«جايلى مەكتەپ» ۇلتتىق جوباسى – ۇرپاق ءۇشىن قۇندى جوبا. بىرىنشىدەن, ەلىمىزدە وزەكتى ماسەلەگە اينالعان وقۋشى ورىن تاپشىلىعىن جويۋعا سەپتىگىن تيگىزەدى. ەكىنشىدەن, اۋىل مەن قالا مەكتەپتەرىندەگى ءبىلىم دەڭگەيىن تەڭەستىرەدى. ۇشىنشىدەن, وقۋشىعا جايلى جاعداي جاساپ, ساپالى بىلىممەن قامتاماسىز ەتەدى. سوندىقتان جوباعا بولىنگەن قارجىنىڭ ءار تيىنى ءوز ماقساتىنا جۇمسالۋعا ءتيىس. بىراق وكىنىشكە قاراي, ءبىلىم وشاقتارىن جوبالاۋ كەزىندە قۇرىلىسقا ارنالعان قاراجات مولشەرىن نەگىزسىز ۇلعايتۋ فاكتىلەرى انىقتالىپ جاتىر.
مۇنداي جاعدايلاردى «Samruk-Kazyna Construction» ماماندارى جايلى مەكتەپتەردىڭ جوبالىق-سمەتالىق قۇجاتتاماسىن تەكسەرۋ كەزىندە انىقتاعان. بۇل تۋرالى باسقارما توراعاسى ماۋلەن ايمانبەتوۆ جايلى مەكتەپتەردىڭ مەردىگەرلەرىمەن جانە جوبالاۋشى ۇيىمدارمەن وتكەن جيىن بارىسىندا مالىمدەدى.
كونسورتسيۋم جەتەكشىلەرىمەن جاسالعان ەرس-شارتتار اياسىندا جايلى مەكتەپتەردىڭ جوبالىق-سمەتالىق قۇجاتتاماسىن اۋەلى تاپسىرىس بەرۋشى, ياعني «Samruk-Kazyna Construction» كومپانياسى تەكسەرىپ, قۇپتاۋى كەرەك. سودان كەيىن عانا ول مەملەكەتتىك ساراپتامادان وتكىزۋگە ارنالعان پورتالعا جۇكتەلەدى.
جوبالىق-سمەتالىق قۇجاتتامانىڭ قاتاڭ تەكسەرىلەتىنىن بىلسە دە, كەيبىر مەردىگەرلەر ايلاسىن اسىرۋعا تىرىسقان. مىسالى, كەيبىر جوبالاۋشى ۇيىمدار سىرتقى ينجەنەرلىك جەلىلەردى (كارىز, سۋمەن جابدىقتاۋ, جىلىتۋ, توبج جانە ت.ب.) تارتۋ بويىنشا شىعىنداردى مەكتەپتەردىڭ جوبالىق-سمەتالىق قۇجاتتاماسىنا ەنگىزىپ قويعان. الايدا «Samruk-Kazyna Construction» كومپانياسىنىڭ مالىمدەۋىنشە, بۇل جۇمىستار جەرگىلىكتى اتقارۋشى ورگانداردىڭ قاراجاتى ەسەبىنەن ورىندالۋعا ءتيىس. ۇكىمەتتىڭ №963 قاۋلىسىنا سايكەس جەرگىلىكتى اتقارۋشى ورگاندار ۇلتتىق جوبانى ىسكە اسىرۋ شەڭبەرىندە ورتا ءبىلىم ۇيىمدارىنىڭ وبەكتىلەرىن سالۋ كەزەڭىنە ديرەكتسياعا جەر ۋچاسكەسىنە جەردى ۋاقىتشا وتەۋسىز پايدالانۋ قۇقىعىن بەرۋدى جانە مەكتەپ سالۋ جوسپارلانىپ وتىرعان جەر ۋچاسكەسىن ينجەنەرلىك-كوممۋنيكاتسيالىق ينفراقۇرىلىمعا قوسۋدى نەمەسە ديرەكتسيا مەن جەرگىلىكتى اتقارۋ ورگاندارى اراسىندا قۇندارى بۇرىن كەلىسىلگەن ديرەكتسيا ايقىنداعان مەردىگەر ۇيىمنىڭ شىعىستارىن تولەۋدى قامتاماسىز ەتەدى.
سونداي-اق تاۋارلار مەن قىزمەتتەردىڭ سمەتالىق قۇنىن وتىرىك قىمباتتاتىپ كورسەتكەن جاعدايلار دا بار. ەرەجەگە سايكەس, جايلى مەكتەپتەردى جوبالاۋ كەزىندە «قازاق قۇرىلىس جانە ساۋلەت عىلىمي-زەرتتەۋ جانە جوبالاۋ ينستيتۋتى» ازىرلەگەن رەسۋرستىق سمەتالىق-نورماتيۆتىك بازا مەن ساۋلەت-قالا قۇرىلىسى, قۇرىلىس كاتالوگىن باسشىلىققا الۋ قاجەت. ماۋلەن ايمانبەتوۆ مەكتەپتەردى جوبالاۋدان باستاپ پايدالانۋعا بەرۋگە دەيىنگى بارلىق ۇدەرىس زاڭناما مەن قۇرىلىس نورماتيۆتەرى شەڭبەرىندە جۇرگىزىلۋگە ءتيىس ەكەنىن ەرەكشە اتاپ ءوتتى.
