ارقانىڭ اقپانداتقان اق بورانى ءبىر كوتەرىلسە, جىنى باسىلعانشا تىنشىمايتىن ادەتى. بۇل جولى دا بىرنەشە كۇن بويى الاسۇرىپ تۇرىپ الدى. وڭىردە جول قاتىناسى ءۇزىلىپ, قانشاما ەلدى مەكەن قار قۇرساۋىندا قالدى.
دۇنيەنى بيلەپ-توستەپ العان دۇلەي كۇش تىرشىلىكپەن ساناسپايدى. بىراق تىرشىلىك بوران سوقتى ەكەن دەپ توقتاپ قالسا, كانى. ءبىر جەردە بىرەۋلەر ساپارلاپ جولدا كەلە جاتسا, ەندى ءبىر شالعاي اۋىلدا اي-كۇنى تولعان جاس كەلىندى تولعاق قىسىپ, تار قۇرساقتاعى نارەستە كەڭ دۇنيەنىڭ ەسىگىن قاعىپ جاتادى. ءومىر مەن ءولىم ارباسقان مۇنداي قىستالاڭ ساتتەردە بوراننان وزىپ, اقتۇتەكتەن اداسپاي جول تاۋىپ كومەككە كەلەتىن قۇتقارۋ قىزمەتتەرىنىڭ ەرلىككە بەرگىسىز ەڭبەگى ەرەسەن-اق.
ءوڭىر تۇتاستاي قار قۇرساۋىندا قالعاندا توتەنشە جاعداي, جول تازارتۋ, پوليتسيا, جەدەل جاردەم قىزمەتتەرى ءۇش كۇن بويى بەل جازباي ارپالىسىپ ءجۇرىپ ءوز مىندەتتەرىن ابىرويمەن اتقارىپ شىقتى. اقتۇتەك استىنداعى ارپالىستا ورىمدەي جاس فەلدشەر قىزدار قارعا باتىپ قالعان جەدەل-جاردەم كولىگىن يتەرىپ شىعارىپ, ناۋقاسقا دەيىن بىرنەشە شاقىرىم ومبىلاپ قار كەشىپ جاياۋ جەتكەن جاعدايلار بولدى. ماسەلەن, 8 اقپانداعى قارلى بوراندا سەۆەرنىي اۋىلىندا تۇراتىن تولعاعى جەتكەن جۇكتى ايەلدى ارقالىق قالاسىنا جەدەل جەتكىزگەن جەدەل جاردەم بريگاداسىن الايىق. سەۆەرنىي اۋىلىنىڭ تۇرعىنى گۇلناز رىسكەلدينا: «الاي-تۇلەي بوراندا ارقالىق پەرزەنتحاناسىنا جەتىپ, امان-ەسەن بوسانىپ, كىشكەنتايلى بولىپ وتىرعانىم – ايدانا ناۋرىزباي, ءمادينا احمەتجانوۆا سىندى فەلدشەرلەر مەن كولىك جۇرگىزۋشى ەۆگەني حودوستىڭ ارقاسى», دەيدى. جاس بوسانعان انانىڭ ايتۋىنشا, تاياق تاستام جەردى كورۋ مۇڭعا اينالعان اقتۇتەك بوراندا ارقالىقتان شىققان جەدەل جاردەم كولىگى سەۆەرنىيدىڭ ىرگەسىنە جەتىپ قارعا باتىپ قالعان. ايدانا مەن ءمادينا دەرەۋ كومەككە كەزەكشى كولىكتى شاقىرتقان سوڭ, جۇكتى ايەلگە قوڭىراۋ شالىپ, جاعدايدى ءتۇسىندىرىپ, كوپ كەشىكپەي جەتەتىندەرىن حابارلاعان. ودان كەيىن فەلدشەرلەر ەكىنشى كولىكتىڭ كەلۋىن كۇتىپ تۇرماستان, مەجەلى مەكەنجايعا قاراي جاياۋ تارتقان. بۇل كەزدە جۇكتى ايەلدىڭ جولداسى دا كولىكتىڭ اۋىل ىشىنە كىرە المايتىنىن ءبىلىپ, جۇبايىن كيىندىرىپ فەلدشەرلەرگە قاراي جولعا شىققان ەدى.
«بوران تۇتەپ تۇر. تولعاعىم قىسىپ, شىداتپاي بارادى. قارسى الدىمىزدان شىققان فەلدشەرلەردى كورگەندە قۋانىپ كەتتىك. ولار مەنى بىردەن ەكىنشى كولىككە وتىرعىزدى. جاعدايىمدى سۇراپ, بىردەن دەنساۋلىعىمدى تەكسەرىپ شىقتى. ودان كەيىن كەز كەلگەن جاعدايعا دايىن بولۋىمدى ءتۇسىندىرىپ, قايراپ, جولدا بوسانىپ قالۋعا دايىن بولۋ كەرەك ەكەنىن ءتۇسىندىردى. بىراق پەرزەنتحاناعا دەر كەزىندە جەتتىك. اللانىڭ قالاۋىمەن قىزدى بولدىم. اۋەلى اللاعا, ودان كەيىن ءمادينا مەن ايداناعا العىسىم شەكسىز», دەيدى گۇلناز رىسكەلدينا.
وبلىستىق دەنساۋلىق ساقتاۋ باسقارماسىنىڭ مالىمەتىنشە, قارلى بوراننىڭ قۇرساۋىنداعى ءۇش كۇن ىشىندە «103» قىزمەتىنە 3 819 قوڭىراۋ كەلىپ تۇسكەن. جەدەل جاردەمگە 2 676 ادام جۇگىنگەن. 678 ناۋقاس امان-ەسەن اۋرۋحاناعا جەتكىزىلگەن.
توتەنشە جاعداي قىزمەتى مەن پوليتسيا كۇشتەرى دە بىرنەشە كۇنگە سوزىلعان بوراننىڭ استىندا ءجۇردى. بوراننىڭ سالدارىنان وبلىس اۋماعىندا 300-گە جۋىق اۋىر جۇك كولىگى قار قۇرساۋىندا قالدى. مىسالى, ءبىر عانا «قوستاناي – قارابۇتاق» اۆتوجولىنىڭ بويىندا 300-دەن اسا جۇك كولىگى مەن جولاۋشى تاسىمالدايتىن بىرنەشە اۆتوبۋس ەكى-ءۇش كۇن تۇردى. دەنيسوۆ, بەيىمبەت مايلين اۋداندارى مەن ليساكوۆ قالاسىنىڭ جەرگىلىكتى اتقارۋشى ورگاندارى قار قۇرساۋىندا قالعانداردى جىلى جايلارعا ورنالاستىرىپ, تەگىن ىستىق تاماق, اۋىزسۋ جەتكىزىپ تۇردى.
قوستاناي وبلىسى