تاياۋدا حالىقارالىق ساراپشىلار ەلىمىزدەگى بانك سەكتورىنىڭ سەنىمدىلىگى مەن تۇراقتىلىعىنا تاعى ءبىر تالداۋ جۇرگىزدى. «S&P Global Ratings» اگەنتتىگى اكتيۆتەر ساپاسى مەن رەتتەۋشىلىك قاداعالاۋدىڭ جاقسارۋىنا بايلانىستى بىزدەگى 5 ەكىنشى دەڭگەيلى بانككە (ەدب) «بارلاۋ» جاساعان.
ولار كەيىنگى جىلدارداعى ماكروەكونوميكالىق تاۋەكەل, اكتيۆتەر ساپاسى مەن بانك سەكتورى قارجىلىق كورسەتكىشتەرىنىڭ بولجانعان دەڭگەيدەن ەداۋىر جوعارى ەكەنىن ءارى قارجىلىق قاداعالاۋدىڭ بىرتىندەپ ۇلعايعانىن اتاپ وتەدى. قاڭتار ايىنىڭ قورىتىندىسىنا سايكەس ەدب نەسيە پورتفەلى 29,4 ترلن تەڭگەنى, ال 90 كۇننەن اسا مەرزىمگە كەشىكتىرىلگەن قارىزدار (NPL90+) 888 ملرد تەڭگەنى نەمەسە پورتفەلدىڭ تەك 3%-ىن قۇراعان.
سالىستىرمالى تۇردە قاراعاندا, ءبىر جىل بۇرىن بانك قارىزدارىنىڭ جيىنتىق كولەمىندەگى NPL90+ ۇلەسى – 3,4%, بەس جىل بۇرىن – 8,1%, ون جىل بۇرىن 32,2% بولعان. ياعني ون جىل ىشىندە نەسيە پورتفەلىندەگى NPL 90+ ون ەسەدەن اسا قىسقارعان.
ميكروقارجى ۇيىمدارى سەكتورىندا بىلتىرعى جىلدىڭ قورىتىندىسى بويىنشا «ۇزاق» كەشىكتىرۋدىڭ ۇلەسى 6,2%-دى قۇراعان. NPL 90+ سوماسىنىڭ ءوزى توقسان ىشىندە 18,2%-عا, 74,3 ملرد تەڭگەگە دەيىن ءوسىپ, ميكروقارجى ۇيىمدارىنىڭ جالپىنەسيەلىك پورتفەلى 7%-عا, 1,2 ترلن تەڭگەگە دەيىن ۇلعايعان.