الماتىدا تۇرمىستىق زورلىق-زومبىلىق قۇرباندارىنا كومەك كورسەتەتىن «جان-سايا» داعدارىس ورتالىعىنان بىلتىر 1980 ادام قولداۋ تاپسا, 2022 جىلى 1708 ادامعا كومەك كورسەتىلگەن. الماتى قالاسىنىڭ وڭىرلىك كوممۋنيكاتسيالار قىزمەتىنىڭ الاڭىندا داعدارىس ورتالىعىنىڭ باسشىسى زۋلفيا بايساكوۆا مەن زاڭگەر گۇلشارا ساپاروۆا ورتالىق جۇمىسى تۋرالى ايتىپ بەردى.
«جان-سايا» داعدارىس ورتالىعى ايەلدەر مەن بالالاردى گەندەرلىك زورلىق-زومبىلىقتىڭ كەز كەلگەن تۇرىنەن قورعاۋ قوزعالىسىن دامىتۋعا ىقپال ەتۋدى ماقسات ەتەدى.
«جوعارىدا كورسەتىلگەن ساندار مەن ورتالىقتىڭ جۇمىسى, سونداي-اق «150» سەنىم تەلەفونىنا كەلىپ تۇسكەن قوڭىراۋلار نەگىزىندە بىرقاتار ماسەلەلەر انىقتالىپ وتىر. ولاردىڭ ءبىرى ەلىمىزدىڭ حالىقارالىق مىندەتتەمەلەرىن ورىنداۋ ماقساتىندا جانە بۇۇ مۇشەسى رەتىندە وتباسىنا, جاقىندارىنا قاتىستى جاسالعان تۇرمىستىق زورلىق-زومبىلىقتى كريميناليزاتسيالاۋ بولىپ تابىلادى. بۇل قىلمىستىق كودەكسىنە «تۇرمىستىق زورلىق-زومبىلىق» دەگەن جەكە باپتى ەنگىزۋ قاجەتتىگىن كورسەتىپ وتىر», دەدى گ. ساپاروۆا.
ساراپشىنىڭ ايتۋىنشا, 2017 جىلعا دەيىن قىلمىستىق كودەكستىڭ «ۇرىپ-سوعۋ» نەمەسە «دەنەگە جەڭىل زيان كەلتىرۋ» باپتارى جەكە ايىپتاۋ قىلمىستارىنا جاتادى, ەگەر جابىرلەنۋشى ءوتىنىش بىلدىرمەسە, ءىس قوزعالمايدى. قىلمىستىق ءىس قوزعالسا دا, ول تاراپتار تاتۋلاسقان جاعدايدا توقتاتىلادى.
جاريا ايىپتاۋ جاعدايلارىندا قىلمىستىق قۋدالاۋدى تەرگەۋشى نەمەسە پروكۋرور مەملەكەت اتىنان جۇرگىزەدى, جابىرلەنۋشى تاراپتىڭ كەلىسىمى مەن باستاماسى تالاپ ەتىلمەيدى, تاتۋلاسۋ كوزدەلمەيدى.
«ەگەر قۇقىق قورعاۋ ورگاندارىندا ايىپتالۋشىلاردىڭ سانى ارتادى دەگەن كۇدىك بولسا, وندا حالىقارالىق تاجىريبەدە تانىلعان جانە كونستيتۋتسيانىڭ 24-بابىندا بەلگىلەنگەن مىندەتتى قوعامدىق جۇمىستاردى پايدالانۋدى ۇسىنامىز. سوعان وراي اگرەسسور تۇزەتۋ باعدارلاماسىنان وتۋگە مىندەتتەنەدى. بۇل سونداي-اق مەملەكەت تاراپىنان جابىرلەنۋشىنىڭ قاۋىپسىزدىگىنە كەپىلدىك بەرەدى. ماسەلەنىڭ سالدارىنان ورىن العان قايعىلى جاعدايلار ستاتيستيكاسى مەن وزەكتىلىگىن ەسكەرە وتىرىپ, تۇرمىستىق زورلىق-زومبىلىقتىڭ الدىن الۋ ءۇشىن 102, 112, 150 سەنىم تەلەفونىنا قوڭىراۋ شالىپ, 8 771 450 3 450 ۇيالى تەلەفونىنا نەمەسە whatsApp قوسىمشاسىنا جازۋعا بولادى. ماماندار كۇندىز جانە قاشىقتىقتان كەڭەس بەرەدى. ول ءۇشىن الدىن-الا جازىلۋ كەرەك. بولعان وقيعا بويىنشا شارالار قابىلدانبايدى دەپ قورىقپاۋ كەرەك, ويتكەنى بەلگىلى فاكتىلەر ىشكى ىستەر ورگاندارىندا تىركەلىپ, قاداعالاۋ ورگاندارى باقىلاۋ جۇرگىزەدى», دەپ قورىتىندىلاعان گ. ساپاروۆا زورلىق-زومبىلىقسىز مادەنيەت قالىپتاستىرۋعا قوعام بولىپ اتسالىسۋعا شاقىردى.