سەناتور بيبيگۇل جەكسەنباي ءوزىنىڭ دەپۋتاتتىق ساۋالىندا ادامدار كوپ جينالاتىن ورىنداردا قاۋىپسىزدىكتى قامتاماسىز ەتۋ ماسەلەلەرى تۋرالى ايتتى, دەپ حابارلايدى Egemen.kz.
دەپۋتاتتىڭ ايتۋىنشا, قازاقستاندا 7,9 ملن شارشى مەتر ساۋدا الاڭى بار, بىراق ولاردىڭ بەستەن ءبىر بولىگى عانا ساپا مەن قاۋىپسىزدىك ولشەمىنە ساي كەلەدى. ساۋدا-دۋمان ورتالىعىنداعى بالالاردىڭ ويىن بولمەسى ەكىنشى قاباتتان جوعارى ەمەس جانە ەۆاكۋاتسيالىق ەسىكتەن 20 مەتردەن قاشىق بولماۋى ءتيىس. بىراق, وكىنىشكە وراي, كوپتەگەن ساۋدا ورتالىقتارىندا بالالاردىڭ ويىن ايماقتارى جوعارعى قاباتتا ورنالاسقان, ەۆاكۋاتسيا جولى دا جوق. مۇمكىندىگى شەكتەۋلى جاندارعا ارنالعان ەۆاكۋاتسيا باسپالداعىندا پاندۋس جوق. ساۋدا ورتالىقتارىندا ءبىر قاباتتا ونداعان تاماقتانۋ ورىندارى ورنالاسقان, بۇل تاماق پىسىرەتىن قۋاتى جوعارى تەحنيكانى قولدانۋ سالدارىنان ءورت قاۋپىن ارتتىرادى.
«قۇقىقتىق ستاتيستيكاعا سايكەس 2023 جىلى ءورت قاۋىپسىزدىگى تالاپتارىن بۇزعانى نەمەسە ساقتاماعانى ءۇشىن 13 978 اكىمشىلىك قۇقىق بۇزۋشىلىق تىركەلگەن. ءورت قاۋىپسىزدىگىن ورەسكەل بۇزۋ فاكتىلەرى مەن ق ۇلىپتالعان نەمەسە ءتىپتى شىنجىرمەن بەكىتىلىپ قويىلعان اپاتتىق شىعۋ جولدارى, جارامدىلىق مەرزىمى وتكەن ءورت سوندىرگىشتەردىڭ بولۋى نەمەسە ولاردىڭ بولماۋى, دابىل جانە ءورت ءسوندىرۋ جۇيەلەرىنىڭ بۇزىلۋى سياقتى فاكتىلەر انىقتالعان. وسىنىڭ ءبارى بىرىڭعاي زاڭ تالابىنىڭ ورىندالماۋىنان بولىپ وتىر. ساۋدا ورتالىقتارى عيماراتتىڭ تەحنيكالىق جۇيەسىن ارنايى الگوريتم بويىنشا باسقارۋعا قابىلەتتى جوعارى تەحنولوگيالىق ءورت دابىلىنىڭ باسقاشا جۇيەسىمەن جابدىقتالۋى ءتيىس. بۇل بارلىق ادامداردى بەلگىلى ءبىر ۋاقىتتا ءورتتىڭ قاۋپىنەن قورعاۋعا جانە سول ارقىلى قاۋىپسىز ەۆاكۋاتسيالاۋعا جەتكىلىكتى ۋاقىت بەرۋگە مۇمكىندىك بەرەدى», دەدى بيبيگۇل جەكسەنباي.
سەناتور سونىمەن قاتار استانادا دۇنيەجۇزىلىك كوشپەندىلەر ويىندارىن وتكىزۋ بارىسىندا تەرروريستىك شابۋىل قاۋپىن اتاپ ءوتتى. ءىرى سپورتتىق شارالاردىڭ قاۋىپسىزدىگى شەتەلدىك جانە وتاندىق تاجىريبەنى ەسكەرۋدى, قاۋىپتەردىڭ الدىن الۋ ءۇشىن كەشەندى ۇيىمداستىرۋ جانە قۇقىقتىق قولداۋ كورسەتۋدى تالاپ ەتەدى.
«ساۋدا-دۋمان ورتالىعىنداعى كىرە بەرىس پەن ادامدار كوپ جينالاتىن جەرلەردە كۇزەتتى كۇشەيتۋدىڭ, قىزمەتكەرلەرمەن نۇسقاما جۇرگىزۋدىڭ, سونداي-اق ەۆاكۋاتسيانى قامتاماسىز ەتۋ جۇيەسىنىڭ جۇمىسىن قوسىمشا تەستىلەۋ جانە جاتتىعۋ ەۆاكۋاتسياسى مەن اۋىزشا حابارلاۋدىڭ ماڭىزدىلىعىنا نازار اۋدارۋىڭىزدى سۇرايمىن. سونداي-اق, جازعى دەمالىس الدىندا مەكتەپتەردە جانە جوعارى وقۋ ورىندارىندا وقۋشىلاردىڭ قاتىسۋىمەن قوعامدىق قاۋىپسىزدىك بويىنشا ارنايى وقۋ جاتتىعۋلارىن وتكىزۋ قاجەت», دەدى سەناتور جەكسەنباي.