وتكەن جىلى جاساندى ينتەللەكت سالاسىنا قاتىستى سوزدەر ەڭ كوپ قولدانىستا بولعان ەكەن. جىل جاڭالىعىنىڭ ءبىرى دە مۇمكىندىگى كوپ چات-بوتتىڭ ازىرلەنۋى بولدى. قازىرگى كەزدە نەيروجەلىنىڭ كۇندەلىكتى ومىرىمىزگە دەندەپ ەنىپ كەلە جاتقانى ءار سالادان بايقالادى. ەندى جاساندى زەردەنىڭ جاردەمىمەن جۇمىسشى ىزدەگەندەر دە, جۇمىس ىزدەگەندەر دە وڭاي تابا الادى.
ەڭبەك جانە حالىقتى الەۋمەتتىك قورعاۋ مينيسترلىگى ەلەكتروندى ەڭبەك بيرجاسى پورتالىندا جۇمىس ىزدەۋشىلەر مەن جۇمىس بەرۋشىلەر ءۇشىن بوس ورىندار مەن تۇيىندەمەلەر بويىنشا ۇسىنىمداردى سايكەستەندىرىپ, جۇيەلەۋگە مۇمكىندىك بەرەتىن جاساندى ينتەللەكت مودەلىن ىسكە قوستى. نەيروجەلى اتالعان مينيسترلىكتىڭ اقپاراتتىق جۇيەلەرىنىڭ دەرەگىمەن ارنايى وقىتىلعان. بۇل جۇيە LinkedIn Recruiter ىزدەۋ جانە ۇسىنىستار جۇيەسىنە ۇقساس وزىق تاسىلمەن ازىرلەنگەن.
تۇيىندەمەلەر مەن بوس جۇمىس ورىندارىنىڭ مازمۇنىن ءتيىمدى تالداۋعا مۇمكىندىك بەرەتىن تابيعي ءتىلدى وڭدەۋ مودەلدەرى ەكى تاراپتىڭ دا جۇمىسىن ەداۋىر جەڭىلدەتە تۇسەدى. اتالعان مەحانيزم جۇمىس بەرۋشىلەرگە جۇمىسقا قابىلداۋ جانە كادر رەزەرۆىن قالىپتاستىرۋ ءۇشىن لايىقتى كانديداتتاردى جىلدام جانە ءدال ىزدەۋدى قامتاماسىز ەتسە, ال جۇمىس ىزدەۋشىلەرگە ءوزىنىڭ تالاپتارىنا سايكەس كەلەتىن بوس جۇمىس ورىندارىن تەزىرەك ىزدەپ تابۋعا مۇمكىندىك بەرەدى.
قىسقاسى, جاساندى ينتەللەكت بارلىق تۇيىندەمەنىڭ مازمۇنىن جاقسى تۇسىنەدى. ول جەردە جازىلعان جالاقى مولشەرى, تۇرعىلىقتى جەرى, كوشۋ مۇمكىندىكتەرى, داعدىلارى سياقتى ءارتۇرلى تالاپتى ەسكەرە وتىرىپ, جۇمىس ىزدەۋشىگە ەڭ قولايلى نۇسقالاردى ۇسىنىپ وتىرادى. ءدال سولاي جۇمىس بەرۋشىلەرگە دە لايىقتى ۇسىنىستار بەرەدى.
ەڭبەك جانە حالىقتى الەۋمەتتىك قورعاۋ مينيسترلىگىنىڭ مالىمەتىنشە, الداعى ۋاقىتتا نەيروجەلىنىڭ جۇمىسى ودان ءارى جەتىلدىرىلەدى. ماشينالىق وقىتۋ الگوريتمدەرىنىڭ جۇمىسىن جاقسارتا وتىرىپ, ءوتىنىش بەرۋشىلەرگە قوسىمشا ءبىلىم بەرۋ قىزمەتىن قوسۋ جوسپاردا بار.