شاحمات ۇزدىكتەرى ماراپاتتالدى

كەيىنگى ءۇش جىلدا حالىقارالىق تۋرنيرلەردە جۇزدەگەن مەدال جەڭىپ العان تالانتتارىمىز كوماندالىق الەم چەمپيوناتىندا توپ جاردى. جاسوسپىرىمدەر ساناتىندا جاھاندىق دودالاردا ولجا بۇيىردى. بالالار مەن جاسوسپىرىمدەر ۇلتتىق شاحماتتىڭ باستى قوزعاۋشى كۇشىنە اينالدى.

جاس شاحماتشىلار الەم چەمپيوناتىندا كوش باستادى

قازاقستان شاحمات فەدەراتسياسىنىڭ پرەزيدەنتى تيمۋر تۋرلوۆ KazChess Awards شاحماتتى دامىتۋ جولىندا وراسان ەڭبەك ەتىپ جۇرگەن جانداردىڭ جۇمىسىنا بەرىلەر لايىقتى ماراپات ەكەنىن اتاپ ءوتتى.

ء«بىز مۇندا تەك جاڭالىق الماسۋ ءۇشىن ەمەس,  شاحماتتى العا جىلجىتىپ جۇرگەن ادامداردى ماراپاتتاۋ ءۇشىن جينالامىز. ولار – سپورتشىلار مەن باپكەرلەردەن باستاپ, تورەشىلەرگە, مەنەدجەرلەرگە جانە وڭىرلەردەگى بالالارعا شاحمات ۇيرەتىپ جۇرگەن پەداگوگتەرگە دەيىنگى ماماندار. ارقايسىنىڭ ءوز مىندەتى, ءوز جاۋاپكەرشىلىگى, ءوز سىناعى بار. بىراق بارلىعىمىزدىڭ ماقساتىمىز ورتاق – قازاقستاندى شاحماتتا دا, ودان تىس سالالاردا دا كۇشەيتۋ», دەدى ت. تۋرلوۆ.

چەمپيونداردىڭ قالاي قالىپتاساتىنىن ءتۇسىنۋ ءۇشىن ەكى باعىتتى ناقتى اجىراتىپ قاراۋ قاجەت – سپورتتىق جانە ءبىلىم بەرۋ باعىتى. بۇلار ماقساتتارى دا, اۋديتورياسى دا ءارتۇرلى سالالار, الايدا ءبىر-ءبىرىن ءوزارا تولىقتىرىپ, كۇشەيتىپ وتىرادى.

ءبىرىنشى باعىت – 16 جاسقا دەيىنگى سپورتشىلارعا ارنالعان جاس تالانتتاردى قولداۋ باعدارلاماسى. بۇل – گرانتتار, وقۋ-جاتتىعۋ جيىندارى, حالىقارالىق تۋرنيرلەرگە قاتىسۋ جانە باپكەرلەرمەن جۇيەلى جۇمىستى كۇشەيتەدى. بولاشاق گروسسمەيستەرلەر مەن چەمپيوندار ءدال وسى ورتادا قالىپتاسادى. 2024 جىلى ۇلتتىق قۇراما ساپىنداعى 18 سپورتشىعا 454 ميلليون تەڭگە كولەمىندە قولداۋ كورسەتىلسە, 2025 جىلى 21 سپورتشىعا 425 ميلليون تەڭگە ءبولىندى. ناتيجە دە قۋانتارلىق. ءبيبىسارا اساۋباەۆا – بليتس شاحماتىنان ءۇش دۇركىن الەم چەمپيونى اتاندى. ايەلدەر قۇراماسى 2024 جىلى بۋداپەشتتە وتكەن وليمپيادادا كۇمىس جۇلدەگە يە بولىپ, قازاقستان تاريحىنداعى تۇڭعىش وسىنداي ناتيجەگە قول جەتكىزدى. قازىبەك نوگەربەك – U20 ساناتىندا  الەم چەمپيونى اتاعىن الدى. اليشا بيساليەۆا بىرنەشە جاس ساناتىندا الەم چەمپيونى اتاندى. ەدگار مامەدوۆ پەن مارك سميرنوۆ 2025 جىلى جاستار اراسىنداعى الەم چەمپيوندارى بولدى. فەدەراتسيانىڭ قولداۋىمەن 5 جاڭا گروسسمەيستەر مەن 15 حالىقارالىق شەبەر شىقتى.

ەكىنشى باعىت – ء«بىلىم بەرۋدەگى شاحمات» باعدارلاماسى. ونى سپورتتىق دايىندىقپەن شاتاستىرماعان ءجون. مۇنداعى ماقسات مۇلدە باسقا: چەمپيون تاربيەلەۋ ەمەس, ەلدەگى ءاربىر بالاعا شاحماتتى ويلاۋ قابىلەتىن دامىتاتىن قۇرال رەتىندە قولجەتىمدى ەتۋ.

