وڭىردە ينۆەستورلارعا كەدەرگى بولىپ وتىرعان ماسەلەلەردىڭ بىرىڭعاي ءتىزىلىمى جاسالاتىن بولدى. بۇل كاسىپكەرلىكتى قولداۋ شارالارىنىڭ ءورىسىن كەڭەيتىپ, شاعىن جانە ورتا بيزنەستىڭ دامۋىنا قولايلى جاعداي تۋعىزۋعا مۇمكىندىك بەرمەك.
كاسىپكەرلەر پالاتاسىنىڭ بۇل باستاماسى وبلىس باسشىلىعى تاراپىنان قولداۋ تاۋىپ وتىر.
ء«بىز اي سايىن اكىمدىكتىڭ قۇزىرلى باسقارمالارىمەن بىرلەسە وتىرىپ, اتالعان ءتىزىلىم ارقىلى بيزنەستىڭ دامۋىنا بوگەت بولىپ وتىرعان كۇرمەۋلى ماسەلەلەردى ءدال انىقتاپ, ساراپقا سالىپ, قاجەت بولعان جاعدايدا كەيبىر زاڭ كۇشى بار قۇجاتتارعا وزگەرىس ەنگىزۋدى تالاپ ەتەتىن ۇسىنىستاردى قاراستىرامىز. بۇل ماسەلەنى جەدەل شەشۋگە جانە ءىرى ينۆەستيتسيالىق جوبالاردىڭ اينالاسىنداعى شاعىن بيزنەستىڭ دامۋىنا ىقپال ەتەدى», دەيدى وبلىستىق كاسىپكەرلەر پالاتاسىنىڭ ديرەكتورى دانيار كۇزەنباەۆ.
كاسىپكەرلىكتى دامىتۋعا ارنالعان ۇلتتىق جوبا اياسىندا وڭىردە «قىزمەتتىك قولداۋ», «كەڭەس بەرۋ», «ىسكەرلىك بايلانىس» جانە «مەن كاسىپكەرمىن» دەپ اتالاتىن ءتورت باعىتتاعى قولداۋ شارالارى ءتيىمدى ىسكە اسىرىلىپ جاتىر.
ماسەلەن, 2023 جىلى پالاتا ماماندارى 1 189 كاسىپكەرگە قىزمەتتىك قولداۋ كورسەتىپ, 13 مىڭنان استام تۇرعىنعا جەكە كاسىبىن اشۋ, بيزنەسىن كەڭەيتۋ جونىندە كەڭەس بەرگەن. بىلتىردىڭ وزىندە وبلىستا 246 جەكە كاسىپكەرلىك نىسانى مەن جشس اشىلدى. پالاتا وكىلدەرىنىڭ كومەگىمەن جالپى سوماسى 1,5 ملرد تەڭگە بولاتىن 198 جوبا ىسكە قوسىلىپ, 171 جاڭا جۇمىس ورنى اشىلدى.
وتكەن جىلى «ىسكەرلىك بايلانىس» جوباسى بويىنشا 3 كاسىپكەر گەرمانيا كاسىپورىندارىندا بولىپ, باتىستا بيزنەس جۇرگىزۋدىڭ قىر-سىرىمەن تانىسىپ, تاجىريبە الماسىپ كەلدى. تاعى 3 كاسىپكەر ەۋروپا كاسىپورىندارىنا بارىپ, بيزنەس-تاعىلىمدامادان ءوتتى. گەرمانيامەن ىسكەرلىك قاتىناس بيىل دا جالعاسىن تاپپاق. قازىر بيزنەس-تاعىلىمدامادان وتۋگە نيەتتى كاسىپكەرلەردەن ءوتىنىش قابىلدانىپ جاتىر. مۇنىڭ سىرتىندا, «ىسكەرلىك بايلانىس» جوباسىنا قاتىسىپ جاتقان بىرنەشە كاسىپكەردى جاپونياعا جىبەرۋ جوسپارلانىپ وتىر.
وڭىردە «مەن كاسىپكەرمىن» جوباسى «كاسىپكە باعىت» جانە «كاسىپكەر ايەلدەردى قولداۋ ورتالىعى» دەپ اتالاتىن ەكى باعىت بويىنشا جۇزەگە اسىرىلىپ جاتىر. ءبىرىنشىسى جىلىنا, كەم دەگەندە, 40 كاسىپكەرگە سالالىق ءبىلىم بەرۋدى كوزدەيدى. اتالعان باعىت بويىنشا بىلتىر فەدوروۆ اۋدانىندا 15 كاسىپكەر ءسۇت ونىمدەرىن وڭدەۋدىڭ وندىرىستىك جولدارىن يگەرسە, قوستاناي اۋدانىندا 26 كاسىپكەر جىلىجاي شارۋاشىلىعىنىڭ قىر-سىرىن مەڭگەرىپ شىققان.
«كاسىپكەر ايەلدەردى قولداۋ ورتالىعى» باعىتى اياسىندا 400-گە جۋىق ازاماتشا بيزنەس جۇرگىزۋگە قاتىستى كەڭەس العان. وڭىردە كاسىپكەرلىكپەن اينالىساتىن ايەلدەر جىل ساناپ كوبەيىپ كەلە جاتقانى بايقالادى. مىسالى, 2023 جىلى بيزنەسكە بەت بۇرعان قىز-كەلىنشەكتەردىڭ سانى 26 474 بولسا, جىل سوڭىنا قاراي بۇل كورسەتكىش 28 مىڭ 305-كە جەتكەن. بيىل «اتامەكەن» ۇپ فيليالى قوستانايداعى كاسىپكەر ايەلدەر شىعارىپ جاتقان ونىمدەردىڭ اۋقىمدى كورمەسىن ۇيىمداستىرۋدى كوزدەپ وتىر. وعان كەم دەگەندە 120 كاسىپكەر قاتىسادى دەپ كۇتىلۋدە.
قوستاناي وبلىسى