جامبىل وبلىسىندا جاۋعان العاشقى قار حالىقتى ابىگەرگە ءتۇسىردى. بەت قاريتىن ۇسكىرىك اياز سالدارىنان بىرقاتار جول جابىلىپ, كەيبىر اۋدانداردا تۇرعىنداردىڭ قارعا ادىم جەر اتتاپ باسۋى مۇڭعا اينالدى. سالدارىنان جول اپاتى دا ارتتى.
قىس مەزگىلىنە دايىندىق جۇمىستارى ساتىمەن جۇرگىزىلگەنىنە قاراماستان, جامبىل اۋدانىنىڭ اۋماعىنداعى بىرنەشە اۋىل تۇرعىندارى, 980 ءۇي كوگىلدىر وتىنسىز قالدى. جەرگىلىكتى اتقارۋشى بيلىك تاراپىنان بۇل ماسەلە جەدەل باقىلاۋعا الىندى. 12 جەلتوقسان كۇنى ىستەن شىققان ماگيسترالدى گاز قۇبىرىن قالپىنا كەلتىرۋ جۇمىستارى ءوڭىر باسشىسى ەربول قاراشوكەەۆتىڭ نازارىنان تىس قالعان جوق. ءتيىستى جۇمىس اتقارىلدى.
اۋا رايىنىڭ كۇرت وزگەرۋى 14 جەلتوقساننان 15 جەلتوقسانعا اۋعان ءتۇنى دە جالعاستى. جالپى العاندا, قار ارالاس بوران مەن تۇمان سالدارىنان 12 جەلتوقساننان باستاپ, «باتىس ەۋروپا – باتىس قىتاي» ءاۆتودالىزى بويىنداعى «تاراز – الماتى» باعىتى بويىنشا جانە وبلىستىق ماڭىزى بار بىرقاتار جولدا كولىك قوزعالىسى توقتاتىلدى. 13 جەلتوقساننان باستاپ وڭىرلىك جەدەل شتاب قۇرىلىپ, ءتيىستى جۇمىستار جۇرگىزىلىپ جاتىر.
14 جەلتوقساننان 15 جەلتوقسانعا اۋعان ءتۇنى قورداي اۋدانىندا جاعداي كۇرت وزگەردى. بوراندى كۇندە جولعا شىققان ازاماتتاردى قۇتقارۋ جۇمىستارى باستالىپ كەتتى.
«قۇتقارۋ جۇمىستارىنا 117 ارنايى تەحنيكا, 103 ارنايى مامان جۇمىلدىرىلدى. 14 جەلتوقسان كۇنى ساعات 23.00-دەگى جاعداي بويىنشا قۇتقارۋ بولىمشەلەرىمەن 1279 ادام قۇتقارىلىپ, ەۆاكۋاتسيالاندى. ولار قورداي اۋدانىنداعى 6 جىلىتۋ پۋنكتىنە ورنالاستىرىلدى (قاينار-1, العا-1, قورداي-3, كەنەن-1). ءالى دە قار قۇرساۋىندا قالىپ وتىرعان كولىكتەردىڭ سانى ناقتىلانىپ جاتىر. قاتتى جەل مەن قالىڭ قاردىڭ سالدارىنان شۋ اۋدانىندا ەلەكتر جەلىلەرى ءۇزىلدى.
توتەنشە جاعداي سالدارىنان «شۋ وتار» ۋچاسكەسىندە 11 جولاۋشى پويىزى توقتاپ تۇر, ولاردىڭ ارقايسىسىندا ورتاشا ەسەپپەن 500-700 ادامنان بار. 12 جۇك پويىزى ءوز ۋاقىتىنان كەشىگىپ جاتىر. وبلىستىڭ 4 اۋدانىنىڭ 32 ەلدى مەكەنىندە 8 882 ابونەنت ەلەكتر قۋاتىنان اجىراتىلعان. قازىرگى كەزدە جەلدىڭ جىلدامدىعى سەكۋندىنا 45 مەترگە دەيىن جەتكەن», دەلىنگەن وبلىس اكىمدىگىنىڭ ءباسپاسوز قىزمەتى تاراتقان باستاپقى مالىمەتتە.
