مەڭدىقارا اۋدانىندا قۇرعاق ساۋمال وندىرەتىن تەحنيكالىق فەرما ىسكە قوسىلدى. «S-Agro-Borovskoe» جاۋاپكەرشىلىگى شەكتەۋلى سەرىكتەستىگى الداعى ۋاقىتتا ساۋىن بيەلەردىڭ سانىن مىڭعا جەتكىزىپ, جىلدىق ءونىم كولەمىن 40 تونناعا دەيىن ارتتىرۋدى كوزدەپ وتىر.
سەرىكتەستىك باسشىسىنىڭ ايتۋىنشا, قۇرعاق ساۋمالدىڭ قۇرامىندا ادام دەنساۋلىعىنا پايدالى ميكروەلەمەنتتەر مەن دارۋمەندەر كوپ بولادى. جاڭا ءونىم ساپاسى جاعىنان تابيعي ساۋمالعا ۇقسايدى.
«الداعى ۋاقىتتا نەمىستىڭ «Zollmann Stutenmilch GmbH» كومپانياسىمەن بىرلەسىپ, كوسمەتولوگيا, بالالار مەن سپورتشىلارعا ارنالعان تاعامداردى شىعارامىز. قازىر مەنشىگىمىزدە 15 مىڭ گەكتاردان اسا جايىلىم, 1 مىڭنان اسا كوشىم جىلقىسىنىڭ تۇقىمى بار. ءوندىرىستى جولعا قويۋدىڭ باستاپقى كەزەڭىندە وندىرىستىك تسەحتى, اكىمشىلىك عيماراتتى پايدالانۋعا بەرۋ ىسكە اسىرىلدى. سالقىنداتقىش تانكتەر, پاستەريزاتور, 100 ليترلىك سۋبليماتور, ساۋ جۇيەسى ىسكە قوسىلدى. بولاشاقتا ءونىمدى ءوندىرۋ قۋاتىن جىلىنا 40 تونناعا دەيىن ارتتىرۋدى, 150 جۇمىس ورنىن قۇرۋدى جوسپارلاپ وتىرمىز. جوبانىڭ جالپى قۇنى – 10 ملرد تەڭگە. مۇنىڭ سىرتىندا 400 باس ءىرى قاراعا ارنالعان ءسۇت فەرماسىن اشۋدى جوسپارلاپ وتىرمىز. مۇندا جىلىنا 4 ملن 500 مىڭ ليتر ءسۇت وندىرەمىز», دەيدى «S-Agro-Borovskoe» جشس ديرەكتورى مەيرام احمەتجانوۆ.
سەرىكتەستىك قولعا الىپ وتىرعان بىرەگەي جوبا نەمىس تەحنولوگياسىنا نەگىزدەلگەن. نەمىس كاسىپكەرلەرى گانس تسولمان مەن رۋدولف شتورح وسىدان 48 جىل بۇرىن قىمىز ءوندىرىسىن جولعا قويىپ, ءوزى ويلاپ تاپقان قىمىز دايىنداۋ ءادىسىن پاتەنتتەپ العان ەكەن.
م.احمەتجانوۆتىڭ ايتۋىنشا, وتكەن عاسىردىڭ 60-جىلدارى باتىس ەۋروپا عالىمدارى قىمىزدىڭ ادام اعزاسىنا پايداسىن جاپپاي زەرتتەي باستاعان. بۇل زەرتتەۋلەردىڭ ناتيجەسىندە بيە ءسۇتىنىڭ وكپە, اسقازان اۋرۋلارىن ەمدەۋگە, يممۋنيتەتتى كوتەرۋگە وڭ اسەر ەتەتىنى انىقتالعان. تسولماندار اۋلەتى وسى تۇجىرىمداردى ءارى قاراي دامىتىپ, بيە ءسۇتىنىڭ اللەرگياسى بار بالالارعا اسا پايدالى ەكەنىن دالەلدەپ شىققان.
قوستاناي وبلىسى