الىشەرگە الەم چەمپيونىنىڭ ءالى جەتپەدى

بىلتىر بەلگرادتا 92 كگ سالماق دارە­جەسىندە كۇش سىناسقان ريزابەك الەم چەمپيونى اتانىپ, بارشا الاش جۇرتىن قۋانىش پەن شاتتىققا بولەگەن ەدى. سەبەبى وعان دەيىن قازاقستاننىڭ بىردە-ءبىر بالۋانىنىڭ ءدال وسىنداي بيىككە كوتەرىلۋگە كۇش-جىگەرى جەتپەگەن. تورتكۇل دۇنيەنىڭ تەڭدەسسىزدەرى جينالعان جارىس­تا بارلىق قارسىلاسىن سىپىرا ۇتىپ, جەڭىس تۇعىرىنىڭ ەڭ بيىك ساتىسىنا كوتەرىلگەن ءدال وسى سولتۇستىك قازاقستان وبلىسى ءۋاليحان اۋدانىنىڭ كىشكەنەكول اۋىلىنىڭ تۋماسى ەدى. 19 جاستاعى بالۋاننىڭ باستى ارمانى – وليمپيا ويىن­دارىنا قاتىسۋ. سول سەبەپتى دە ايتمۇحان بيىل 97 كگ سالماققا اۋىسۋدى قۇپ كوردى. ەگەر ول استانادا الدىنا جان سالماعاندا بىشكەكتەگى ليتسەنزيالىق تۋرنيرگە قاتىسىپ, ودان ءارى پاريجگە باراتىنىنا ەشكىمنىڭ كۇمانى بولمادى.

دەسەك تە 97 كگ سالماقتىڭ ءوز ءدۇلد ۇلى بار. ول – الىشەر ەرعالي. 24 جاستاعى جامبىل وبلىسى تۋماسىنىڭ وسى سالماقتا ۇستەمدىك قۇرعانىنا ءبىراز جىلدىڭ ءجۇزى بولدى. ول 2019-2022 جىلدار ارالىعىندا ازيا چەمپيوناتىندا قاتارىنان ءتورت رەت جۇلدەگەرلەر قاتارىنان كورىندى. العاشقى ەكى جارىستا قولا السا, سوڭعى ەكەۋىندە كۇمىسپەن كۇپتەلدى. 2019 جىلى استانادا ۇيىمداستىرىلعان الەم چەمپيوناتىندا جارتىلاي فينالعا دەيىن جەتىپ, اقىرىندا بەسىنشى ورىندى قاناعات تۇتتى. سونىڭ ارقاسىندا توكيو وليمپياداسىندا ونەر كورسەتتى. جاستار اراسىندا ازيا چەمپيونى (U-23) جانە الەم بىرىنشىلىگىنىڭ قولا جۇلدەگەرى (U-23) دەگەن اتاقتارى بار. ارينە, ونداي ساقا سپورتشى ءوزىنىڭ جىلى ورنىن وزگەلەرگە وڭايلىقپەن بەرە قويمايتىنى انىق.

بيىلعى ەل چەمپيوناتىندا ريزابەك ايتمۇحان فازىل ەيۋبوۆ (9:0), ارىستانبەك قارابەك (10:0), سەرىك باقىتحانوۆ (14:4) جانە بەكزات ۇركىمبايدىڭ (10:0) تاس-تالقانىن شىعاردى. الىشەر ەرعاليدىڭ دە ەكپىنى كۇشتى بولدى. ول – ەرالى ابدازوۆ, يزنوۋر وگاەۆ (5:0), ادىلەت رزاش (10:0) جانە جاسوسپىرىمدەر اراسىندا الەم بىرىن­شىلىگىنىڭ جەڭىمپازى, جاستار اراسىندا ازيا چەمپيونى كاميل كرۋگليەۆتى (6:0) قاپى قالدىردى. ءسويتىپ, قوس كوكجالدىڭ جولى فينالدا قيىستى.