«جوبالاۋشى ۇيىمدارداعى مامانداردىڭ كاسىبي دەڭگەيى تومەن بولۋى سالدارىنان 300, 600, 900 ورىندىق مەكتەپتەردىڭ قۇرىلىس-مونتاجداۋ جۇمىستارىن باستاۋ مۇمكىن بولماي تۇر. مەن سىزدەردى بۇرىنعى ادىستەردەن باس تارتۋعا شاقىرامىن. جايلى مەكتەپتەر زاماناۋي قۇرىلىس يندۋسترياسىنىڭ وزىق ۇلگىسى بولۋعا ءتيىس. سوندىقتان مەن ونى ىسكە اسىرۋعا ۇلكەن جاۋاپكەرشىلىكپەن قاراۋدى سۇرايمىن. ەگەر جوبانى ادەيى قىمباتتاتۋ ارەكەتى بايقالسا, قۇرىلىستىڭ كەز كەلگەن كەزەڭىندە ءبىز تۇزەتۋلەر ەنگىزىپ, شىعىنداردى ازايتامىز. قوسىمشا جۇمىس كولەمى ءۇشىن قارجى تولەنبەيدى, ءار تيىن ءۇشىن جاۋاپ بەرەسىزدەر», دەدى باسقارما توراعاسى.
م.ايمانبەتوۆ قيتۇرقى ارەكەتتەر ءۇشىن اكىمشىلىك جانە قىلمىستىق جاۋاپكەرشىلىك قاراستىرىلعانىن ەسكەرتتى. اتاپ ايتقاندا, قر قك 189-بابى («سەنiپ تاپسىرىلعان بوتەن مۇلiكتi يەمدەنiپ الۋ نەمەسە تالان-تاراجعا سالۋ») قولدانىلۋى مۇمكىن.
جايلى مەكتەپتەر قولدانىسقا دايىن كۇيدە تاپسىرىلۋعا ءتيىس. وقۋ ورىندارىن جوبالاۋمەن, سالۋمەن جانە جابدىقتاۋمەن قۇرىلىس جانە جوبالاۋشى ۇيىمداردان تۇراتىن كونسورتسيۋم اينالىسادى. كونسورتسيۋم جەتەكشىلەرى رەتىندە قۇرىلىس كومپانيالارى تانىلعان.
كەزدەسۋ قورىتىندىسى بويىنشا «Samruk-Kazyna Construction» باسشىسى كونسورتسيۋم جەتەكشىلەرى مەن كونسورتسيۋم قۇرامىنا كىرەتىن جوبالاۋشى ۇيىم وكىلدەرىنە سمەتا باعاسىنىڭ ارتۋىنا جول بەرمەۋدى, ال جوبالاۋ جۇمىستارىن بۇيرىق پەن نورماعا ساي جۇرگىزۋدى, ءتيىمسىز, ەكونوميكالىق تۇرعىدان ماقساتسىز جوبالاۋ جۇمىستارى مەن سمەتا قۇنىن ءوسىرۋ بويىنشا جاۋاپكەرشىلىك جونىندە كەپىلدىك حات ۇسىنۋدى, مەكتەپتەردىڭ قۇرىلىسى بويىنشا باس جوسپارىن ءنورماتيۆتى تالاپتارعا ساي رەتكە كەلتىرۋدى, جسق بارلىق ءبولىمى بويىنشا سمەتالىق-ءنورماتيۆتى بازاعا سايكەس كەلمەيتىن كولەمى ءجونسىز كوتەرىلگەن قۇرىلىس-مونتاجداۋ جۇمىستارىن, ماتەريال مەن قۇرىلعىلاردى الىپ تاستاۋدى تاپسىردى.
ايتا كەتەيىك, 2022 جىلى وقۋشى ورىندارىنىڭ تاپشىلىعى 270 مىڭ ورىندى, ونىڭ ىشىندە قالادا – 174 مىڭ ورىندى, اۋىلدا 96 مىڭ ورىندى قۇرادى. بۇدان باسقا, جۇمىس ىستەپ تۇرعان 710 مەكتەپ ابدەن توزعان. 177 مەكتەپ پايدالانۋ مەرزىمى 70 جىلدان اساتىن عيماراتتاردا, 239 مەكتەپ ساماننان, 69 مەكتەپ اعاشتان, 5 مەكتەپ قامىستان سالىنعان جانە 40 مەكتەپ بەيىمدەلگەن عيماراتتاردا ورنالاسقان. ماسەلەن, 2022 جىلعى 1 قاراشاداعى جاعداي بويىنشا ۇلتتىق ءبىلىم بەرۋ دەرەكقورىنىڭ دەرەكتەرىنە سايكەس, ەلدە 37 مەكتەپ اپاتتىق جاعدايدا دەپ تانىلعان. ال 142 مەكتەپتە وقىتۋ ءۇش اۋىسىمدا جۇرگىزىلەدى. سول سەبەپتى «جايلى مەكتەپ» جوباسىنىڭ تالاپقا ساي ءارى ۋاقىتىندا ورىندالۋى اسا ماڭىزدى.