مەملەكەتتىڭ 2023-2027 جىلدارعا ارنالعان شاحماتتى دامىتۋدىڭ كەشەندى جوسپارى بويىنشا 1400 مەكتەپتى قامتۋ مەجەسى مەرزىمىنەن بۇرىن ورىندالدى. بۇگىندە باعدارلاماعا ەلدىڭ بارلىق وڭىرىنەن 1500-دەن استام مەكتەپ پەن 60 000-نان استام بالا قاتىسۋدا. 2800 باستاۋىش سىنىپ مۇعالىمى ارنايى وقىتۋدان ءوتتى. 2025-2026 وقۋ جىلىندا بەس پەداگوگيكالىق جوعارى وقۋ ورنىنىڭ 204 ستۋدەنتى ارنايى Minor باعدارلاماسى بويىنشا ءبىلىم الا باستادى. ۋنيۆەرسيتەتتەرمەن 14 مەموراندۋمعا قول قويىلدى. عىلىم جانە جوعارى ءبىلىم مينيسترلىگىمەن بىرلەسىپ التى ستۋدەنتتىك تۋرنير ۇيىمداستىرىلدى.

كەش بارىسىندا ەرەكشە ەموتسياعا تولى ساتتەر از بولعان جوق. سەگىز جاستاعى اليشا بيساليەۆاعا تۇڭعىش عارىشكەر, حالىق قاھارمانى توقتار اۋباكىروۆ «جىل ءۇمىتى» ارنايى سىيلىعىمەن ماراپاتتادى. «جىل يۋنيورلارى» نوميناتسياسىن بوكستان وليمپيادا چەمپيونى سەرىك ساپيەۆ پەن قازاقستان گيمناستيكا فەدەراتسياسىنىڭ پرەزيدەنتى ءاليا يۋسۋپوۆا ەدگار مامەدوۆ پەن ەلناز قالياحمەتكە تابىستادى. «ەرەكشە سپورتشىلار» ساناتى بويىنشا بىردەن ءۇش نوميناتسيا ۇسىنىلدى. كورۋ قابىلەتى بويىنشا شەكتەۋى بار ەرلان نۇرحاەۆ جانە قوزعالىس مۇمكىندىگى شەكتەۋلى ايعانىم كامباروۆا, ەستۋ قابلىتەتىنە زاقىم كەلگەن نينا جۋكوۆسكايا ۇزدىك دەپ تانىلدى. ايعانىم 2025 جىلى مۇمكىندىگى شەكتەۋلى جاندارعا ارنالعان II شاحمات وليمپياداسىندا التىن مەدال جەڭىپ الىپ, ازيا چەمپيوناتىنىڭ دا جەڭىمپازى اتاندى.

قازاقستان شاحماتىنىڭ جاڭا جۇلدىزدارى: ساۋات پەن زارينا ەل بىرىنشىلىگىندە ۇزدىك اتاندى

«ۇزدىك ارداگەر» اتالىمى مارات پريمبەتوۆ, يننا ماتۆەەۆا-پوپرۋكايلو بەرىلسە,  «قشف-نىڭ ۇزدىك فيليالى» نوميناتسياسى قازاقستان شاحمات فەدەراتسياسىنىڭ الماتى قالالىق فيليالىنا بۇيىردى.   «ۇزدىك جاس تورەشى» – اقجان شوپانوۆ, «جىلدىڭ شاحمات امباسسادورى» – ءاليا ءاشىم جانە دانيل لي, «مەديا سالاسىنداعى جىلدىڭ سەرىكتەسى» –ەۆۋرازيا ءبىرىنشى ارناسىنىڭ ءتىلشىسى  الميرا كۋلمۋحامەدوۆا, ء«بىلىم بەرۋدەگى شاحمات» باعدارلاماسىنىڭ ۇزدىك فۋنكتسيونەرى – ايتيموۆا گۇلنۇر ەرسايىنقىزى, ء«بىلىم بەرۋدەگى شاحمات» باعدارلاماسىنىڭ ۇزدىك جوعارى وقۋ ورنى – قازاق ۇلتتىق قىزدار پەداگوگيكالىق ۋنيۆەرسيتەتى, ء«بىلىم بەرۋدەگى شاحمات» باعدارلاماسىنىڭ ۇزدىك مۇعالىمى» – مەرۋەرت تەميروۆا (استانا) جانە ساركىتبەكوۆا ورىنتاي (سەمەي), «جىل كومانداسى» (ولجاس سۇلەيمەنوۆ اتىنداعى سىيلىق) – KazChess كومانداسى, راپيد جانە بليتس بويىنشا كوماندالىق الەم چەمپيوناتىنىڭ جەڭىمپازدارى: دارمەن سادۆاكاسوۆ, الديار انسات, مەرۋەرت كاماليدەنوۆا, ەلناز قالياحمەت, يسلام ايتەن; كوماندا كاپيتانى – گۇلميرا داۋلەتوۆا, «جىل ءۇمىتى» (توقتار اۋباكىروۆ اتىنداعى سىيلىق) – اليشا بيساليەۆا, «جىل قىزمەتكەرى» – راۋشان قۇلاحمەتوۆا, «جىلدىڭ ۇزدىك سپورتشىسى» (اناتولي ۋفيمتسەۆ اتىنداعى سىيلىق, ايەلدەر اراسىندا) – ءبيبىسارا اساۋباەۆا, «جىلدىڭ ۇزدىك سپورتشىسى» (اناتولي ۋفيمتسەۆ اتىنداعى سىيلىق, ەرلەر اراسىندا) – الديار اڭساتقا بەرىلدى.