساڭلاقتىڭ سايىسىن كورۋگە بارشا جۇرت ەرەكشە قۇشتارلىق تانىتىپ وتىر. قوس تاراپتىڭ ورتاق مامىلەگە كەلگەنىن تاعاتسىزدانا كۇتىپ وتىرعان كاسىپقوي بوكستىڭ اينالىسىندا جۇرگەن پىسىقايلار دا الاقاندارىن ىسقىلاۋدا. ولاي بولسا, تارتىناتىن ەشتەڭەسى جوق. جۋىق ارادا ءبىز «Qazaq style» مەن «دجەب كورولىنىڭ» ايقاسىن كورۋىمىز ابدەن مۇمكىن.