الماتى وبلىسىندا العاش رەت وتكەن «Amanat» پارتياسىنىڭ بارلىق دەڭگەيدەگى ءماسليحات دەپۋتاتتارىنىڭ I وڭىرلىك فورۋمى حالىق قالاۋلىلارى مەن مەملەكەتتىك قىزمەتشىلەر اراسىنداعى بايلانىستى نىعايتۋعا نەگىزدەلدى.
دەپۋتاتتاردىڭ قىزمەتىن جانداندىرۋ, حالىقتىڭ پارتياعا دەگەن سەنىمىن ارتتىرۋ, ءماسليحات دەپۋتاتتارى مەن مەملەكەتتىك ورگاندار اراسىنداعى اشىق ءارى ءتيىمدى ديالوگ قۇرۋ, وسى جانە تاعى باسقا دا ماسەلەلەر قوناەۆ قالاسىندا وتكەن «Amanat» پارتياسىنان سايلانعان بارلىق دەڭگەيدەگى ءماسليحات دەپۋتاتتارىنىڭ ءى وبلىستىق فورۋمىندا ايتىلدى. جيىنعا وبلىس اكىمى مارات سۇلتانعازيەۆ, سونداي-اق ارداگەرلەر مەن پارتيا بەلسەندىلەرى, وبلىستىق باسقارما جانە دەپارتامەنت باسشىلارى دا قاتىستى. فورۋمنىڭ اشىلۋىندا ءسوز العان الماتى وبلىسىنىڭ اكىمى پارتيانىڭ سايلاۋالدى باعدارلاماسى اياسىندا ءوڭىردىڭ الەۋمەتتىك ەكونوميكالىق دامۋىنىڭ 10 ايىنا قورىتىندى جاسادى.
ونىڭ ايتۋىنشا, بيىل بارلىق سالادا ءوسىم قامتاماسىز ەتىلىپ, جىل سوڭىنا قاراي جالپى وڭىرلىك ءونىم كولەمىن 4,7 پايىز وسىممەن 4,6 تريلليون تەڭگەگە دەيىن جەتكىزۋ جوسپارلاندى. بۇل رەتتە پارتيانىڭ 2023-2027 جىلدارعا ارنالعان «حالىقپەن بىرگە!» سايلاۋالدى باعدارلاماسى شەشۋشى ءرول اتقارادى.
«بيىلعا جوسپارلانعان 88 ءىس-شارانىڭ 42 پايىزى ورىندالدى. جالپى, جول كارتاسىندا كوزدەلگەن 106 ءىس-شارا كەزەڭىمەن جۇزەگە اسىرىلىپ جاتىر. قاراجات كولەمى 2 ترلن 342,4 ملرد تەڭگەنى قۇرايدى. پارتيانىڭ ساياسي باعىتىن ورىنداۋ ماقساتىندا وڭىردە الەۋمەتتىك-ەكونوميكالىق دامۋدىڭ وڭ ديناميكاسى ساقتالدى. اتالعان فورۋم دەپۋتاتتار مەن جەرگىلىكتى اتقارۋشى ورگاندار اراسىندا الماتى وبلىسىنىڭ ەكونوميكاسىن دامىتۋ ماسەلەلەرىن تالقىلاۋ ءۇشىن اشىق ديالوگ الاڭىنا اينالعانىن قالايمىز», دەدى وبلىس اكىمى مارات سۇلتانعازيەۆ.
سونىمەن قاتار ءماسليحات دەپۋتاتتارىنىڭ رولىنە توقتالعان ايماق باسشىسى ولاردىڭ حالىقتىڭ وزەكتى ماسەلەلەرىن شەشۋدەگى باسىم مىندەتتەرىن اتاپ ءوتىپ, وڭىردەگى وڭ وزگەرىستەرىنىڭ باستاماشىسى بولۋ ماڭىزدىلىعىن ايتتى.
ال پارتيا فيليالىنىڭ توراعاسى قۋات بايعوجاەۆ بۇل فورۋم اماناتتىق دەپۋتاتتارعا مەملەكەتتىك ورگان باسشىلارىمەن تىكەلەي تىلدەسۋگە مۇمكىندىك جاسالعان ءىس-شارا ەكەنىن ايتتى.
«فورۋمدى وتكىزۋدەگى نەگىزگى ماقسات – دەپۋتاتتار مەن جەرگىلىكتى اتقارۋشى ورگان اراسىنداعى ىنتىماقتاستىقتى نىعايتۋ. ويتكەنى دەپۋتاتتار تاراپىنان مەملەكەتتىك ورگاندارعا كوپتەگەن سۇراق تۋىندايدى. سول سۇراقتاردى بىرلەسىپ تالقىلاپ, بىرگە شەشۋ جولدارىن قاراستىردىق. مەملەكەتتىك ورگان باسشىلارىمەن تىكەلەي تىلدەسۋگە مۇمكىندىك جاسالدى. ماڭىزدى ماسەلەلەر تالقىلاندى», دەيدى قۋات بايعوجاەۆ.
ايتا كەتسەك, الماتى وبلىسىندا بارلىق دەڭگەيدەگى 228 ءماسليحات دەپۋتاتىنىڭ 190-ى «Amanat» پارتياسىنىڭ مۇشەسى. ولار جىل باسىنان بەرى 517 قابىلداۋ جۇرگىزىپ, 1 مىڭنان اسا ادامدى قابىلداعان. ونىڭ 817-ءسىنىڭ ءوتىنىشى وڭ شەشىمىن تاپتى. قالعاندارىنا زاڭ اياسىندا تۇسىنىكتەمە بەرىلدى.
الماتى وبلىسى