تاسقالا – اۋدان ورتالىعى. اۋدان ورتالىعى بولعاندىقتان, تۇرعىنداردىڭ كوپ توعىسقان جەرى.
جەرگىلىكتى حالىق اۋىلدىڭ باتىس بولىگىن ەلەۆاتور جاعى دەپ اتايدى. ونىڭ سەبەبى اۋداندىق ورتالىقتاندىرىلعان اۋرۋحانانىڭ قاسىمەن وتەتىن وتكەل ەلەۆاتورمەن جالعاستىرادى. 2021-2022 جىلدارى اۋىلىشىلىك جولدارعا اسفالت توسەلگەندە وتكەلگە كۇردەلى جوندەۋدەن وتكىزەمىز دەپ, بۇرىنعى سالىنعان جىڭىشكە تەمىر ترۋبالاردى الىپ تاستاپ, ديامەترى ۇلكەن 11 تەمىر ترۋبا سالدى.
«اۋىل – ەل بەسىگى» جوباسى بويىنشا 2021 جىلى 28 اۋىلىشىلىك كوشەلەر كۇردەلى جوندەۋدەن وتەتىنى انىقتالىپ, كونكۋرس قورىتىندىسى بويىنشا جوبا مەردىگەرلەرى بولىپ «ايدانا» جشس مەن «انۋش قۇرىلىس» جشس انىقتالدى. كۇردەلى جوندەۋگە اناۋ-مىناۋ ەمەس, رەسپۋبليكالىق جانە وبلىستىق بيۋدجەتتەن 1 779 121 000 تەڭگە قاراستىرىلعانىن ەستىگەن اۋدان تۇرعىندارىنىڭ قۋانىشىندا شەك بولمادى.
جىل سايىن جاز بەن كۇز ايلارىندا جاڭبىردان, جازعىتۇرىم قار سۋىنان زارداپ شەگەتىن جاعدايدى ۇمىتاتىن بولارمىز دەپ ارمانداعان ەدى...
ەسكى وتكەل بولعان شاقتا اۋىل مالىنىڭ سۋ ىشۋىنە, قاز-ۇيرەكتىڭ ەركىن جۇزۋىنە ارنانىڭ سۋى جەتپەي جاتاتىن. ەلەۆاتورمەن جالعاستىراتىن كوپىردىڭ ۇستىمەن وتەتىن كۇردەلى جوندەۋ تىزىمىندەگى 28 كوشەنىڭ ءبىرى وسى ەدى.
جوعارىدا جازعانىمىزداي, سۋ تولىپ تۇراتىن وتكەلدى بۇزىپ, جاڭا سۋ جۇرەتىن تەمىر ساقينالار سالدى ەمەس پە؟ نە سەبەپتى ەكەنى بەلگىسىز, تەمىر ساقينالاردىڭ سۋ ۇستاۋ بيىكتىگى تومەن ءتۇسىرىلدى. سول سەبەپتى جازعىتۇرى جينالاتىن قار سۋى دەركول وزەنىنە اعىپ كەتىپ جاتتى.
بوس قالعان سۋ ارناسىنىڭ ورنىنا قامىس قاۋلاپ ءوستى. قامىستى شاۋىپ, ارنانى تازالاۋ جونىندە ءتيىستى ورىندارعا تۇرعىندار اتىنان ارىز-شاعىمدار جازىلدى. بىراق شارا قولدانىپ جاتقان باسشى جوق.
جازعىتۇرى گۇلدەرى, كۇزدە ۇپەلەكتەرى ۇشىپ مازانى قاشىرادى. كۇشتى جەل تۇرعاندا, ىق جاعىنداعى ۇيلەردى اپپاق ءتۇستى «قار» باسىپ, ۇشقان ۇپەلەكتەرى ادامنىڭ دەم الۋىنا كەسىرىن تيگىزىپ, مۇرىندارىن تۇمشالايدى. ازىرشە وتكەلدە جاسالعان كۇردەلى جوندەۋدىڭ سيقى وسىنداي.
سۋ ارناسىندا قالماي اعىپ كەتەتىنى بىلاي تۇرسىن, سالىنعان 11 تەمىر ساقينانىڭ تۇپتەرى تسەمەنتتەلىپ بەكىتىلمەگەن. سونىڭ سالدارىنان جاڭبىر مەن قار سۋى وتكەلدىڭ ۇستىنەن جان-جاعىنا اعىپ, ماشينالاردىڭ قوزعالىسىنا قاۋىپ تۋعىزىپ وتىر.
قازىر ترۋبالاردىڭ سۋاعار جاعىنداعى بوس توپىراق وتكەلدىڭ ورتا بەلىنە دەيىن ءمۇجىلىپ, قاۋىپتى جاعدايدا تۇر. ونىڭ ۇستىنە جاياۋ جۇرگىنشىگە ارنالعان جول جوق. ءارلى-بەرلى اعىلعان ماشينالاردان قارسى كەلە جاتقان ادامدار قالاي قاشارلارىن بىلمەي دال. بالالار ءۇشىن دە, ۇلكەندەر ءۇشىن دە وتە قاۋىپتى.