اقتىق سىندا ءدۇيىم جۇرت كەرەمەت كورىنىستىڭ كۋاسى بولدى. باسەكە باستالعان بەتتە ريزابەك قارسىلاسىنىڭ اياعىنا ءوتتى دە, جەرگە ءبىر اۋناتىپ الىپ, ءتورت ۇپايدى ەنشىلەدى – 4:0. ەرعالي دە قاراپ قالعان جوق. ول دا قارىمتا شابۋىلعا جۇگىنىپ, لەزدە ەكى ۇپايدى قورجىنىنا سالدى – 4:2. بۇل – بار-جوعى 20 سەكۋندتا ورىن العان جايت. كوپ ۇزاماي جامبىل وبلىسىنىڭ وكىلى تارازى باسىن تەڭەستىردى – 4:4. كەزدەسۋدىڭ ەكىنشى مينۋتىندا ايتمۇحان الىشەردىڭ ارتىنا شىعىپ, تاعى ەكى ۇپاي وزدى – 6:4. ءبىرىنشى كەزەڭ وسىلاي اياقتالدى. ۇزىلىستەن كەيىن «شاكىرتىمىزدىڭ ۇتىمدى ءادىسىن ەسەپتەمەدىڭدەر» دەپ الماتى قالاسىنىڭ باپكەرلەرى ورتاعا «چەلەندج» لاقتىردى. بەينەتاسپانى كەرى اينالدىرىپ كورگەن تورەشىلەر القاسى كىلەمدەگى قازىنىڭ ارەكەتىن دۇرىس دەپ باعالاپ, كەرىسىنشە ءبىر ۇپاي الىشەردىڭ ەنشىسىنە جازدى – 6:5. ريزابەك ەكپىنىن كۇشەيتىپ, ەسەپتى 10:5-كە جەتكىزدى. بىراق ەرعالي ەڭسەسىن تۇسىرگەن جوق. ونىڭ كەزەكتى ءبىر ارەكەتى ەكى ۇپايعا باعالاندى – 10:7. باسەكەنىڭ اياقتالۋىنا 56 سەكۋند قالعاندا الەم چەمپيونى اياعىن جارا­قاتتاپ الدى. سونىڭ كەسىرى ءتيدى مە, الدە باسقا دا سەبەپتەر بولدى ما, ايتەۋىر ونىڭ قيمىلى باياۋلاپ قالدى. كەرىسىنشە, شا­بۋى­لىن ۇدەتە تۇسكەن الىشەر تاعى ءبىر-ەكى ءادىستى ءساتتى ورىنداپ, قاجەتتى ۇپايلارعا قول جەتكىزدى – 10:14. وسىلايشا, قوس مىقتىنىڭ «شايقاسى» الىشەر ەرعاليدىڭ پايداسىنا شەشىلىپ, ول ەل چەمپيونى اتاندى. ريزابەك ايتمۇحان كۇمىستى قاناعات تۇتسا, ماڭعىستاۋلىق كاميل كرۋگليەۆ پەن استانالىق بەكزات ۇركىمباي قولا مەدالدى يەمدەندى.

74 كگ سالماق دارەجەسىندە دە كىل مىق­تىلار جينالدى. سولاردىڭ اراسىنان الەم چەمپيوناتىنىڭ كۇمىس جۇلدەگەرى, ازيانىڭ ەكى دۇركىن چەمپيونى, 25 جاس­تاعى سولتۇستىكقازاقستاندىق نۇر­قوجا قايپانوۆ پەن جاستاردىڭ الەم بىرىن­شىلىگىنىڭ قولا جۇلدەگەرى, ازيا چەمپيونى, 24 جاستاعى اتىراۋلىق تالعات سىرباز سۋىرىلىپ شىعىپ, باس جۇلدەنى ءوزارا ساراپقا سالدى. بۇل تارتىس قايپانوۆتىڭ جەڭىسىمەن اياقتالدى. جامبىلدىق ەلدوس قۋانىشباي مەن اقمولالىق مۇرات جاقىپوۆ ءۇشىنشى ساتىعا جايعاستى.

65 كگ سالماقتا ناچىن كۋلاردىڭ ەسىمى ەرەكشە اتالدى. وزدەرى اق تەر, كوك تەر بولىپ, شاكىرت تاربيەلەگەننىڭ ورنىنا سىرتتان اكەلگەن دايىن سپورتشىلاردىڭ استى-ۇستىنە ءتۇسىپ, قامقورلىق كورسەتۋگە قۇشتار قازاقستاننىڭ باپكەرلەرى بۇل جىگىتتى تىۆادان اتتاي قالاپ العان ەكەن. نەگىزى ول وسال بالۋان ەمەس. 28 جاستاعى ناچىن – جاستار اراسىندا قۇرلىق بىرىن­شىلىگىنىڭ جەڭىمپازى, اسكەريلەر اراسىندا الەمنىڭ ءۇش دۇركىن چەمپيونى, ەۋروپا چەمپيوناتىنىڭ قولا جانە رەسەي چەم­پيوناتىنىڭ كۇمىس جۇلدەگەرى. بىراق كۋ­لار جامبىلدىق سانجار مۇحتاردى جەڭە الماي, قوناەۆتىق ادلان اسقاروۆ ەكەۋى ءۇشىنشى ورىنعا تابان تىرەدى. سانجار فينالدا ماڭعىستاۋلىق مايس اليەۆكە جول بەردى.

