كۇن رايىنىڭ كۇرت ناشارلاۋى سالدارىنان جۋالى اۋدانىندا ءىرى جول-كولىك اپاتى ورىن الىپ, سالدارىنان 19 ادام زارداپ شەكتى, دەپ حابارلايدى Egemen.kz.
وبلىستىق توتەنشە جاعدايلار دەپارتامەنتى تاراتقان مالىمەتكە سەنسەك, «الماتى – تاشكەنت» رەسپۋبليكالىق ماڭىزى بار جولىنىڭ 567 شاقىرىمىندا اۆتوبۋس پەن جەڭىل جانە جۇك تاسيتىن اۆتوكولىك سوقتىعىسقان. جول كولىك وقيعاسى سالدارىنان باۋىرجان مومىش ۇلى اۋىلىنداعى اۋداندىق اۋرۋحاناعا 19 ادام جەتكىزىلگەن, ونىڭ ىشىندە 1 بالا بار. تجد قىزمەتكەرلەرىنىڭ جۇدىرىقتاي جۇمىلۋىمەن قىسىلىپ قالعان ادامداردى قۇتقارۋ جۇمىستارى جۇرگىزىلگەن.
دەرەككە سەنسەك, قازا بولعاندار جوق. قازىرگى كەزدە نۇرلىكەنت اۋىلىنداعى مادەنيەت ءۇيىنىڭ جىلىتۋ پۋنكتىنە 39 جولاۋشى ورنالاستىرىلعان, ونىڭ ىشىندە 8 بالا بار.