كورشىلەردىڭ داڭقتى داتاسى

قوس اۋلەتتىڭ تاتۋ-ءتاتتى, اۋىزبىرشىلىگى مول كورشىلىگى اۋىلدان 25 شاقىرىم قاشىقتا ورنالاسقان مىرزاحمەت قىستاعىنان باستاۋ العان. وسى جەرگە قويشى وتباسىلار ورىن مەن ءماريا ساپاراليەۆتەر, قۋان مەن ءماۋيا تولەشباەۆتار ۇجىمشاردىڭ وتارىن باعىپ, كاسىپ ەتەدى. ەڭبەكقور جانداردىڭ قوي شارۋاشىلىعىندا ۇزدىك اتانىپ, جوعارى كورسەتكىشتەرگە قول جەتكىزگەنىنە كوپشىلىك كۋا. ىرگەلەس ورنالاسقان قوس اۋلەتتىڭ ۇل-قىزدارى كىشكەنتاي كەزىنەن ءبىر ءۇيدىڭ بالاسىنداي بولىپ, ق ۇلىن-تايداي تەبىسىپ, بىرگە ءوستى, جەتىلدى. ارماندارى دا ءبىر ەدى – باۋىرىنداي بولىپ كەتكەن كورشىلەرمەن جاراسىمدىلىعى ۇزىلمەي, وسكەن سوڭ ءبىر-بىرىنەن كوز جازىپ قالماۋ.

ەكى وتباسىنان ورگەن ۇرپاقتىڭ ءوزى – شاعىن اۋىلدىڭ جۇرتىنداي. اتاپ ايتساق, ورىن اتا مەن ءماريا اجەيدەن 5 ۇل, 3 قىز, 18 نە­مەرە-جيەن, 19 شوبەرە, 14 جيەنشار تا­را­عان. 6 ۇل, 3 قىز دۇنيەگە اكەلىپ, تاربيەلەپ وسىرگەن قۋان اتا مەن ءماۋيا اجەنىڭ دە شا­ڭىراعى قۇت پەن بەرەكەگە تولدى. 9 پەرزەنتتەن 27 نەمەرە-جيەن, 7 شوبەرە, 20 جيەنشار كورىنىپتى. «كوڭىل سىيسا, ءبارى سىيادى» دەگەن راس ەكەن, وسىنشاما پەرزەنتتى قوس اۋلەتتىڭ جاپ­سارلاس ورنالاسقان قارا شاڭىراعى اتاۋ­لى كۇندە قۇشاعىن ايقارا اشىپ, قارسى الدى.

– اتا-اجەلەرىمىزدىڭ كورشىلەس قونىس تەپكەنىنە 45 جىل تولعانىن اتاپ ءوتۋدى قارا شاڭىراققا يە بولىپ قالعان اعامىز ساندىبەك ساپاراليەۆ پەن كورشى اعامىز مەرەكە تولەشباەۆ اۋەلدەن ويلاستىرىپ قويدى. ولار باستاپ, ءبىز دە قوستاپ, بەلگىلى كۇنگە كەلىسىپ, الىس-جاقىننان اعىلدىق. وزدەرى بولەك شاڭىراق كوتەرگەن اتا-انالارىمىزدىڭ بالالىق شاعىن بىرگە وتكىزگەن باۋىر-قۇربىلارىمەن جۇزدەسكەندەگى قۋانىشىن سوزبەن جەتكىزۋ مۇمكىن ەمەس. قايتا-قايتا ءبىرىن-ءبىرى قۇشاقتاپ, بالالىق شاقتارىن سونداي ەرەكشە ساعىنىشپەن ەسكە الىپ, بىرگە وتكىزگەن كۇندەرىنىڭ قىزىق تا ىستىق ەستەلىكتەرىن اقتاردى. ۇرپاققا جالعاسقان سىيلاستىق, قۇرمەت دەپ بىلەمىن, قوس اۋلەتتىڭ ۇل-قىزى تۇگىل, نەمەرە-جيەندەرى ءبىز دە ءبىر-بىرىمىزگە باۋىردايمىز, – دەيدى ساپاراليەۆتەرگە نەمەرە ءالي ورىنوۆ.

بۇگىندە قوس اۋلەتتىڭ ۇل-قىزدارىنىڭ الدى زەينەت جاسىندا, كەيبىرەۋلەرى ورال مەن اقتاۋ قالالارىندا تۇرسا, قالعانى اتاقونىستان كوپ الىسقا كەتپەگەن – قامىستىكول مەن كونەككەتكەندە. كەزىندە اتاقتى قويشى بولعان ورىن مەن قۋان اتا, ساپاراليەۆتەر اۋلەتىنىڭ ابزال اناسى ءماريا اجە بۇگىندە جوق. وسى قۋانىشتى كۇندە قوس اۋلەتتەن تاراعان ۇرپاق ءتوردىڭ ءسانىن كەلتىرگەن ءماۋيا اجەگە بالالىق ريزاشىلىعىن ارناپ, سىي-قۇرمەتكە بولەدى.

باۋىرلار باس قوسقان داستارقان باسىندا ىزگى تىلەكتەر, اق پەيىلدى ەستەلىكتەر ايتىلىپ, ءان شىرقالىپ, دوڭگەلەنىپ بي دە بيلەندى. بۇل تويدى ءتىپتى ءبىر تۋعان باۋىرىڭ جات بولىپ بارا جاتقان قازىرگىدەي زاماندا جاراسىمدىلىقتىڭ, ادامي قۇرمەتتىڭ قانداي بولاتىنىنىڭ ۇلگىسى دەپ ەسەپتەدىك.

ءاليا شاراپيەۆا

باتىس قازاقستان وبلىسى,

اقجايىق اۋدانى