«بالالار ادەبيەتىن جازۋ دا بالانىڭ كوزىنىڭ اينالاسىن قالاممەن سىزۋ سەكىلدى. ەگەر دۇرىس جازا الماساڭىز, قاراشىعىن اعىزىپ جىبەرگەنىڭىز...», دەيدى اقىن ەرلان ءجۇنىس. راسىندا, بالانىڭ سانا-سەزىمىنە لايىقتاپ كىتاپ جازۋ كەز كەلگەن قالامگەردىڭ قولىنان كەلە بەرمەيدى. ال ءبىز جازعالى وتىرعان كىشكەنتاي وقىرمانعا ارنالعان «بالعىن داۋىس» كىتابى – اۆتوردىڭ بالا كۇنىندە ءسابي كوڭىلمەن جازعان جاندى ءۇنى.
بالا كەزىمىزدە كوبىمىز اقىن بولساق, جازۋشى بولساق دەپ ارماندادىق قوي. ارمانعا الىپ ۇشقان ءسابي كوڭىلدىڭ شابىتى قانشاما ولەڭ تۋدىرىپ, كۇندەلىك داپتەرىمىزگە وسىنداي قانشاما قيالشىل وي جازعىزدى. «بالعىن داۋىس» كىتابى دا 6-سىنىپ وقۋشىسى گۇلسىمنىڭ قالامىنا قۋات بەرگەن ارمانىنان تۋىپ, جارىق كوردى. جيناققا ونىڭ ولەڭدەرى, اڭگىمەلەرى, كۇندەلىگى ەنگەن. كىتاپ ء«ومىر تولقىنى», «العاشقى ارماندار», «بالاۋسا جىرلار», «بالعىن شاقتىڭ بەلەستەرى» اتتى ءتورت بولىمنەن تۇرادى. ءار بولىمدە وقىرماننىڭ قيالىنا قانات بىتىرەتىن, ادامدىق قاسيەتتەرگە باۋليتىن, شابىتتاندىراتىن, جاقسى ويلارعا جەتەلەيتىن كىرشىكسىز تۋىندىلار بار. ماسەلەن مىنا ءبىر:
«تۋعان جەر, تۋعان ولكەم, بايتاق دالام
سەن دەسە كوڭىلىمدە شاتتىق قادام.
سەن بەرگەن قىزىقتى ءومىر, مول بايلىقتى
يگەرىپ, تۋعان وتان, بەرەم ساعان», –
دەگەن ولەڭ جولدارى ارقايسىمىزدىڭ موينىمىزدا وتان الدىنداعى پەرزەنتتىك پارىزىمىز بارىن ەسكە سالادى. ال كىشكەنتاي وقىرماننىڭ بويىنا تۋعان جەردىڭ قاسيەتتى ەكەنىن ءتۇسىندىرىپ, وتانشىلدىق ءدانىن سەبەدى.
«دانانى ماماسى ازەر وياتتى...», دەپ الاڭسىز باستالعان جەكسەنبىنىڭ تاڭىنداعى وقيعانى باياندايتىن اڭگىمەدە بالانى ەڭبەككە باۋليتىن ۇلكەن ءمان جاتىر. العاش رەت ءوزى نان پىسىرگەن دانا ماقتاۋ ەستىپ, اناسىنىڭ ريزاشىلىعىن الىپ, ەڭبەكتىڭ نانى ءتاتتى ەكەنىن تۇسىنەدى. مىنە, كىتاپتا وسى سارىنداس ادامي قۇندىلىقتارعا نەگىزدەلگەن, بالالاردىڭ تانىم كوكجيەگىن كەڭەيتەتىن اڭگىمەلەر, ولەڭدەر بار. ونىڭ بارلىعى – بالا جۇرەكتەن شىققان سوندايلىق شىنايى تۋىندىلار. سوندىقتان بۇل كىتاپتاعى ءار شىعارما ءوز وقىرمانىنا وي سالىپ, ىزگىلىككە باعىتتايتىنى انىق.