تۋريزم جانە سپورت ءمينيسترى ەرمەك مارجىقپاەۆ ۆەلوسپورت فەدەراتسياسىنىڭ باسشىلىعىمەن كەزدەسىپ, بيىلعى ەسەبىن تىڭدادى. فەدەراتسيا وكىلدەرى سپورتشىلاردىڭ ناتيجەلەرى تۋرالى ايتىپ, تورتجىلدىقتىڭ باستى دوداسىنا دايىندىق جوسپارلارىنا توقتالدى, دەپ جازادى Egemen.kz ۆەدومستۆونىڭ ءباسپاسوز قىزمەتىنە سىلتەمە جاساپ.
بيىلعى ازيا ويىندارىندا ۆەلوشوسسەدەن قازاقستان قۇراماسى جاقسى ناتيجە كورسەتىپ, 2 التىن, 1 كۇمىسكە يە بولعانى ءمالىم. وعان قوسا, قىزدار باسەكەسىندە وتانداستارىمىز 1 قولا العان. ۆەلوترەك پەن ماۋنتينبايك (تاۋ ۆەلوسيپەدى) جارىسىندا وكىنىشكە قاراي, قازاقستان سپورتشىلارى جەڭىس ساتىلارىنان كورىنە المادى.
ەرمەك مارجىقپاەۆ وتاندىق ۆەلوسپورتتا جەڭىسپەن ورىلگەن جاقسى ءداستۇر بار ەكەنىن, سپورتشىلارىمىز بيىلدىڭ وزىندە جوعارى ناتيجەگە قول جەتكىزگەنىن اتاپ ءوتتى.
«الەكسەي لۋتسەنكو مەن ەۆگەني فەدوروۆتىڭ ماۋسىم بويى ءساتتى ونەر كورسەتۋى ارقاسىندا جەرلەستەرىمىز وليمپيادانىڭ 3 جولداماسىنا قول جەتكىزدى. ۆەلوشاباندوزداردىڭ حانچجوۋداعى (قىتاي) جوعارى جەتىستىگى وليمپيادا ويىندارىندا جۇلدەلى ورىنداردان ۇمىتتىلىگىمىزدى ايعاقتايدى. ۆەلوسپورت – مەدال قاجەت ەتەتىن سپورت ءتۇرى. ال ۆەلوترەك پەن ماۋنتينبايك سياقتى باسقا دا باعدارلامالار بويىنشا جاتتىعۋ جوسپارىن قايتا قاراۋ كەرەك. ۇلتتىق قۇراما كوشباسشىلارى جەكە دايىندىق جوسپارىن قاتاڭ ۇستانۋعا ءتيىس», دەدى ۆەدومستۆو باسشىسى.
ايتا كەتسەك, ۆەلوسپورت بويىنشا وليمپيادالىق ىرىكتەۋ سايىستارى اياقتالىپ, ۇلتتىق قۇراما سپورتشىلارى پاريج وليمپياداسىنا دايىندىق جۇمىستارىن باستادى. ۆەدومستۆو وليمپياداعا دەيىن سپورتشىلاردىڭ وقۋ-جاتتىعۋ جيىنىن ۇيىمداستىرۋعا, فارماكولوگيالىق جانە ۆەلوشاباندوزداردى قالپىنا كەلتىرۋ قۇرالدارى بويىنشا بارلىق قاجەتتى جاعدايدى جاساۋعا جاردەم قىلادى.
جيىن سوڭىندا مينيستر وتكەن جارىستارداعى ۆەلوترەك پەن ماۋنتيبايكتىڭ ناتيجەلەرىنە تەرەڭ تالداۋ جۇرگىزۋدى, سونداي-اق پاريج وليمپياداسى الدىندا كوماندا ىشىندە اۋىزبىرشىلىك پەن جاقسى كوڭىل-كۇيدى ساقتاۋ جونىندە شارالار قابىلداۋدى تاپسىردى.