92 كگ سالماقتا ادىلەت داۋلىنباەۆ دارا شىقتى. الماتى قالاسىنىڭ وكىلى اياعىنا بىرنەشە رەت وتا جاساتىپ, ەكى جىل­داي ۇلكەن سپورتتان قول ءۇزىپ قالعان ەدى. سوعان قاراماستان استانا تورىندە ول قارسىلاستارىن الىپ تا, شالىپ تا جىقتى. قوناەۆتىق ەسقالي داۋلەتقازى – ەكىنشى, وسكەمەندىك نۇرداۋلەت بەكەنوۆ پەن پاۆلودارلىق يسلامبەك ءىلياسوۆ ءۇشىنشى ورىندى يەلەندى.

86 كگ سالماقتىڭ كوشباسشىسى ازامات داۋلەتبەكوۆ بۇل جارىسقا قاتىسقان جوق. سەبەبى ول بىلتىر بەلگرادتاعى الەم چەمپيوناتىندا قولا مەدالدى ولجالاپ, وليمپيادا جولداماسىن قالتاسىنا باس­تى. ازامات جوق جەردە ورالدىق نۇرجان يساعاليەۆ ۇستەمدىك قۇردى. اقتىق ايقاستا ول جامبىلدىق نۇرداۋلەت قۋانىشبايدان ايلاسىن اسىردى. ماڭعىستاۋلىق ناۋرىز احمەتحانوۆ پەن الماتى وبلىسىنىڭ سايىپقىرانى جىگەر زاكىروۆ قولاعا قول سوزدى. 57 كگ سالماقتا جەتىسۋلىق ەراسىل مۇحتار ۇلىنىڭ مەرەيى ۇستەم بولدى. شە­شۋشى تۇستا ول جامبىلدىق راحات قال­جاندى قاپى قالدىردى. اقتوبەلىك مەي­رامبەك قارتباي مەن تۇرىكستاندىق اسىل­جان ەسەنكەلدى ۇزدىك ۇشتىكتى تۇيىن­دەدى.

61 كگ سالماق دارەجەسىندە اسىل ايتا­قىننىڭ اسىعى الشىسىنان ءتۇستى. الماتى وبلىسىنىڭ وكىلدەرى – ءومىرجان داستانبەك پەن داۋرەن ءامىرحان جانە اقمولالىق ۆلاديمر كۋدرين جۇلدەگەرلەر قاتارىنا قوسىلدى. 70 كگ سالماقتا اۋليە-اتا توپىراعىنىڭ تۋماسى مەيىرجان ءاشىروۆتىڭ ايدارىنان جەل ەستى. فينالدا ول الماتىلىق قۋانىش دۇيسەنقۇلدى جەڭدى. شىعىس قازاقستان وبلىسىنىڭ قوس شىمىرى – ولجاس ولجاقانوۆ پەن دوسجان اسەتوۆ قولا مەدالدى موينىندا جارقىراتتى. 79 كگ سالماقتىڭ اقتىق سىنىندا استانالىق ازامات ءومىرجانوۆ پەن اتىراۋلىق بولات ساقاەۆ سايىسقا ءتۇستى. ءبىرىنشى كەزەڭدە ازامات 4:0 ەسەبىمەن العا شىقتى. جاراقاتىن اسقىندىرىپ العان بولات ۇزىلىستەن كەيىن بەلدەسۋدى جالعاستىرۋدان باس تارتتى. ءۇشىنشى ورىندا – جەتىسۋلىق ماعجان جانىرباي مەن اقمولالىق سىدىق قايىركەلدى. ال الىپتاردىڭ ايقاسىندا اقتوبە وبلىسىنان كەلگەن يۋسۋپ باتىرمۇرزاەۆتىڭ تەگەۋرىنىنە ەشكىم شىدامادى. فينالدا ول قوناەۆتىق ابىلاي سوۆەتكە سان سوق­تىردى. ءدال سول ولكەنىڭ ورەنى ومار ايۋ­بوۆ پەن قوستانايلىق تالعات جيەنتاەۆ ءۇشىنشى تۇعىرعا كوتەرىلدى.