كەلەسى جىلدىڭ 27 قاڭتارىندا ەلورداداعى «قازاقستان» جابىق عيماراتىندا جەڭىل اتلەتيكادان «Astana Indoor Meet» دەپ اتالاتىن اسا ءىرى حالىقارالىق تۋرنير وتەدى. اتالعان جارىسقا جەرلەستەرىمىزدەن بولەك, الىس-جاقىن شەت مەملەكەتتەردەن بىراقتار تانىمال سپورتشى قاتىسادى.
كۇنى كەشە عانا اتالعان جارىستى ۇيىمداستىرۋشىلار جاعىمدى جاڭالىقپەن ءبولىستى. اتاعى الىسقا جايىلعان 24 جاستاعى سىرىقپەن سەكىرۋشى ارمان ديۋپلانتيس استاناداعى ءدۇبىرلى دوداعا قاتىسۋعا ءوز كەلىسىمىن بەرگەن ەكەن. ول اقش-تىڭ لۋيزيانا شتاتىندا دۇنيەگەن كەلگەنىمەن, ءوزىنىڭ بارلىق تابىسىنا شۆەتسيانىڭ تۋى استىندا ونەر كورسەتكەن كەزدە قول جەتكىزدى. ارماننىڭ اكەسى امەريكالىق بولعانىمەن, اناسى – شۆەد. سول بولاشاق جۇلدىز ناعاشىلارى مەكەندەگەن مەملەكەتتىڭ ازاماتتىعىن الۋدى ءجون كوردى.
2015-2017 جىلدار ارالىعىندا جاستار اراسىنداعى جارىستاردا ديۋپلانتيس جاسىنداي جارقىلداپ, تالاي رەكوردتى جاڭارتتى. ەرەسەكتەر دۋىنا قوسىلعاننان كەيىن دە ول بىردەن دارالاندى. سكانديناۆيالىق سايىپقىران ەۋروپا چەمپيوناتىن ەكى رەت ۇتىپ, ەكى دۇركىن الەم چەمپيونى جانە ءبىر مارتە سول باسەكەنىڭ كۇمىس جۇلدەگەرى اتاندى. جابىق عيماراتتاعى جارىستاردا دا قارسىلاس شاق كەلتىرمەدى. 2021 جىلى توكيو وليمپياداسىندا الدىنا جان سالمادى. ءوزىنىڭ ەڭ كەرەمەت كورسەتكىشىنە ارمان 2020 جىلدىڭ 17 قىركۇيەگىندە قول جەتكىزدى. ريمدە وتكەن كەزەكتى ءبىر جارىستا شۆەتسيا سپورتشىسى 6 مەتر 15 سانتيمەترگە سەكىرىپ, ۋكراينانىڭ ساڭلاعى سەرگەي بۋبكانىڭ باقانداي 16 جىل بويى مۇرتى بۇزىلماي تۇرعان رەكوردىن جاڭارتتى. ودان كەيىن سول ناتيجەسىن بىرنەشە مارتە جاقسارتتى. قازىرگى كەزدە ونىڭ رەكوردى – 6,23 مەتر. جابىق عيماراتتا ديۋپلانتيس 6,20 مەترگە سەكىردى. بۇل كورسەتكىشتەردى جاڭارتۋعا ازىرگە جەر-جاھانداعى بىردە-ءبىر جەڭىل اتلەتتىڭ قارىم-قابىلەتى جەتەتىن ەمەس.
جوعارىداعى جاڭالىقتى ەستىپ, كادىمگىدەي قۋانىپ قالدىق. ويتكەنى ءدال وسىنداي دەڭگەيدەگى جەڭىل اتلەت ەلىمىزگە بۇرىن-سوڭدى ات باسىن بۇرماعان. مىنە, ەندى ارمان ديۋپلانتيس استاناعا كەلەدى. شۆەتسيانىڭ ماقتانىشى ارقا توسىندە الەمدىك رەكوردتى قايتا ءبىر جاڭارتسا, وسى تاريحي ءساتتىڭ كۋاسى بولۋ باقىتى بىزگە دە بۇيىراتىن ەدى.
ەستەرىڭىزگە سالا كەتەيىك, بىلتىر وتكەن «Astana Indoor Meet» تۋرنيرىندە امەريكالىق مايكل رودجەرس (60 مەتر, ەرلەر), حورۆاتيالىق مارينا بلوۋدەك (800 مەتر, ەرلەر), ەفيوپيالىق ءالي امديلمانا (3 000 مەتر, ەرلەر), كۋبالىق رودجەر يريبارن (60 مەترگە كەدەرگىلەر ارقىلى جۇرگىرۋ, ەرلەر), پورتۋگاليالىق ارياليس حوسەفا گاندۋللا (60 مەتر, ايەلدەر), كەنيالىق دجارينتەر ماۆيا مۆاسيا (1 500 مەتر, ايەلدەر), وزبەكستاندىق داريا رەزنيچەنكو (ۇزىندىققا سەركىرۋ) سىندى تانىمال سپورتشىلار توپ جاردى. ءوز وتانداستارىمىز اراسىنان ميحايل ليتۆين (400 مەتر), ەلينا ميحينا (400 مەتر) جانە نادەجدا دۋباۆيتسكايا (بيىكتىككە سەكىرۋ) دارا شىقتى.