ەل دامۋىنداعى وڭ وزگەرىستەر

اتالعان سايلاۋدا قازاقستان حالقى­نىڭ باسىم كوپشىلىگى مەملەكەت باسشىسى ۇسىنعان رەفورمالار باعدار­لا­ما­سىن جانە ادىلەتتى قازاقستان قۇرۋ باع­دارىن قولداپ, داۋىس بەرگەن ەدى. وسى ۋاقىت ىشىندە ەلىمىزدىڭ قوعامدىق-ساياسي ومىرىنە جانە ەكونوميكاسىنا اسەر ەتكەن ايتارلىقتاي وزگەرىستەر بولدى.

بيلىكتىڭ بارلىق تارماقتارى قايتا جاڭ­عىرتىلدى. ساياسي جۇيەنى دە­موك­را­تيا­­لاندىرۋ جولىندا ماڭىزدى قادام­دار جاسالدى. تەجەمەلىك پەن تەپە-تەڭدىك جۇيەسى كۇشەيە ءتۇستى. وڭىرلەردىڭ دەر­بەس­تىگى دە نىعايىپ كەلەدى. اكىمشىلىك رەفورما ىسكە اسىرىلا باستادى.

سايلاۋ جۇيەسى جاڭارتىلىپ, سونىڭ نەگىزىندە ءماجىلىس جانە بارلىق دەڭگەي­دە­گى ءماسليحاتتار سايلاۋى ءوتتى. اۋداندار مەن اۋىل اكىمدەرىنىڭ سايلاۋى دا جاڭا تا­لاپتارعا سايكەس وتكىزىلىپ جاتقانى بەل­گى­لى. جالپى ايتقاندا, وتكەن ءبىر جىل­دىڭ ىشىندە ەلىمىزدە ادىلەتتى, تەڭگە­رىمدى جانە دە­موكراتيالىق ساياسي جۇيەنىڭ نەگىزى قا­لاندى.

حالىقتىڭ ءال-اۋقاتىن جاقسارتۋ جانە ءومىر ءسۇرۋ ساپاسىن ارتتىرۋ باعىتىندا دا اۋقىمدى جۇمىس اتقارىلدى. الەۋمەتتىك ساياساتتىڭ تيىمدىلىگىن ارتتىرۋ ءۇشىن ارنايى الەۋمەتتىك كودەكس قابىلداندى. «جايلى مەكتەپ», «اۋىلدا دەنساۋلىق ساق­تاۋدى جاڭعىرتۋ», «اۋىل اماناتى» سياقتى ۇلتتىق جوبالار جۇيەلى تۇر­دە جۇزەگە اسىرىلىپ كەلەدى. كەلەسى جىلدان باستاپ «ۇلتتىق قور – بالالارعا» پرەزيدەنتتىك باعدارلاماسى اياسىندا تولەمدەر تولەنە باستايدى.

قازىردىڭ وزىندە ادىلەتتى ەكونومي­كا­لىق جۇيە قۇرۋ باعىتىنداعى جۇمىس­تار­دىڭ ناقتى ناتيجەلەرىن كورىپ وتىرمىز. مونوپوليامەن جانە سىبايلاس جەمقورلىقپەن قاتاڭ كۇرەس قارقىندى جۇر­گىزىلىپ جاتىر. جالپى سوماسى 1 ترلن تەڭگە بولاتىن زاڭسىز يەمدەنىلگەن اك­تيۆتەر جانە شامامەن 8 ملن گەكتار پايدالانىلماي جاتقان جەر مەملەكەتكە قاي­تارىلدى. شاعىن جانە ورتا بيزنەستى قولداۋعا ارنالعان جۇيەلى شارالار قولعا الىندى.

ەل ەكونوميكاسىنا شەتەلدىك ينۆەس­تي­تسيا­لاردىڭ سالىنۋى دا بەلسەندى جال­عاسىپ كەلەدى. سىرتقى ساۋدانىڭ ءوسۋ قار­قىنى كوڭىل قۋانتادى. وسىن­داي شا­رالاردىڭ ارقاسىندا 2023 جىل­دىڭ قورىتىندىسى بويىنشا ەل ەكونو­مي­كا­سى­نىڭ ءوسۋى 5 پايىز كولەمىندە بولادى دەپ بولجانىپ وتىر. مۇنداي ناتيجەلەر پرەزيدەنتىمىزدىڭ باستاماسىمەن ىسكە اسىرىلىپ جاتقان رەفورمالاردىڭ تيىمدىلىگىن ايقىن كورسەتەدى.

وسىلايشا, ءبىر جىلدا كوپ جۇمىس ىس­تەلدى. الدا ءالى تالاي اۋقىمدى مىندەت­تەر تۇر. مەملەكەت باسشىسى 2029 جىل­عا قاراي ەلدىڭ جالپى ىشكى ءونىمىن 2 ەسە­گە ۇلعايتۋدى, ياعني 450 ملرد دول­لار­عا جەتكىزۋدى مىندەت ەتىپ بەلگى­لەپ بەردى. سونداي-اق ەكونوميكانى ءارتاراپتاندىرۋ, وڭدەۋ ونەركاسىبىن دامىتۋ, اۋىل شارۋاشىلىعىنىڭ ونىمدىلىگى مەن تيىمدىلىگىن ارتتىرۋ, ەلىمىزدىڭ بار­لىق وڭىرىندە ينفراقۇرىلىمدى جاڭ­عىرتۋ جانە قازاقستاندىقتاردىڭ ءال-اۋقاتىن ودان ءارى جاقسارتۋ سياقتى سترا­تەگيالىق مەجەلەر بار. وسىنداي ماقسات-مىندەتتەردى ناتيجەلى ىسكە اسىرۋ ءۇشىن قازاقستاندىقتاردىڭ الداعى ۋاقىتتا دا پرەزيدەنتىمىز قاسىم-جومارت توقاەۆتىڭ ساياساتىن قولداپ, مەملەكەت باسشىسىنىڭ توڭىرەگىندە توپتاسۋى اسا ماڭىزدى.

«بىرلىگى بەكەم ەل بيىكتى باعىن­دى­رادى» دەيدى. شىن مانىندە, ءبىز ادى­لەتتى, جاڭارعان, ينكليۋزيۆتى جانە دەموكراتيالىق قازاقستان قۇرۋ جولىندا جۇدىرىقتاي جۇمىلا بىلسەك, كوزدەگەن ماقساتتارىمىزعا قول جەت­كىزەمىز.

ماۋلەن اشىمباەۆ,

سەنات توراعاسى