«استانا» حالىقارالىق قارجى ورتالىعىنىڭ (احقو) قاتىسۋشىلارى وتكەن جىلدىڭ سوڭىنا قاراي ەل بيۋدجەتىنە 85,2 ملرد تەڭگە شاماسىندا سالىق تولەگەن. بيىل قاڭتار ايىندا تولەنگەن سالىق سوماسى 90 ملرد تەڭگەدەن اسىپ وتىر. ماماندار بۇل 2018 جىلعى سومادان شامامەن 60 ەسە كوپ ەكەنىن ايتادى. وسىدان ەكى جىل بۇرىن اتالعان ورتالىقتىڭ رەتتەۋ جۇيەسى ەكونوميكالىق ىنتىماقتاستىق جانە دامۋ ۇيىمىنىڭ (ەىدۇ) سالىق اشىقتىعى ستاندارتىنا ساي كەلدى دەپ تانىلعان.
«احقو – وڭىردەگى جەتەكشى قارجى ورتالىعى جانە ءبىز ەڭ الدىمەن كاپيتال قوزعالىسىنا ىقپال ەتەتىن ينفراقۇرىلىمدى قۇرىپ, دامىتۋدى كوزدەيمىز. تىركەلگەن قاتىسۋشىلاردىڭ سانى, قارجىلىق كومپانيالار سانىنىڭ ءوسۋى, قازاقستان ەكونوميكاسىنا تارتىلعان ينۆەستيتسيالار كولەمى مەن قاتىسۋشىلاردىڭ ەل بيۋدجەتىنە تولەگەن سالىعىنىڭ سوماسى, سونداي-اق مامىلە كولەمى, AIX بيرجاسى ارقىلى تارتىلعان كاپيتال – بۇنىڭ ءبارى ورتالىق جۇمىسىنىڭ تيىمدىلىگىن كورسەتەدى. AIX بيرجاسى ارقىلى 2023 جىلدىڭ سوڭىندا 4,6 ملرد دوللار تارتىلسا, احقو قاتىسۋشىلارىنان تىكەلەي ينۆەستيتسيا 6,3 ملرد دوللاردى قۇرادى», دەيدى احقو باسقارۋشىسى رەنات بەكتۇروۆ.
2023 جىلى كولىك, لوگيستيكا, اگروونەركاسىپتىك جانە وندىرىستىك كەشەندەر, جاڭارتىلاتىن ەنەرگيا كوزدەرى (جەك), IT-سالا سەكىلدى بىرقاتار باعىت بەلسەندى دامي تۇسكەن. احقو اكادەمياسى ءبىلىم بەرۋ جانە كورپوراتيۆتىك وقىتۋ باعدارلامالارى شەڭبەرىندە قارجى, ينۆەستيتسيالىق مەنەدجمەنت, تاۋەكەلدەردى باسقارۋ, قارجى تەحنولوگيالارى جانە باسقا دا سالالار بويىنشا 18 مىڭنان اسا ماماننىڭ ءبىلىمىن جەتىلدىردى. ورتالىق جۇمىس ىستەي باستاعان 2018 جىلدان بەرى قاتىسۋشىلار سانى ۇدايى ارتىپ, ورتاشا جىلدىق ءوسىمى قوسىمشا 460 كومپانيانى قۇراعان.
2024 جىلى اقپان ايىندا ورتالىققا تىركەلگەن قاتىسۋشى سانى 78 ەلدەن شەتەلدىك كاپيتالمەن قۇرىلعان كومپانيالاردى قوسا العاندا, 2500-دەن استى. ولاردىڭ كوبى قارجى, اقپارات جانە بايلانىس, كوتەرمە جانە بولشەك ساۋدا, ءوندىرىس پەن پايدالى قازبالاردى ءوندىرۋ سەكىلدى سالالارعا تيەسىلى بولىپ تۇر.
وسى رەتتە احقو-نىڭ بارلىق قاتىسۋشى-كومپانياسى قازاقستاننىڭ سالىق رەزيدەنتتەرى ەكەنىن جانە ەلىمىزدىڭ سالىق زاڭناماسىنا سايكەس ەسەپ جۇرگىزۋگە, سونىمەن قاتار سالىق جەڭىلدىكتەرىنە قاراماستان ءتيىستى ەسەپتىلىكتى تاپسىرۋعا مىندەتتى ەكەنىن اتاپ وتكەن ءجون. سالىق جەڭىلدىكتەرى نەگىزىنەن قارجىلىق, نارىقتىق قىزمەتتەردى جۇرگىزۋ نەمەسە كاسىبي قىزمەتتەر كورسەتۋ ءۇشىن احقو رەتتەۋشىسىنەن ءتيىستى ليتسەنزيا العان كومپانيالارعا قولدانىلادى.
ورتالىق ينۆەستيتسيالاردى تارتۋ بويىنشا مەرزىمىنەن بۇرىن ناتيجەگە قول جەتكىزىپ, الدىنا جاڭا ماقساتتار قويىپ وتىر.
«قازىردىڭ وزىندە احقو ارقىلى ەل ەكونوميكاسىنا 10,9 ملرد دوللاردان اسا قاراجات تارتىلدى. 2025 جىلعا دەيىنگى دامۋ ستراتەگياسىندا قويىلعان مىندەت ورىندالدى. ورتامەرزىمدى پەرسپەكتيۆادا ءبىز ينفراقۇرىلىمدى دامىتۋدى جالعاستىرامىز جانە نارىققا كومىرتەگى كۆوتاسى مەن تۇراقتى قارجىلاندىرۋ سياقتى سۇرانىسقا يە قۇرالداردى ۇسىناتىن بولامىز», دەيدى رەنات بەكتۇروۆ.