اۋىلدىڭ كۇنشىعىس تەرىسكەي جاعىندا كوللەدج, اۋداندىق ورتالىقتاندىرىلعان اۋرۋحانا, بىرنەشە بالاباقشا, ساۋدا ورىندارى بار. سوندىقتان سول تۇستان ەرتەلى-كەش كىسى ۇزىلمەيدى. جاياۋ جۇرەتىن تۇرعىندار ءۇشىن دە, مەكتەپكە باراتىن وقۋشىلار ءۇشىن دە, اسىرەسە ماشينا جارىعى شاعىلىسقان ءتۇن مەزگىلىندە ءوتۋ قاۋىپتى ەكەنىن كىمگە ايتىپ تۇسىندىرەرىڭدى بىلمەيسىڭ...
«اۋىل – ەل بەسىگى» مەملەكەتتىك باعدارلاماسى اياسىندا جۇزەگە اسىرىلىپ جاتقان جوبالارعا سايكەس اۆتوكولىكتەرگە ارنالعان تاسجولدارمەن قاتار كەيبىر كوشەلەرگە جاياۋ جۇرگىنشىلەرگە ارنالعان جاياۋجولدار دا سالىناتىنى ايتىلعان بولاتىن. ەندى, مىنە, ءبارى ۇمىتىلىپ, ەسكەرۋسىز قالعانداي. كوزگە كورىنگەن وسىنداي ولقىلىقتار مەردىگەرلەردىڭ كەمشىلىگى ەكەنى ايتپاسا دا تۇسىنىكتى.
اۋىل تۇرعىندارى ءۇشىن ماڭىزدى ماسەلەنىڭ ءبىرى – سۋ.
وسى وتكەلدىڭ قاق تۇبىنەن شىعىپ جاتقان تۇپ-تۇششى بۇلاق سۋى بار. بۇل بۇلاقتى كەڭەس وكىمەتى تۇسىندا سول كەزدەگى اۋىل باسشىسى اينالاسىن تەمىر تورمەن قورشاتىپ, دانەكەرلەپ, ونىڭ ۇستىنە تسەمەنت ساقينا ورناتىپ, سۋ الۋ ءۇشىن ادەيى ىدىس قويدىرىپتى. كەيىنگى توقىراۋ جىلدارىندا جارىق بولماي قالعان ۋاقىتتا اۋىل تۇرعىندارى وسى بۇلاقتى پايدالانىپ, ءبىراز قاجەتىنە جاراتىپتى.
قازىر سول جەر استىنان شىعىپ جاتقان بۇلاقتىڭ قورشاعان تەمىر قورشاۋى عانا قالعان. تسەمەنت ساقيناسىن ج ۇلىپ الىپ لاقتىرىپ تاستاعان. بۇلاقتى قالپىنا كەلتىرۋ جونىندە اۋىلدىڭ بۇرىنعى جانە قازىرگى وكرۋگ اكىمدەرىنە اۋىزشا دا ايتىلىپ, جازباشا دا وتىنىشتەر بەرىلگەن ەدى. امال قانشا, تۇرعىندار تالابى ەسكەرۋسىز قالدى. وسى ماسەلەنى جەرگىلىكتى بيلىك وكىلدەرىنىڭ ەسىنە تاعى ءبىر مارتە سالىپ قويعاندى ءجون كوردىك. «تەمىر ترۋبالاردىڭ ەكى جاعىن تسەمەنتتەپ بەرسە, وتكەلدىڭ نەگىزگى بولىگىن كەڭەيتىپ, جاياۋ جۇرگىنشىلەرگە ارناپ جاياۋجول سالىنسا, بۇرىنعى بۇلاق قالپىنا كەلتىرىلسە» دەگەن تۇرعىندار ءوتىنىشى اياقسىز قالماسا ەكەن.
تاسقالالىق تۇرعىندار اۋىلدىڭ ەلەۆاتور بولىگىنە وتەتىن وتكەلدىڭ جانە بۇلاقتىڭ قاجەتتىگىن ماسەلە ەتىپ كوتەرۋدەن تانعان ەمەس. تاياۋدا اۋدان اكىمى قىزمەتىنە كىرىسكەن تالعات شاكىروۆ ۇمىتكەر رەتىندە اۋدان اكىمدىگىنە كانديدات بولىپ تىركەلىپ, اۋدان تۇرعىندارىمەن كەزدەسكەنىندە تۇرعىنداردى تولعانتقان وزەكتى ماسەلەلەرگە بار كۇش-جىگەرىن سالاتىنىن ايتقان بولاتىن. سول ۋادەسىنە ساي وتكەل مەن بۇلاق ماسەلەسى تولىق شەشىمىن تابادى دەپ ۇمىتتەنەمىز.
بيسەنباي وتەگەنوۆ,
زەينەتكەر, اۋداندىق قوعامدىق كەڭەس مۇشەسى
باتىس قازاقستان وبلىسى,
تاسقالا اۋدانى,
تاسقالا اۋلى