پرەمەر-مينيستر ولجاس بەكتەنوۆ مەملەكەت باسشىسىنىڭ ۇلتتىق جۇك اۋە كومپانياسىن دامىتۋ, سونداي-اق تەڭىز جانە تەمىرجول تاسىمالدارىن ۇلعايتۋ بويىنشا تاپسىرمالارىن ورىنداۋ ماسەلەلەرى جونىندە كەڭەس وتكىزدى, دەپ حابارلايدى Egemen.kz.
جيىندا كولىك مينيسترلىگىنىڭ, «سامۇرىق-قازىنا» ۇاق, «قازاقستان تەمىر جولى» ۇك» جانە Turlov Private Holding جۇك اۋە كومپانياسىنىڭ جۇمىسىن ۇيىمداستىرۋ جانە ونىڭ تۇراقتى دامۋىن قامتاماسىز ەتۋ جونىندەگى تاسىلدەرى تىڭدالدى.
ترانزيتتىك جۇك حابى رەتىندە قىتاي – قازاقستان – باتىس ەۋروپا باعىتى بويىنشا قولايلى جاعداي جاساۋ ءۇشىن اۋە كەمەلەرىن كەزەڭ-كەزەڭىمەن شىعارۋدى, باسەكەلەستىك قۇنى بويىنشا اۆياوتىنمەن قامتاماسىز ەتۋدى قوسا العاندا, وپەراتسيالىق قىزمەتتى جەدەل ىسكە قوسۋ ماسەلەلەرى قارالدى. ىلەسپە ينفراقۇرىلىمدى دامىتۋعا, ونىڭ ىشىندە اۋەجاي قۋاتىن, جۇك تەرمينالدارىن, قويما لوگيستيكاسىنا نازار اۋدارىلدى.
سونىمەن قاتار ورتالىق ازيا وڭىرىنەن كاۆكازعا جانە باتىس ەۋروپا ەلدەرىنە تاسىمالداۋ كولەمىن ۇلعايتۋ ءۇشىن قازاقستاندىق «اقتاۋ» جانە «قۇرىق» تەڭىز پورتتارىن تيەۋ شارالارى تالقىلاندى.
تەمىرجول سالاسى بويىنشا وتكىزۋ قابىلەتىن ارتتىرۋ, سونداي-اق تاريفتىك ساياساتتى جەتىلدىرۋ ءۇشىن ينفراقۇرىلىمدى ودان ءارى جاڭعىرتۋ جانە قازاقستاندىق تەمىرجول جەلىسىن دامىتۋ جوسپارلارى ايتىلدى.
كەڭەس قورىتىندىسى بويىنشا پرەمەر-مينيستر بىرقاتار تاپسىرما بەردى.
ايتا كەتەيىك, پرەمەر-مينيستر ولجاس بەكتەنوۆ مەملەكەت باسشىسىنىڭ «تازا قازاقستان» باستاماسىن جۇزەگە اسىرۋ بارىسىنا مونيتورينگ جۇرگىزۋ جونىندەگى ورتالىقتىڭ كەزەكتى وتىرىسىندا ۇلتتىق پاركتەردەگى باياۋ جۇمىستى سىنعا الدى.