قازاق بالالار ادەبيەتىنە دەگەن ەسكى كوزقاراستى وزگەرتۋدى, ەڭ الدىمەن, قازاقستان جازۋشىلار وداعىنىڭ كازىرگى باسقارماسى باستاسىن دەيمىز. ول باستاپ تا جاتىر. بۇرىن جىلدىق قورىتىندى جينالىستاردا بالالار ادەبيەتى تۋرالى باياندامالار ەڭ سوڭىندا جاسالاتىن. بۇل ءبىر وزگەرمەيتىن قالىپتاسقان ءداستۇر سياقتى ەدى. سوڭعى جىلدارى ادەبيەتتىڭ بۇل سالاسى جايىنداعى اڭگىمەنى الدىمەن قوزعاۋعا قول جەتكىزدىك دەپ ايتا الامىز.
ەكىنشى ءبىر وزەكتى ماسەلە – مادەنيەت جانە اقپارات مينيسترلىگى بالالار كىتابىن شىعارۋدى جالپى توپقا قوسىپ جىبەرمەي, جەكە تەندەر جاريالاسا دەگەن وي. شۇكىرشىلىك دەيىك, ەل پرەزيدەنتىنىڭ جانە جەكەلەگەن دەپۋتاتتار مەن ءتيىستى مينيسترلىك وكىلدەرىنىڭ قايتا-قايتا قوزعاۋىمەن بالالار ادەبيەتى كىتاپتارىن باسىپ شىعارۋدا ىلگەرىلەۋ نىشاندارىنىڭ بارى انىق. دەگەنمەن بۇل سالاداعى ورىندالۋعا ءتيىستى ماسەلەلەر ءالى دە تولىق شەشىمىن تابا الماي كەلە جاتىر. ايتالىق, جاس وقىرماندارعا ارنالعان كىتاپتاردى مەملەكەت قارجىسىنان شىعارۋدا ويلاناتىن جايتتار بارشىلىق.
قاپتاعان باسپالار اراسىندا وسىنداي تەندەردى الۋعا قايىسىسى لايىقتى دەگەن ماسەلەنى ءالى دە جەتە زەرتتەپ, ماركەتينگ جۇمىستارىن جۇرگىزۋ كەرەك. كىمنىڭ ۇسىناتىن سوماسى ارزان بولسا, جەڭىستى سوعان بەرە سالۋمەن بارلىق ماسەلە شەشىلە قويا ما؟ بىزدىڭشە, مىنا ماسەلەلەرگە جەتكىلىكتى نازار اۋدارىلماي كەلەدى.
ەڭ بولماعاندا كىتاپتاردىڭ ماتىندەرى ەش قاتەسىز تازا شىعارىلىپ ءجۇر مە؟ ياعني بۇرىن شىعارعان ونىمدەرىنىڭ ساپالىق كورسەتكىشى ەسكەرىلە مە؟ ونداعى رەداكتورلار مەن كوررەكتورلاردىڭ بازالىق ءبىلىمى قانداي؟ تالاپ بويىنشا, بۇل مامانداردىڭ فيلولوگيالىق نەمەسە جۋرناليستيكالىق ءبىلىم بولۋى كەرەك ەمەس پە؟ وكىنىشكە قاراي, كەيبىر باسپالاردىڭ بۇل اتالعان ورىندارىندا باسقا ماماندىق يەلەرى دە جۇمىس ىستەيتىن كورىنەدى. سونىڭ سالدارىنان جاس وقىرماندارعا ارنالعان ونىمدەردىڭ كەيبىرى ورفوگرافيالىق, ءتىپتى پۋنكتۋاتسيالىق قاتەلەرگە تولى.
كىتاپتاردى بەزەندىرەتىن سۋرەتشىلەر مەن گرافيكتەردىڭ, ديزاينەرلەر مەن بەت قاتتاۋشىلاردىڭ دا ءوز قىزمەتتەرىنە قانشالىقتى ساي ەكەندىگىن ەسكەرۋ كەرەك. ويتكەنى بالالارعا ارنالعان كىتاپتاردىڭ بەزەندىرىلۋى, تالاپقا ساي تارتىمدى بولىپ شىعۋى وسى اتالعان ماماندىقتارعا تىكەلەي بايلانىستى.
