سەناتتىڭ اگرارلىق ماسەلەلەر, تابيعاتتى پايدالانۋ جانە اۋىلدىق اۋماقتاردى دامىتۋ كوميتەتى قىزىلوردا وبلىسىندا بولىپ, «سۋ رەسۋرستارى: تۇراقتى سۋمەن قامتاماسىز ەتۋ ماسەلەلەرى مەن پەرسپەكتيۆالارى» تاقىرىبىندا كوشپەلى وتىرىسىن وتكىزدى, دەپ جازادى Egemen.kz جوعارعى پالاتانىڭ ءباسپاسوز قىزمەتىنە سىلتەمە جاساپ.
سەنات كوميتەتىنىڭ توراعاسى ءالي بەكتاەۆ مەملەكەت باسشىسى ۇكىمەتتىڭ كەڭەيتىلگەن وتىرىسىندا سۋ رەسۋرستارىنا قول جەتكىزۋ ماسەلەسىنىڭ ماڭىزدىلىعىنا ەرەكشە توقتالا كەلىپ, بۇگىنگى تاڭدا تۇركىستان جانە قىزىلوردا وبلىستارىنىڭ سۋارمالى جەرلەرى اسا قاۋىپتى جاعدايدا ەكەنىن اتاپ وتكەنىن ەسكە سالدى.
«جاعدايدى جاقسارتۋ ماقساتىندا, ونىڭ ىشىندە ىلعال كوپ قاجەت ەتەتىن داقىلداردىڭ ەگىستىگىن وڭتايلاندىرۋ, قۇرعاقشىلىققا ءتوزىمدى اۋىل شارۋاشىلىعى داقىلدارىنا كوشۋ جانە سۋ ۇنەمدەۋ تەحنولوگياسىن ەنگىزۋ ءۇشىن ناقتى شارالار تالاپ ەتىلەدى. سۋ قاتىناستارى سالاسىنداعى باسىم ماقساتتار مەن مىندەتتەرگە قول جەتكىزۋ ءۇشىن مەملەكەتتىك بيلىك ورگاندارى قىزمەتىنىڭ تيىمدىلىگىن ارتتىرۋ جانە ۇيلەستىرۋ ماسەلەلەرىن ودان ءارى دامىتۋ قاجەت بولىپ وتىر», دەدى ء الي بەكتاەۆ.
سەناتور جانبولات جورگەنباەۆ كوشپەلى وتىرىستا قازىرگى سۋ كودەكسىندە سۋدى ۇنەمدەۋ جانە سۋدى ۇنەمدى پايدالانۋدى ىنتالاندىرۋ تەتىكتەرى ەسكەرىلمەگەنىن سىنعا الدى.
«سالاارالىق ءوزارا ءىس-قيمىلدىڭ زاڭنامالىق ناقتى تەتىكتەرىنىڭ بولماۋى سۋ تاپشىلىعىن ازايتۋ جانە ولاردىڭ ىسكە اسۋىن باقىلاۋ جونىندەگى شارالاردى جۇيەلى تۇردە جوسپارلاۋعا مۇمكىندىك بەرمەيدى. قولدانىستاعى زاڭناما سۋ رەسۋرستارىن پايدالانۋ جانە قورعاۋ سالاسىنداعى ءتيىمدى مەملەكەتتىك ساياساتتى ىسكە اسىرۋدى قامتاماسىز ەتۋ مۇمكىندىگى تومەن. ودان باسقا, ينستيتۋتسيونالدىق قۇرىلىم مەن باسقارۋ جۇيەسى ودان ءارى دامىتۋدى جانە ولاردىڭ تيىمدىلىگىن ارتتىرۋدى تالاپ ەتەدى», دەدى ج.جورگەنباەۆ.
سەناتورلار سۋ شارۋاشىلىعى احۋالىمەن تانىسۋ ماقساتىندا قىزىلوردا سۋ تورابى, «ايتەك» سۋ تورابى, «قىزىلوردا سۋ جۇيەسى» كاسىپورنى جانە «التىن وردا» كۇرىش ءوندىرۋ زاۋىتىندا بولدى.
كوشپەلى وتىرىستىڭ قورىتىندىسىندا قاتىسۋشىلار ۇكىمەتكە جولداناتىن ءتيىستى ۇسىنىستارىن تياناقتادى.