جانىبەكتىڭ ەندىگى قارسىلاسى كىم؟

«گۋانتانامونىڭ التىنى» دەگەن جاناما ەسىمگە يە بولعان ەريسلاندي لارانىڭ جاسى – 40-تا. كەزىندە ول اۋەسقوي رينگتە تابىس­تى ونەر كورسەتتى. 2005 جىلى قىتايدىڭ مينيان قالاسىندا وتكەن الەم چەمپيوناتىندا 69 كگ سالماق دارە­جەسىندە سىنعا تۇسكەن كۋ­با­لىق بوكسشى ۋكراينالىق سەرگەي دەرەۆيانچەنكو (30:9), ۇندىستاندىق ۆيجەندەر سينگح (ايقىن جەڭىس), رەسەيلىك اندرەي بالانوۆ (28:16), امەريكالىق مەلسون بويد (ايقىن جەڭىس), قازاق باقتيار ارتاەۆ (31:22) جانە بەلارۋستىك ماگومەد نۋرۋتدينوۆتى (24:9) ۇتىپ, باس جۇلدەنى ولجالادى. ءدال سول جىلى لارا ماسكەۋدە ۇيىم­داستىرىلعان الەم كۋ­بوگىندە كۇمىس مەدالدى يە­لەنسە, 2006 جىلى كولۋمبيانىڭ كار­تاحەناسىندا ورتالىق امە­ريكا مەن كاريب باسسەيىنى ويىندارىنىڭ جەڭىمپازى اتاندى. ءسوز ورايى كەلگەندە, ەريسلاندي لارانىڭ ءتۇرلى جا­رىستاردا ءبىزدىڭ باقىت سار­سەك­باەۆقا ەكى مارتە ەسە جى­بەر­گەنىن دە ايتا كەتكەن ابزال.

2007 جىلى برازيليادا الاۋى تۇتانعان پانامەريكا ويىن­دارى بارىسىندا لارا ءوزىنىڭ كو­ماندالىق ارىپتەسى, وليمپيادا مەن الەمنىڭ ەكى دۇركىن چەمپيونى گيلەرمو ريگوندو ەكەۋى قاشۋعا ارەكەت جاسايدى. بىراق بۇل جوسپار جۇزەگە اسپاي, جەرگىلىكتى پوليتسەيلەر ولاردى كۋبانىڭ دە­لەگاتسيا باسشىلارىنا تابىستايدى. دەسەك تە كەلەسى جىلى لارا كوزدەگەن ماقساتىنا قول جەتكىزدى. باسىندا گەرمانياعا قونىس­تانعان ول كوپ ۇزاماي اقش-قا اتتاندى.

كۋبانىڭ قابىلانى كا­سىپقوي رينگتەگى تۇساۋكەسەر كەزدەسۋىن 2008 جىلدىڭ 4 شىل­دەسىندە وتكىزدى. سودان بەرى 15 جىلدان اسا ۋاقىت زۋلاپ وتە شىققان ەكەن. سول ارا­لىقتا ەريسلاندي 34 رەت شارشى الاڭ­عا شىعىپ, 28 جەكپە-جەكتى ءوز پايداسىنا شەشتى. 16 قارسىلاسىن ەسىنەن تاندىردى. ول 2011 جىلى پول ۋيليامس (39-2), 2014 جىلى ساۋل الۆارەس (43-1-1) جانە 2018 جىلى دجاررەتت حەردتان (21-0) ۇپاي سا­نى­­مەن ۇتىلدى. تاعى ءۇش باسەكە تەڭ اياق­تالدى. سوڭعى رەت لارا بىلتىر كوك­تەم­دە گەري و’سالليۆاندى سەگىزىنشى راۋندتا سۇلاتىپ سالىپ, WBA نۇسقاسىنىڭ ورتا سالماقتاعى چەمپيوندىق اتاعىن ءساتتى قورعادى.

ال كارلوس ادامەس – 29 جاستا. دو­مي­نيكان رەس­پۋب­ليكاسىندا دۇنيەگە كەلگەن ول دا سپورتتىق مانسابىن اۋەسقوي رينگتەن باستادى. جاستاردىڭ پانامەريكا بى­رىنشىلىگىندە توپ جارىپ, الەمدىك دودادا شيرەك فينالعا دەيىن جەتتى. ەرلەر اراسىندا قۇرلىق چەمپيوناتىنىڭ قولا جۇلدەگەرى اتاندى. 2013 جىلى الماتىداعى بالۋان شولاق اتىنداعى سپورت سارايىندا جالاۋى جەلبىرەگەن دۇنيەجۇزىلىك دودادا ءۇش كەزدەسۋ وتكىزدى. العاشقى ەكى قارسىلاسىن ۇت­قانىمەن, 1/8 فينالدا ءبىزدىڭ مەرەي اقشالوۆقا جول بەردى.

ادامەس كاسىپقويلار اراسىندا 2015 جىلدان بەرى ونەر كورسەتىپ كەلەدى. سول ارا­لىقتا 24 كەزدەسۋ وتكىزىپ, 23 رەت جە­­ڭىسكە جەتتى. 18 ب­اسەكەدە ايقىن با­­سىمدىق تانىت­تى. ونىڭ تەك پاتريك تەيشەيراعا ءالى جەتپەدى. 2019 جىلدىڭ 30 قاراشاسىندا وتكەن كەزدەسۋدە بارلىق تو­رە­شى برازيليالىقتىڭ مىق­تى­­لىعىن مويىندادى. كار­لوس كەيىنگى ءۇش جەكپە-جەگىندە سەرگەي دەرەۆيانچەنكو, حۋان ماسياس مونتەل جانە دجۋ­ليان ۋيليامس سىندى تانىمال بىلعارى قولعاپ شە­بەر­لەرىن جەڭدى. قازىرگى كەزدە دومي­نيكاندىق بوكسشىنىڭ WBC نۇسقاسى بويىنشا جارتىلاي ورتا سالماقتىڭ «ۋاقىتشا» چەمپيونى دەگەن اتاعى بار.