ۇكىمەت بيىل شەگىرتكەنىڭ جاپپاي تارالىپ كەتۋىنىڭ الدىن الۋ ءۇشىن ءتيىستى شارالار قابىلداۋعا كىرىستى. بۇل ماقساتقا قوسىمشا 4 ملرد تەڭگەگە جۋىق قاراجات ءبولىندى. پرەمەر-مينيستر ءاليحان سمايىلوۆ ءتيىستى قاۋلىعا قول قويدى, دەپ حابارلايدى Egemen.kz ۇكىمەتتىڭ ءباسپاسوز قىزمەتىنە سىلتەمە جاساپ.
اتاپ ايتقاندا, ۇكىمەت رەزەرۆىنەن ءۇيىرلى شەگىرتكەلەردىڭ جاپپاي تارالۋىنىڭ الدىن الۋعا, جايىلىمدارعا زيانىن تيگىزبەۋگە, اۋىل شارۋاشىلىعى داقىلدارىن جويۋىنا, سونداي-اق كورشى مەملەكەتتەردىڭ ىرگەلەس اۋماقتارىنا كوشۋىنە جول بەرمەۋ ءۇشىن ولاردىڭ تارالۋى مۇمكىن بارلىق بولجامدى الاڭدا تولىق كولەمدى حيميالىق وڭدەۋ جۇمىستارىن جۇرگىزۋ بويىنشا شۇعىل شىعىندارعا 3,9 ملرد تەڭگە ءبولىندى.
ەلىمىزدە سوڭعى جىلدارى ءۇيىرلى شەگىرتكەلەردىڭ تارالۋ الاڭىنىڭ ۇلعايعانى بايقالادى: 2020 جىلى – 514 مىڭ گا, 2021 جىلى – 626 مىڭ گا, 2022 جىلى – 975 مىڭ گا. 2023 جىلى تارالۋ الاڭى 1 585 مىڭ گا بولادى دەپ بولجانعانىمەن, ءىس جۇزىندە 1 616 مىڭ گا وڭدەلدى. 2023-2024 جىلدارعا شەگىرتكەنىڭ جاپپاي تارالۋىنىڭ 11 جىلدىق تسيكلىنىڭ ۇدەمەلى كەزى سايكەس كەلەدى.
بيىل رەسپۋبليكالىق بيۋدجەتتەن 1 270,6 مىڭ گا الاڭدى وڭدەۋگە 4,2 ملرد تەڭگە بولىنگەن ەدى. الايدا, 2024 جىلى ناقتىلانعان جالپى بولجام بويىنشا ءۇيىرلى شەگىرتكەنىڭ تارالۋ الاڭى ۇلعايىپ, 2,5 ملن گا قۇرادى, بۇل وتكەن جىلمەن سالىستىرعاندا, شامامەن 1 ملن گەكتارعا ارتىق.
بولىنگەن قوسىمشا قاراجات 1,3 ملن گا الاڭدا زيانكەس ءۇيىرلى شەگىرتكەگە قارسى حيميالىق وڭدەۋ جۇمىستارىن جۇرگىزۋگە باعىتتالادى.
ەسكە سالا كەتەيىك, قازاقستان اۋماعىندا شەگىرتكەنىڭ ءۇيىرلى (ازيالىق, يتاليالىق جانە ماروككولىق) جانە ءۇيىرلى ەمەس تۇرلەرى تارالعان. پەستيتسيدتەردى ساتىپ الۋ جانە ولاردى ساقتاۋ, تاسىمالداۋ جانە قولدانۋ قىزمەتتەرى سىندى ءۇيىرلى شەگىرتكەلەردەن قورعاۋ ءىس-شارالارىن ۇيىمداستىرۋ رەسپۋبليكالىق بيۋدجەت قاراجاتى ەسەبىنەن جۇزەگە اسىرىلادى.