بۇل كۇندەرى فرانتسيانىڭ مەتتس قالاسىندا تەننيستەن اتر 250 ءتۋرنيرى ءوتىپ جاتىر. جۇلدە قورى 562 815 ەۋرونى قۇراعان جارىستا الەكساندر بۋبليك تە ونەر كورسەتتى.
ءبىرىنشى كەزەڭدە بوس بولعان ەلىمىزدىڭ ءبىرىنشى جانە الەمنىڭ 32-راكەتكاسى ەكىنشى اينالىمدا اتر رەيتينگىندە 147-ساتىعا جايعاسقان يتاليالىق فابيو فونينيمەن كۇش سىناستى. وكىنىشكە قاراي, 26 جاستاعى بۋبليكتىڭ 36 جاستاعى ارداگەر ويىنشىعا ءالى جەتپەدى. ءۇش ساعاتتاي ۋاقىتقا سوزىلعان اسا شيەلەنىستى ويىن 4:6, 7:6, 7:6 ەسەبىمەن ءفونينيدىڭ پايداسىنا شەشىلدى. اپەننين تۇبەگىنىڭ وكىلى ەندى ءوزىنىڭ وتانداسى لورەنتسو سونەگومەن سايىسقا تۇسەدى.
ەسەسىنە ءتۇرلى تۋرنيردە باق سىناپ جاتقان وزگە تەننيسشىلەرىمىز تۇساۋكەسەر كەزدەسۋلەرىندە جەڭىسكە جەتتى. اتاپ ايتساق, حەلسينكيدە دەنيس ەۆسەەۆ فينليانديالىق وتتو ۆيرتانەندى 7:5, 6:3 ەسەبىمەن ەڭسەردى. نوكسۆيلدە بەيبىت جۇقاەۆ فرانتسيالىق تيتۋان دروگەدەن ايلاسىن اسىردى – 6:4, 6:1. سوفيادا ەكۆادورلىق گونسالو ەسكوبارمەن جۇپتاسىپ ويناعان الەكساندر نەدوۆەسوۆ اۋستريالىق الەكساندر ەرلەر مەن لۋكاس ميدلەردەن باسىم ءتۇستى – 7:5, 6:2.