الماتى قالاسىنداعى «Tamos» مەكتەبىندە روبوتتەحنيكادان وتكەن «FIRST Championship» وڭىرلىك ىرىكتەۋ چەمپيوناتىندا اباي وبلىسىنىڭ «اlash» قۇراماسى توپ جارىپ, جۇلدەلى 2-ورىنعا يە بولدى.
بۇل جارىسقا ەلىمىز جانە وزبەكستاننان 40-قا جۋىق كوماندا قاتىستى. يننوۆاتسيالىق جوبالارىن ۇسىنعان 500-دەن اسا قاتىسۋشى ءۇش باعىتتا ونەر تاقىرىبى بويىنشا سىنعا ءتۇسىپ, ارنايى جابدىقتالعان الاڭداردا روبوتتارىن جارىستىردى.چەمپيوناتتان ۇزدىك شىققان كوماندالار اقپان ايىنىڭ سوڭىندا استانادا وتەتىن FIRST ورتالىق ازيا كەزەڭىنە جولداما الدى. اباي وبلىسىنىڭ كومانداسى وسى چەمپيوناتتا رەسپۋبليكا نامىسىن قورعايتىن بولادى.
«اlash» قۇراماسى قۇراستىرعان «فەنيكس» روبوتى شاعىندىعىمەن ەرەكشەلەنەدى. وزگە ءوڭىر كوماندالارىمەن پيكسەل جيناۋ, ۇشاق ۇشىرۋ جانە تۋرنيككە تارتىلۋدان سايىسقا تۇسكەن بۇل كوماندانىڭ وسى جولى ءباسى جوعارى بولدى. كوماندا جەتەكشىسى ەراسىل نۇرەكەنوۆ قۇراما مۇشەلەرىنىڭ بۇل سايىستا ۇزدىك ونەر كورسەتكەنىن اتاپ ءوتتى. ەلەكترتەحنيكالىق كوللەدج ستۋدەنتتەرى مەن اباي اۋدانى ش.ابەنوۆ اتىنداعى مەكتەپ وقۋشىلارىنان جاساقتالعان كوماندا قۇرامىندا كوللەدج ستۋدەنتتەرى – ازامات بەيبىت ۇلى, رۋسلان نەستەرەنكو, نۇربول ءجۇنىسوۆ, بەكجان قورعامباەۆ, سونداي-اق مەكتەپ وقۋشىلارى – ەرالى سىرىم ۇلى, سانجار اسقار ۇلى, ەلدار ورازبەكوۆ, جانبولات قايروللاەۆ بار.
«USTEM Foundation» ۇيىمداستىرعان چەمپيونات «Tamos» مەكتەبى مەن «Qstem Education»-نىڭ قولداۋىمەن ءوتتى. قاتىسقان كوماندالار اراسىنان ورتالىق ازيا ويىندارىنا 5 كوماندا جولداما الدى.
الماتى