سوڭعى دەرەكتەرگە جۇگىنسەك, 15 جەلتوقساننىڭ الا تاڭىندا مامانداردىڭ ءابجىل قيمىلىنىڭ ارقاسىندا 2 413 ادام قۇتقارىلىپتى. ولاردىڭ ىشىندە 90 بالا بار. سونداي-اق 600-گە جۋىق ازامات ۇيىنە قايتقان. 1 813 ازامات التى ەلدى مەكەندەگى جىلىتۋ پۋنكتتەرىنە جەتكىزىلگەن. ماماندار 3 ازاماتتى قورداي اۋدانىنىڭ ورتالىق اۋرۋحاناسىنا اپارعان. ولاردىڭ جاعدايى تۇراقتى كورىنەدى. جالپى العاندا, ەكى تاۋلىكتىڭ بەدەرىندە 5 000 ادام قۇتقارىلعان.
«قازىرگى ۋاقىتتا قورداي جانە شۋ اۋداندارىندا قوسىمشا 825 ورىندىق 9 جىلىتۋ پۋنكتى ۇيىمداستىرىلعان. قۇتقارۋ شارالارىنا 171 ادام جانە 76 بىرلىك تەحنيكا جۇمىلدىرىلعان. جولداعى بلوك-بەكەتتەرگە پوليتسيا ناريادتارى قويىلعان.
ەلەكتر جەلىلەرىن قالىپقا كەلتىرۋ بويىنشا «جامبىل ەلەكتر جەلىلەرى» جشس-مەن 23 اۆاريالىق-قۇتقارۋ توبى, 27 ارنايى تەحنيكا جۇمىلدىرىلدى. گاز قۇبىرلارىنىڭ اپاتى تىركەلگەن جوق, شتاتتى رەجىمدە بەرىلگەن.
توتەنشە جاعدايعا بايلانىستى «شۋ-وتار» ۋچاسكەسىندە 11 جولاۋشى پويىزى توقتاپ قالعان بولاتىن. شۋ اۋداندىق كولىك پروكۋراتۋراسىنىڭ اقپاراتى بويىنشا, قازىرگى كەزدە جولاۋشىلار پويىزدارى جۇرە باستاعان», دەلىنگەن رەسمي مالىمەتتە.
ءوڭىر باسشىسىنىڭ شەشىمىمەن 14 جەلتوقساندا قورداي جانە شۋ اۋداندارىنىڭ اۋماعىندا تابيعي سيپاتتاعى توتەنشە جاعداي جاريالاندى. قازىرگى تاڭدا قاۋىرت جەلى نومىرلەرى ۇزدىكسىز جۇمىس ىستەپ تۇر.
قىسقى ماۋسىمعا دايىندىق جۇمىستارى كۇنى بۇرىن پىسىقتالعانىمەن, وڭىردە گاز قۇبىرىنىڭ ىستەن شىعۋى جۇرتتى كادىمگىدەي الاڭداتتى. جامبىل اۋدانىنىڭ كەيبىر ەلدى مەكەندەرىندەگى جاعداي كوپكە ساباق بولسا دەپ وتىرعانىمىزدا, تۇرار رىسقۇلوۆ اۋدانىنىڭ ورتالىعى قۇلان اۋىلىنىڭ كىرەبەرىسىندەگى كوشە تۇرعىندارى دا كوگىلدىر وتىن مەن اۋىز سۋسىز قالعانىن ايتىپ حابارلاستى. ابىروي بولعاندا جەرگىلىكتى اتقارۋشى بيلىكتىڭ جەدەل ىسكە كىرىسۋىمەن گاز بەرىلگەن كورىنەدى. اۋىز سۋ دا ءتۇن ورتاسىنان اۋعاندا قوسىلدى.
«بيىل قىس بولمايدى ەكەن» دەپ جايباراقات جۇرگەن تۇرعىندار العاشقى قاردىڭ وزىندە ابىگەرگە ءتۇسىپ وتىر. اياز سالدارىنان جول اپاتى دا جيىلەدى. قالاي دەسەك تە قىتىمىر قىستىڭ العاشقى ايازى جەرگىلىكتى بيلىكتى دە ءبىر سىناپ الدى. دايىندىق جۇمىستارىنىڭ قاي دەڭگەيدە جۇرگىزىلگەنىن كورسەتىپ بەرگەندەي بولدى.
جامبىل وبلىسى