وزبەكستاننىڭ باس شاھارى تاشكەنتتە بىرقاتار مەملەكەت وكىلدەرىنىڭ قاتىسۋىمەن كاسىپقوي بوكس كەشى ءوتتى. اتالعان جارىستى تاماشالاۋ ءۇشىن كوپتەگەن اتاقتى سپورتشىلار كەلدى. سولاردىڭ قاتارىندا كەزىندە اسا اۋىر سالماقتا الەمنىڭ ءابسوليۋتتى چەمپيونى اتانعان داڭقتى مايك تايسون مەن ەۆاندەر حوليفيلد تە بولدى.
سويقان سوققىلى ساڭلاقتاردىڭ ونەرىن تاماشالاۋ ءۇشىن جانكۇيەرلەر «حۋمو ارەناعا» كوپتەپ جينالدى. جارىستىڭ باستى جەكپە-جەگىندە ارا-تۇرا كاسىپقوي رينگتە كۇش سىناسىپ جۇرگەن اۋەسقوي بوكستىڭ شوق جۇلدىزى باحودير جالولوۆ پەن وڭتۇستىك افريكا رەسپۋبليكاسىنىڭ (وار) مىقتىسى كريس تومپسون جۇدىرىقتاستى. 29 جاستاعى وزبەكستان ماقتانىشىنىڭ وليمپيا (2021) مەن ازيا ويىندارىنىڭ (2022) جەڭىمپازى, الەمنىڭ ەكى (2019, 2023) جانە ازيانىڭ ءۇش (2017, 2019, 2021) دۇركىن چەمپيونى دەگەن اتاقتارى بار. باحودير جالولوۆتىڭ ءبىزدىڭ قامشىبەك قوڭقاباەۆتى ۇنەمى قاپى قالدىرىپ جۇرگەنىن جۇرت جاقسى بىلەدى. كاسىپقويلار اراسىندا باحودير 13 كەزدەسۋ وتكىزىپ, بارلىعىندا ايقىن باسىمدىق تانىتتى. ازىرگە بىردە-ءبىر بوكسشى ونىڭ قارقىنىنا شىدامادى. 28 جاستاعى تومپسون كاسىپقوي رينگتە 2007 جىلدان بەرى باق سىناپ كەلەدى. التى جىل ارالىعىندا 18 مارتە شارشى الاڭعا كوتەرىلگەن ول 12 رەت جەڭىسكە جەتىپ, 5 رەت ۇتىلدى. تاعى ءبىر تارتىستا تەڭ ەسەپ تىركەلدى. كريس جەتى قارسىلاسىن ەسىنەن تاندىردى. بىراق بۇل باسەكەنىڭ باستالعانىنان اياقتالعانى تەز بولدى. باحودير ءبىرىنشى راۋندتا-اق وار وكىلىن اۋىر سوققىسىمەن سۇلاتىپ سالدى.
جارىستىڭ باستى باسەكەلەرىنىڭ بىرىندە قازاقتىڭ ۇلى مەيىرىم نۇرسۇلتانوۆ يت ارقاسى قيانداعى سوناۋ چيليدەن كەلگەن حۋليو الاموسپەن ايقاستى. 30 جاستاعى قانداسىمىز 20 جەكپە-جەكتىڭ بىردە-بىرەۋىندە ۇتىلعان ەمەس. 11 قارسىلاسىن ول نوكاۋتقا جىبەردى. 32 جاستاعى سانتياگونىڭ تۋماسى العاشقى 16 كەزدەسۋىن جەڭىسپەن اياقتاپ, توعىز باسەكەلەسىن ايقىن جەڭدى. سوڭعى رەت بيىل جازدا يتاليالىق ەتينوس وليحاعا ۇپاي سانىمەن ەسە جىبەردى. سونىڭ سالدارىنان چيليلىك سپورتشى IBO نۇسقاسى بويىنشا التىن بەلبەۋدى يەلەنۋ مۇمكىندىگىنەن ايىرىلدى. تاشكەنتتىڭ تورىندە ەكەۋى دە ايانباي ايقاسىپ, باسەكەنىڭ باسىنان اياعىنا دەيىن بارىن سالدى. دەسەك تە مەيىرىمنىڭ باسىمدىعى بايقالىپ تۇردى. ونىڭ سوققىلارى جويقىن بولدى جانە دالىرەك ءتيدى. 12 راۋندقا سوزىلعان سايىستا قانداسىمىز ۇپاي سانىمەن جەڭىسكە جەتتى. ءسويتىپ, مەيىرىم نۇرسۇلتانوۆ ورتا سالماقتاعى WBC نۇسقاسىنىڭ چەمپيوندىق بەلبەۋى ءۇشىن تالاسۋ مۇمكىندىگىنە يە بولادى. ال بۇل اتاق ءالى دە جەڭىلىستىڭ كەرمەك ءدامىن تاتپاعان اقش-تىڭ داڭقتى بوكسشىسى دجەرمالل چارلوعا تيەسىلى.
وكىنىشكە قاراي, رەيتينگتىك باسەكەلەردە وزبەك بوكسشىلارىنا قارسى شىققان ءۇش جەرلەسىمىز وڭباي ءسۇرىندى. اتاپ ايتساق, ارتەم پچەلياكوۆ شۋحرات ابدۋللاەۆتان, بوگدان وتەگەنوۆ كومرونبەك تۇرعىنبوەۆتان نوكاۋتپەن جەڭىلسە, حودجياكبار كاديروحۋنوۆتان ۇپاي سانىمەن ۇتىلدى. ايتەۋىر اسا اۋىر سالماقتاعى مۇحيتدين ابديەۆتىڭ شەرزود ماماجانوۆقا ءالى جەتكەنى كوڭىلگە مەدەت بولدى.