اتا-انالاردى پەداگوگيكالىق قولداۋ

ەلىمىزدە كوپتەگەن وتباسى بالالاردى تولىققاندى تاربيەلەۋ مەن دامىتۋ, ولاردىڭ ءال-اۋقاتىن قامتاماسىز ەتۋگە قولايلى جاعداي جاساي الماي وتىر. وكىنىشكە قاراي, زەرتتەۋلەردىڭ ناتيجەسى قوعامدا وتباسى ينستيتۋتى السىرەپ, عاسىرلار بويى قالىپتاسقان ۇلتىمىزعا ساي وتباسىلىق قۇندىلىقتار مەن داستۇرلەردىڭ جوعالىپ بارا جات­قانىن انىقتادى. بۇل ولقىلىقتىڭ ورنىن ءبىلىم بەرۋ ۇيىمدارى اتا-انالارمەن بىرلەسىپ تولتىرماقشى. بالا تاربيەسىندە وتباسىنىڭ ءرولى زور. وقۋ-اعارتۋ ءمينيسترى عاني بەيسەمباەۆتىڭ ايتۋىن­شا, ساپالى ءبىلىمدى, ءپاتريوتيزمدى, نا­عىز مامان بولۋدى, ۇنەمشىلدىك پەن ەڭبەكقورلىقتى قالىپتاستىرۋعا وقۋشى – مۇعالىم – اتا-انا بىرلەسە جۇمىس اتقارۋى شارت. سول سەبەپتى مينيستر تاربيە جۇمىسىنىڭ ءرولىن كۇشەيتۋ ماقساتىندا رەسپۋبليكاداعى مەكتەپتەردە 1 قىركۇيەكتەن باستاپ اتا-انالاردى پەداگوگيكالىق قولداۋ ورتالىعىن اشۋدى تاپسىرعان.

ماڭىزى بار جوبانىڭ مىندەتى – بالالار­دىڭ ءال-اۋقاتىن قامتاماسىز ەتۋگە اتا-انالاردىڭ پەداگوگيكالىق ما­دەنيەتىن, پسيحولوگيالىق جانە الەۋ­مەت­تىك قۇزىرەتىن دامىتۋ. اشىلعانىنا ەكى اي بولعان ورتالىق وقۋ جىلىنىڭ سوڭىنا دەيىن اتا-انالارعا ۇلتتىق قۇن­دىلىقتارعا نەگىزدەلگەن سەگىز ساباق وتكىزەدى. بۇل ساباقتاردا ەرتەگى, اڭىز-اڭگىمەلەر, باتىرلار جىرلارىنان ۇزىندىلەر كەلتىرۋ, ماقال-ماتەلدەر, حالىق اندەرى, دالا ءدىلمارلارىنىڭ شەشەندىك سوزدەرى, جىراۋلار شىعار­ما­شىلىعى, سالت-داستۇرلەر مەن عۇ­رىپتاردىڭ, ۇلتتىق كيىمدەردىڭ ما­ڭىزى, ۇرپاقتار تىزبەگى (شەجىرە), ەر مەن ايەلدىڭ قوعامداعى ورنى, تۋىستىق قاتى­ناستاردىڭ ەرەكشەلىكتەرى قامتى­لادى. سونىمەن قاتار جوبا اياسىندا «دانالىق مەكتەبى» كلۋبى قۇرىلدى. كلۋب مەكتەپتىڭ ناقتى سۇرانىستارىنا سايكەس «اتا وسيەتى», «اجە دانالىعى», «اعا قامقورلىعى», «جەڭگە كەڭەسى» سەكىلدى سەكتسيالاردى ۇيىمداستىرۋ ار­قىلى ۇلتىمىزعا ءتان تۋىستىق قارىم-قاتىناستاردى ۇرپاق بويىنا ءسىڭىرۋدى ماقسات ەتەدى.

ەركەناز قورداباي,

ل.ن.گۋميلەۆ اتىنداعى ەۇۋ ستۋدەنتى