سەناتتىڭ كونستيتۋتسيالىق زاڭناما, سوت جۇيەسى جانە قۇقىق قورعاۋ ورگاندارى كوميتەتىنىڭ دەپۋتاتتارى قارجى مونيتورينگى اگەنتتىگىندە كوشپەلى وتىرىس وتكىزدى. پرەزيدەنت تاپسىرمالارىن ىسكە اسىرۋ اياسىندا ەكونوميكالىق قىزمەت سالاسىنداعى قىلمىستاردى بۇدان بىلاي قىلمىستان تىس دەپ تانۋ تالقىلاۋدىڭ نەگىزگى ماسەلەسى بولدى.
كوميتەت توراعاسى نۇرلان بەكنازاروۆ كەزدەسۋدى اشا كەلىپ, پرەزيدەنتتىڭ حالىققا جولداۋىندا ەلىمىزدە قولايلى كاسىپكەرلىك احۋال قالىپتاستىرۋ جانە بيلىك پەن بيزنەس اراسىندا سىندارلى ديالوگ ورىستەتۋدىڭ ماڭىزدىلىعىن اتاپ وتكەنىن ەسكە سالدى.
ء«بىزدىڭ مەملەكەت ەكونوميكالىق قىلمىستارعا قاتىستى قىلمىستىق ساياساتتى ىزگىلەندىرۋ ۇدەرىسىن, سونداي-اق ولاردى قىلمىستان ارىلتۋ ماسەلەسىن دايەكتى تۇردە جۇرگىزىپ كەلەدى. سونداي-اق, سانكتسيالاردى جەڭىلدەتۋ ارقىلى سول قىلمىستارعا ايىپپۇل سانكتسياسىن قولدانۋدى كەڭەيتۋ, قوعامدىق جانە تۇزەۋ جۇمىستارىنا تارتۋ مەن باس بوستاندىعىن شەكتەۋ تۇرىندەگى باس بوستاندىعىنان ايىرۋعا بالاما جازالار بەلگىلەۋ, اكىمشىلىك جاۋاپكەرشىلىك سالاسىنا اۋىرلىعى از بىرقاتار قىلمىستاردى اۋدارۋ نە قىلمىستىق جاۋاپتىلىقتى الىپ تاستاۋ جونىندە قىلمىستىق كودەكسكە ءتيىستى تۇزەتۋلەر ەنگىزىلدى», دەدى ن.بەكنازاروۆ.
ءىس-شارا بارىسىندا ادىلەت ءمينيسترىنىڭ ورىنباسارى الما مۇقانوۆا مۇددەلى ورگانداردىڭ قىلمىستان ارىلتۋ مۇمكىندىگىن قاراستىراتىن نورمالارعا جۇرگىزگەن تالداۋى تۋرالى ايتتى. ول سوتقا دەيىنگى تەرگەپ-تەكسەرۋدى جۇرگىزەتىن ورگان ءىس جۇزىندە از قولدانىلاتىن جانە سيرەك بولۋىنا بايلانىستى قىلمىستىق زاڭنامانىڭ كەيبىر نورمالارىن الىپ تاستاۋدى ۇسىناتىنىن اتاپ ءوتتى. سونىمەن قاتار وتىرىسقا قارجى مونيتورينگى اگەنتتىگىنىڭ, باس پروكۋراتۋرانىڭ جانە «اتامەكەن» ۇلتتىق كاسىپكەرلەر پالاتاسىنىڭ وكىلدەرى قاتىستى.
سەناتور ن.بەكنازاروۆ ءىس-شارا سوڭىندا مەملەكەت باسشىسىنىڭ تاپسىرمالارىن ورىنداۋ جانە كاسىپكەرلەردىڭ قورعالۋ دەڭگەيىن ارتتىرۋ ماقساتىندا پارلامەنت پەن مۇددەلى مەملەكەتتىك ورگانداردىڭ الدىندا ەكونوميكالىق قىزمەت سالاسىنداعى بىرقاتار قىلمىستىق قۇقىق بۇزۋشىلىقتى قىلمىستان تىس دەپ تانۋ تۋرالى قىلمىستىق كودەكستى ودان ءارى جەتىلدىرۋگە باعىتتالعان زاڭنامالىق نورمالاردى ازىرلەۋ مىندەتى تۇرعانىن اتاپ ءوتتى.