جۋىردا بىرقاتار ازاماتتىق قوعام وكىلى قازاقستاندا اەس قۇرىلىسىن قولدايتىندارىن ءبىلدىردى. استانادا ۇەۇ, ازاماتتىق قوعام وكىلدەرىنىڭ قاتىسۋىمەن «بەيبىت اتوم» تاقىرىبىندا رەسپۋبليكالىق سەمينار ءوتتى. وندا اەس-كە قاتىستى قازاق قوعامىن مازالاعان سان الۋان سۇراققا جاۋاپ ىزدەدى.
ەلدىك ءىس-شاراعا ارنايى كەلگەن اتوم سالاسىنىڭ ساراپشىلارى سەمينارعا قاتىسۋشىلارعا ەلەكتر ەنەرگەتيكاسىن دامىتۋدىڭ بولجامدى بالانستارى, قازاقستاندا اەس سالۋ جوسپارلارى جانە اەس-ءتىڭ ەكونوميكانى كوتەرۋگە اسەرى تۋرالى تەرەڭنەن تارتىپ, كەڭ تولعاپ ايتىپ بەردى.
ەنەرگەتيكا مينيسترلىگى اتوم ەنەرگەتيكاسى جانە ونەركاسىبى دەپارتامەنتى ديرەكتورىنىڭ ورىنباسارى گۇلميرا مۋرسالوۆا قازاقستاندا ەلەكتر ەنەرگياسىنىڭ تاپشىلىعى سوڭعى كەزدە انىق بايقالاتىنى جونىندە بايانداپ, اەس ەلەكتر ەنەرگياسىنىڭ تۇراقتى بازالىق گەنەراتسياسىن قامتاماسىز ەتۋگە كومەكتەسەتىنىن ءتۇسىندىردى.
«قازاقستاندا اەس سالىپ, اتوم ەنەرگياسىن بەيبىت تۇردە ەل يگىلىگىنە جاراتۋ, وتانىمىزدى ەلەكتر قۋاتىنا تاۋەلدىلىكتەن ايىرۋمەن قاتار, ونىڭ ارتىلعانىن كورشى ەلدەرگە ساتىپ پۇلداۋعا دا جول اشادى. ەڭ باستىسى, اۋانى لاستايتىن زياندى شىعىندىلاردى مەيلىنشە ازايتىپ, قورشاعان ورتانىڭ تازالىعىن جاقسارتىپ, ازاماتتاردىڭ سالاماتتى ءومىر ءسۇرۋىن قامتاماسىز ەتۋگە دە مول مۇمكىندىك بەرەدى. ەلدىڭ ەنەرگەتيكاعا قاتىستى كەلەشەگىن بۇگىننەن باستاپ دۇرىس باعامداي الماساق, ارتتا قالعان ەلدەردىڭ قاتارىنا ءتۇسىپ قالۋىمىز ابدەن مۇمكىن», دەدى گ.مۋرسالوۆا
«قاەس» جشس باس ديرەكتورى تيمۋر جانتيكين قازاقستاندا اەس سالۋ جوباسى, اتوم ستانساسىنىڭ تەحنيكالىق اسپەكتىلەرى مەن ەكولوگياعا اسەرى تۋرالى اڭگىمەلەدى. ءسوز كەزەگىندە «بايتاق» پارتياسىنىڭ توراعاسى ازاماتحان امىرتاەۆ ەلىمىزدە اتوم ەنەرگەتيكاسىن دامىتۋ قاجەتتىگىن تاپتىشتەپ, اەس – ەلەكتر ەنەرگياسىن ءوندىرۋدىڭ ناعىز ەكولوگيالىق كوزى بولىپ تابىلاتىنىن ايتتى.
«جاسىلدار پارتياسى جاسىل ەنەرگيانى, اتوم ەنەرگياسىن قولدايدى. ءبىز بالالارىمىزدىڭ بولاشاعىن جاسىل ەنەرگيانىڭ كومەگىمەن قامتاماسىز ەتۋىمىز كەرەك. ويتكەنى اتوم ەلەكتر ستانساسىندا پارنيكتىك شىعارىندىلار جوق. سوندىقتان قازاقستانعا اتوم ەلەكتر ستانساسىن مىندەتتى تۇردە سالعان دۇرىس دەپ ويلايمىن. سەبەبى ءبىزدىڭ ەلدە ەلەكتر ەنەرگياسىنىڭ تاپشىلىعى بار. تاعى دا قايتالاپ ايتايىن, اەس تەمىرتاۋ, بالقاش, جاڭاتاس سياقتى قالالارداعى كومىر شىعارىندىلارىنىڭ ماسەلەلەرىن شەشۋگە جانە ەلدىڭ ەكولوگيالىق جاعدايىن جاقسارتۋعا بەك كومەكتەسەدى», دەدى ول.
سەميناردىڭ سالماقتى ءبولىمى پىكىر الماسۋدا ەلدەگى بىرقاتار قوعامدىق ۇيىم مەن بىرلەستىكتىڭ جەتەكشىلەرى, سونداي-اق بەلسەندى وكىلدەرى اەس-كە قاتىستى وي-تولعامدارىنىڭ انىق قورىتىندىسى تۋرالى اشىق ايتىپ, بارلىعى ءبىر پاتۋاعا كەلگەندەي بولدى. «ادامزات وركەنيەتىنىڭ ەڭ ارتىندا قالمايىق دەسەك, اەس-ءتى تولىق يگەرىپ, ەل يگىلىگىنە دۇرىس پايدالانايىق!».
ال «كۇمىس ەرىكتىلەر» قب وكىلى ەلۆيرا رافيكوۆا ەلىمىزگە اەس اۋاداي قاجەت دەپ سانايتىنىن ايتتى.