ءۇشىنشى ايتارىمىز, بالالار ادەبيەتىنە قالام تارتاتىن اۆتورلار قاتارى جوق ەمەس, بارشىلىق. كەيىنگى جاس بۋىن وكىلدەرىنىڭ ىشىندە دە تالاپكەرلەر سانى كوبەيە تۇسۋدە. ماسەلە – سولاردىڭ جازعاندارىنىڭ كوركەمدىك-ەستەتيكالىق ساپاسى قانداي ەكەندىگىنە بايلانىستى. كوبىنىڭ كوڭىل كونشىتە بەرمەيتىندىگىن جاسىرا بەرۋدىڭ قاجەتى جوق. قولجازبالاردى تاڭداۋداعى ءتيىستى كوميسسيا مۇشەلەرى مەن باسپا رەداكتورلارىنىڭ قاتتىراق كوڭىل بولەتىن ماسەلەلەرى, مىنە, وسى ارادا.
قازىرگى تاڭدا فەنتەزي, ميستيكالىق باعىتتاعى تۋىندىلاردى جازۋدىڭ اۋقىمى كەڭەيە ءتۇستى. ال سونىڭ جاس ۇرپاقتىڭ تانىم-تۇسىنىگىن ەستەتيكالىق تۇرعىدا قالىپتاستىرۋداعى ءرولى قانداي؟ بۇل ادەبيەتتانۋشى عالىمداردىڭ, ۇستازدار مەن الەۋمەتتانۋشىلاردىڭ ارنايى زەرتتەپ, زەردەلەۋىن قاجەتسىنەدى. مەملەكەتىمىزدىڭ كەلەشەك مۇشەلەرىن قالىپتاستىرۋداعى كوركەم ادەبيەتتىڭ ءرولىن مويىندايتىن بولساق, بۇل ماسەلەگە ءاتۇستى قاراۋعا بولمايدى.
جاس وقىرماندارعا, اسىرەسە كەرەگى – شاپشاڭ دامىپ كەلە جاتقان بۇگىنگى زاماننىڭ تىنىسىن بىلدىرەتىن رەاليستىك شىعارمالار. جاس قالامگەرلەردىڭ ول جاعىنا بارا بەرمەي, جوعارىداعىداي جەڭىل باعىتتاردى تاڭداۋعا جاپپاي بەت بۇرۋى – بۇگىنگى ءومىر شىندىعىن جەتە بىلمەگەندىكتەن, زەرتتەپ جازۋدى قيىنسىناتىندىعىنان.
بۇل ايتىلعاندار – تەك مەنىڭ ويىم عانا ەمەس, قازاقستان جازۋشىلار وداعى باسقارماسى جانىنداعى بالالار ادەبيەتى كەڭەسى مۇشەلەرى ا.ەستەن, ب.قوشىم-نوعاي, ب.ۇسەنباەۆ, د.مامىرباەۆا, ب.بولاتحانوۆا, س.دۇيسەنبيەۆ, ءا.بايبول, تاعى باسقالارى تاراپىنان ءبىر ارناعا قۇيىلعان ورتاق پىكىرلەر. جۋىردا بولعان كەزەكتى وتىرىستا تالقىلانعان ماسەلەلەر قاتارى بۇدان دا اۋقىمدى.
ءبىر اۋىز سوزبەن ايتقاندا, قازىرگى بالالار ادەبيەتىن ءارى قاراي دامىتۋ ءۇشىن بۇل باعىتتا جۇمىس ىستەپ جۇرگەن اۆتورلار كونتينگەنتى دە, جاۋاپتى ورىنداردا وتىرعان مەملەكەتتىك لاۋازىم يەلەرى دە جان-جاقتى ويلاستىرسا ەكەن دەيمىز.
نۇرداۋلەت اقىش,
قازاقستان جازۋشىلار وداعى باسقارماسى جانىنداعى بالالار ادەبيەتى كەڭەسىنىڭ توراعاسى