مەملەكەت باسشىسى «Egemen Qazaqstan» گازەتىنە بەرگەن سۇحباتىندا كوپ ماسەلەگە توقتالعان. سونىڭ ءبىرى – بىلىكتى مامان جايى. مەملەكەتتى باسقارۋ جۇيەسىن جاڭعىرتۋ ماقساتىمەن اۋقىمدى رەفورمالار جۇزەگە اسىپ جاتقاندىعىنىڭ كۋاسى بولىپ وتىرمىز.
«2023 جىل ەلىمىز ءۇشىن ماڭىزدى وقيعالارعا تولى جىل بولدى. ءبىز نەگىزگى ساياسي رەفورمالاردى اياقتاپ قالدىق. كونستيتۋتسيالىق سوت جۇمىسىن باستادى. ءماجىلىس جانە بارلىق دەڭگەيدەگى ءماسليحات دەپۋتاتتارى جاڭا ەرەجە بويىنشا سايلاندى. العاش رەت اۋدان جانە وبلىستىق ماڭىزى بار قالا اكىمدەرىن سايلادىق. اۋىل جانە اۋداندىق ماڭىزى بار قالا اكىمدەرىن سايلاۋ جالعاستى. بىلتىر 700-گە جۋىق اۋىل اكىمى سايلاندى», دەدى مەملەكەت باسشىسى.
جاڭا كەزەڭگە قادام باسقان قازاق ەلىنىڭ باسشىلىق قۇرامىن جاڭارتۋ جۇمىستارى ءجۇرىپ جاتقانى دا بەلگىلى. مەملەكەتتىك قىزمەتتە ادال ءارى بىلىكتى ماماندار از دەپ ايتا المايمىز. ەڭ باستىسى, مەملەكەتتىك قىزمەتشىنىڭ باستى قاسيەتتەرى – ناعىز مامان بولۋ مەن وتانشىلدىق. مۇنى پرەزيدەنتىمىز ءاردايىم ايتىپ ءجۇر.
بۇگىنگى شەنەۋنىكتەر مەن باسشىلارعا قويىلاتىن باستى تالاپ – قوعامنىڭ تامىرىن تاپ باسا بىلۋگە, ازاماتتاردىڭ مۇڭ-مۇقتاجىن تىڭداپ-تۇسىنۋگە, سوعان سايكەس دەر كەزىندە ناتيجەلى شارالار قابىلداۋعا جانە دۇرىس شەشىم شىعارۋعا قابىلەتتى بولۋى كەرەك ەكەنىن مەملەكەت باسشىسى وسى سۇحباتىندا شەگەلەپ تۇرىپ ايتتى. مەملەكەتتىك قىزمەتشىگە باستى قاعيدات رەتىندە «ادام مەملەكەت ءۇشىن ەمەس, مەملەكەت ادام ءۇشىن» ەكەندىگىن جادىندا بەرىك ۇستانۋ كەرەك جانە ادىلەتتى قازاقستاندى قۇرۋ يدەياسىنا ادالدىعى ماڭىزدى ەكەنى دە ماقالادا كورسەتىلگەن.
ارينە, مەملەكەتتىڭ بولاشاعى جاس بۋىنعا بايلانىستى ەكەنى ءسوزسىز. سوندىقتان «جۇزدەن – جۇيرىك, مىڭنان – تۇلپار» شىققان جاستاردىڭ جاۋاپتى قىزمەتكە كەلۋى ءۇشىن جاسالىپ جاتقان يگى باستامالار بار. مۇنداعى باستى مىندەت – مەملەكەتتىك اپپاراتتى جەتىلدىرۋ جانە باسشىلاردىڭ جاڭا بۋىنىنا جول اشۋ. پرەزيدەنتتىك كادر رەزەرۆىنىڭ نەگىزگى كوزدەگەن ماقساتى – وزىق ويلى, باسەكەگە قابىلەتتى ماماندار, ونىڭ ۇستىنە ۇلتجاندىلىقتىڭ, وتانشىلدىقتىڭ وزىق ۇلگىسىن كورسەتىپ, مەملەكەتىمىزدى ودان ءارى وركەندەتىپ, تاۋەلسىزدىگىمىزدى نىعايتاتىن جاستاردى تابۋ. تالانتتى جاستاردىڭ ەلىمىزدى جاڭا بەلەستەرگە كوتەرۋىنە مۇمكىندىك بەرۋ ارقىلى ينتەللەكتۋالدى ۇلت قالىپتاستىرۋ باستى شارتتىڭ ءبىرى.
بۇل ورايدا مەملەكەت باسشىسى جاستارعا سەنىم ارتىپ وتىرعاندىعىن اشىپ ايتقان. جاس ۇرپاقتىڭ جاڭا يدەيالارىن قولداۋمەن قاتار اعا بۋىننىڭ تاجىريبەسىنە دە سۇيەنۋ كەرەك ەكەندىگىنە دە توقتالىپ وتىر. بۇل ساياسات الداعى ۋاقىتتا دا جالعاسىن تابا بەرمەكشى.
جاستارىمىز ءاردايىم ۇلتتىق قۇندىلىقتاردى كوزدىڭ قاراشىعىنداي ساقتاپ, دارىپتەي ءبىلۋى كەرەك. وتانعا سۇيىسپەنشىلىكتىڭ وزىق ۇلگىسىن تاريحي تۇلعالارىمىز – ۇلى اباي, ۇلت ۇستازى احمەت, عۇلاما عالىم قانىش كورسەتتى. پرەزيدەنتتىڭ سۇحباتىندا قازاق ەلىنىڭ تاريحىندا ەرەكشە ورنى بار ايگىلى عالىم قانىش ساتباەۆتىڭ 125 جىلدىعىنا قۇرمەت كورسەتۋ كەرەك ەكەندىگى ءارى وسىنداي تاريحي تۇلعالار جالپىۇلتتىق بىرەگەيلىكتى نىعايتۋعا زور سەپتىگىن تيگىزەتىندىگى ءسوزسىز ەكەندىگىنە دە توقتالىپ وتكەن. عۇلاما ويشىلدار مەن باتىرلاردىڭ, ونەر قايراتكەرلەرىنىڭ عيبراتتى عۇمىرلارى مەن مول مۇراسى بۇكىل حالقىمىزعا ۇلگى-ونەگە ەكەندىگى دالەلدەۋدى قاجەت ەتپەيدى.
ء«بىز وزىق ويلى ۇلت رەتىندە حالقىمىزدى ىدىراتاتىن ەمەس, بىرىكتىرەتىن جولدى تاڭداپ, تەك العا قاراۋىمىز كەرەك. جالپىۇلتتىق قۇندىلىقتار بارىنەن جوعارى تۇرۋعا ءتيىس. حالقىمىزدىڭ قۋاتىن ارتتىرىپ, تابىسقا جەتەلەيتىن وسىنداي قاسيەتتەر مەن قۇندىلىقتاردى جان-جاقتى دارىپتەپ, ۇرپاق ساناسىنا ءسىڭىرۋ ارقىلى عانا ساپالى ۇلتقا اينالا الامىز», دەگەن پرەزيدەنت ءسوزىن بارشا بۇقاراعا جول نۇسقاعان باستى باعىت-باعدار دەپ تانۋىمىز, قابىلداۋىمىز, ۇستانۋىمىز كەرەك.
التىنبەك نۋح ۇلى,
سەنات دەپۋتاتى