مەملەكەتتىك كەڭەسشى ەرلان قاريننىڭ توراعالىعىمەن پرەزيدەنت جانىنداعى سىبايلاس جەمقورلىققا قارسى ءىس-قيمىل ماسەلەلەرى جونىندەگى كوميسسيانىڭ وتىرىسى ءوتتى.
جيىندا قازاقستان رەسپۋبليكاسىنىڭ سىبايلاس جەمقورلىققا قارسى ساياساتىنىڭ 2022-2026 جىلدارعا ارنالعان تۇجىرىمداماسىن جانە ەۋروپالىق كەڭەس جانىنداعى سىبايلاس جەمقورلىققا قارسى كۇرەس جونىندەگى مەملەكەتتەر توبىنىڭ (گرەكو) ۇسىنىمدارىن جۇزەگە اسىرۋ ماسەلەلەرى قاراستىرىلدى.
ءبىرىنشى ماسەلەنى تالقىلاۋ بارىسىندا پرەزيدەنت قاسىم-جومارت توقاەۆتىڭ تاپسىرماسى بويىنشا ازىرلەنگەن سىبايلاس جەمقورلىققا قارسى ساياساتتىڭ 2022-2026 جىلدارعا ارنالعان تۇجىرىمداماسى ەلىمىزدە جۇرگىزىلىپ جاتقان رەفورمالاردىڭ قيسىندى جالعاسى ەكەنى, بۇل قۇجات سىبايلاس جەمقورلىققا قارسى كەشەندى جۇمىس جۇرگىزۋگە, قوعامدا جەمقورلىققا قارسى يممۋنيتەت قالىپتاستىرۋعا جانە حالىقتىڭ ءال-اۋقاتىن ارتتىرۋعا باعىتتالعانى اتاپ ءوتىلدى.
مەملەكەتتىك كەڭەسشى اتالعان تۇجىرىمدامانى ىسكە اسىرۋ جونىندەگى ءىس-قيمىل جوسپارىندا بەلگىلەنگەن شارالاردى ورىنداۋمەن قاتار, ولاردىڭ جەمقورلىق دەڭگەيىن تومەندەتۋگە ناقتى اسەرى تۋرالى وبەكتيۆتى دەرەكتەردى قاداعالاپ وتىرۋ قاجەت ەكەنىنە نازار اۋداردى.
سونىمەن قاتار سىبايلاس جەمقورلىققا قارسى ءىس-قيمىل اگەنتتىگىنە قۇقىق قولدانۋ تاجىريبەسىن مۇقيات زەردەلەپ, سونىڭ ناتيجەسىندە تۇجىرىمدامانى ىسكە اسىرۋ جونىندەگى ءىس-قيمىل جوسپارىنا ءتيىستى شارالاردى جەدەل ەنگىزىپ وتىرۋ ۇسىنىلدى.
ەكىنشى ماسەلەنى قاراستىرۋ بارىسىندا سىبايلاس جەمقورلىققا قارسى ءىس-قيمىلدىڭ ءتيىمدى تاسىلدەرىن ودان ءارى ەنگىزۋ ءۇشىن گرەكو-مەن سىندارلى ىنتىماقتاستىقتى نىعايتۋعا باسا ءمان بەرىلدى. ەرلان قارين شەتەلدىك ساراپشىلاردىڭ ۇسىنىمدارىن پىسىقتاپ, ولاردى ىسكە اسىرۋدىڭ پارمەندى تەتىكتەرىن ازىرلەۋ ءۇشىن جۇمىستى جانداندىرۋ قاجەت ەكەنىن اتاپ ءوتتى.
كوميسسيا تالقىلانعان ماسەلەلەردى ەسكەرە وتىرىپ, ناقتى ۇسىنىمدار ازىرلەدى.